PATSACHÖ nunakuna miranqanmannömi, jutsa y mana alli rurëkuna jinantin Patsaman juntarirqan. Tsë witsanqa, itsa Enoc jutiyoq nunalla Diosta sirwirqan, pëmi willakurqan Jehová llapan mana alli nunakunata ushakätsinampaq kaqta. Pero willakunqantaqa manam ni pï creirqantsu, y mana alli rurëkunam más mirakïkarqan. Más llakikïpaqqa angelkuna Diospa contran churakäyanqanmi, pëkunaqa ciëlochö cargonkunata jaqirïkurmi nunaman tikrarir munayanqan warmikunawan casakuyarqan. Tsënöpam alläpa jatusaq y kallpasapa nefilim nishqan nunakuna yuriyarqan, pëkunam kë Patsachö maqakur y wanutsikur kawakuyaq. ¡Imanöraq Dios shonqunchö nanatsikurqan kamanqankunata tsënö kawaqta rikarnin!

Enoc wanurinqanchönam Noe yurirqan. Pëqa familianwanmi Jehová mandanqanta rurayarqan. Jukpinnam, llapan mana alli nunakunata ushakätsinampaq diluviota apamunampaq kaqta Jehová nirqan. Pero sirweqnin Noe y animalkuna wanuyänantaqa manam munarqantsu. Tsëmi juk arcata ruranampaq mandarqan. Tsëchö Noëwan familian salvakuyänampaq y tukïläya animalkunata yëkatsiyänampaqpis nirqanmi. Noëqa Diosta wiyakurqanmi, y 40 o 50 watakuna arcata rurarmi karqan. Jina ‘nunacunatapis willaparqanmi’ (2 Pedru 2:5). Diluvio shamunanta willakuptimpis manam ni pï wiyakurqantsu. Noëwan familian arcaman yëkuyänampaq höra chäriptinnam arcaman yëkuriyarqan. Tsënam punkuta Dios wichqariptin tamyar qallëkurqan.

40 junaq y 40 paqasmi tamyëkurqan, y jinantin Patsam yakuwan juntarirqan. Manam ni juk mana alli nunallapis salvakurqantsu. Killakuna pasariptinnam yaku tsakir qallëkurqan y juk jirkachömi arca quedarirqan. Noëwan familian arcapita yarqarayämuptinnam juk watanö pasarishqa karqan. Noe Jehoväta alläpa agradecirnam juk qarënin qorqan. Tsënam Noëta Dios awnirqan manana imëpis diluviowan kë Patsachö kaqkunata ushakätsinampaq. Tsë ninqan rasumpa kanqanta rikätsikunampaqmi ciëlochö juk turmanyëta yuritsirqan. Nunakuna kë turmanyëta rikarmi yarpäyänan karqan Kamakoq Yaya parlanqanta.

Diluvio pasariptinnam mushoq mandamientokunata Dios qorqan. Ëtsa mikïta puëdeyanqantam willakurqan, pero yawarta mana mikuyänampaqmi mandakurqan. Jina, jinantin Patsachö täräyänampaqmi nirqan. Pero mana wiyakïta munarmi, atskaq nunakuna juk markallachö juntakëkur jatun wayita rurar qallëkuyarqan Nemrod jutiyoq nuna mandakuptin. Pero Diosqa manam tsëta rurayänanta jaqirqantsu. ¿Imanö? Tsëchö täraqkuna illaqpita tukïläya idiömata parlayänampaq rurarninmi, tsëmi kë markapa jutin Babel karqan y tsëpitanam Babilonia. Y parlayanqanta llapampis mana entiendenakurmi rurëkäyanqantapis jaqirïkur wakpa këpa ëwakuyarqan.

(Génesis 6–11 y Judas 14, 15 textokunapita jorqashqam.)