25 YACHATSIKUY

¿Puëdïmantsuraq warmiwan o ollquwan këta munar partï yatapëta dejëta?

“Puwaq watayoq këkarmi warmiwan këta munar partïta yatapar qallëkurqä. Y tiempuwannam musyarirqä tsë rurëpaq Dios imata pensanqanta, y warmiwan këta munar partïta cada yataparmi mana alli sientikoq kä. ‘Noqataqa manachi Diosqa kuyamanqanatsu’, nirmi pensaq kä” (Luis).

WAMRAKUNAQA, jövinyäyanqanmannömi cuerpunkuna cambian y warmiwan o ollquwan këtam alläpa munayan. Tsëmi wakin jövinkunaqa partinkunata yatapëman chäyan. a Wakin nunakunaqa tsë rurë allilla kanqantam niyan. Tsënö niyaptimpis, tsë rurëqa mana allim y dejanëkim. Apostol Pablum kënö nin: “Cuerpuykikuna llapan munanqanta ushakätsiyë, [...] löcuyëpa oqllanakuy munëta” (Colosensis 3:5). Partikita yatapanqëkiqa manam warmiwan o ollquwan këta munanqëkita ushakätsinqatsu, sinöqa masmi munatsishunki. Y këkunamanmi chätsishunki:

● Kikikillaman yarparäkurmi munënikillata rurëta munanki.

● Ollqupaqpis o warmipaqpis oqllanakunëkillapaq sirwiyanqantam pensanki.

● Casädu karpis kikikillaman pensarmi majëkiwan oqllanakurqa kushishqanatsu kanki.

Warmiwan o ollquwan këta munanqëkita mana aguantar partikita yatapänëkipa rantinqa, alli dominakuytam yachanëki (1 Tesalonicensis 4:4, 5). ¿Imatataq rurankiman cuerpuykita dominanëkipaq? Bibliachömi consëjukunata tarintsik: warmiwan o ollquwan këta munatsishoqnikitaqa ama imatapis rurëtsu (Proverbius 5:8, 9). Warmiwan o ollquwan këta munar partikita yatapëman chashqa karqa, capazchi tsë rurëta dejëta munarqunki, peru puëdirqunkitsu. Tsëqa capazchi pensëkanki tsë rurëta dejëta mana puëdinqëkita y Dios munanqannö kawëta mana puëdinëkipaq kaqta. Tsëtam pensarqan Pëdru jutiyoq jövinpis, kënömi nin: “Tsëta ruranqäpitaqa alläpa mana allim sientikoq kä. Imëkata rurarpis manam kushishqaqa sientikuyta puëdeqtsu kä, ni manam Diosmampis mañakuyta puëdeqtsu kä”.

Qampis pënö sientikurqa, ama qelanäkuritsu. Jövinkunapis y mayorkunapis tsë rurëkunataqa dejëta puëdiyashqam. Pëkunapis puëdikäyaptinqa, qampis dejëta puëdinkim.

Mana alli sientikur

Rikärinqantsiknöpis, warmiwan o ollquwan këta munar partinkunata yatapaqkunaqa mana allim sientikuyan o 2 Corintius 7:11 ninqannöpis ‘Diospa rikëninchömi’ mana alli sientikuyan. Tsënö sientikunqëkiqa allim, tsëmi yanapashunki tsë mana alli rurëkunata dejanëkipaq. Peru alläpa mana alli sientikunqëkiqa manam yanapashunkitsu tsë mana alli rurëkunata dejanëkipaq (Proverbius 24:10).

Tsëmi musyanëki warmiwan o ollquwan këta munar partikita yatapanqëkiqa, rakcha o qanra rurë kanqanta. Tsë rurëta yachakärirqa, imëka mana allikunamanmi chanki (Tïtu 3:3). Tsënö kaptimpis, yarpänëkim tsë rurëqa alläpa jutsa mana kanqanta, manam piwampis oqllanakur jutsata rurënötsu (Jüdas 7). Tsëmi warmiwan o ollquwan këta munar partikita yatapashqa karqa, pensanëkitsu alläpa jutsata rurashqa kanqëkita. Tsëpa rantinqa, tsë rurëkunata dejanëkipaqmi kallpachakunëki.

Alli cuidakuykarpis tsë rurëman yapë ishkirqa, ama qelanäkuritsu. Proverbius 24:16 textuchömi kënö nin: “Alli nunaqa qanchis kuti ishkirpis sharkunqam, peru mana alli nunaqa imëka mana allikunapa pasarmi juklla ishkirkunqa”. Imachöpis ichik pantarninqa, ama pensëtsu mana alli nuna kanqëkita. Tsëpa rantinqa, tsë rurëkunaman imakuna chätsishunqëkita alli rikë tsë rurëman yapë mana ishkinëkipaq.

Teyta Dios alläpa kuyakoq y alläpa llakipäkoq kanqanman pensë. Gobernanti Davidpis musyarqanmi jutsata rurarir imanö sientikuna kanqanta. Kënömi nirqan: “Imanömi juk papä wamrankunata llakipan, tsënöllam Teyta Jehoväqa respetaqninkunatapis alläpa llakipan. Teyta Diosqa allim musyan imanö kamashqa kanqantsikta, y yarpanmi allpallapita kanqantsikta” (Salmus 103:13, 14). Diosnintsikqa musyanmi jutsasapa kanqantsikta y perdonamänapaqmi listu këkan (Salmus 86:5). Tsënö kaptimpis, tsë mana alli rurëkunata dejanëkitam munan. Rikärishun warmiwan o ollquwan këta munar partikita yatapëta dejanëkipaq ima yanapashunëkipaq kaqta.

Imata rurëkanqëkita alli rikë. ¿Warmiwan o ollquwan oqllanakuyta mas munatsishoqniki pelïculakunataku televisionchö o Internetchö rikëkanki? Tsëqa Salmus qellqaq ninqanmi yanapashunkiman. Pëmi Diosnintsikman kënö mañakurqan: “Mana allikunata mana rikänäpaq yanapëkamë” (Salmus 119:37). b

Ama oqllanakuyta munëllamanqa yarparäkuytsu. William jutiyoq cristiänu ninqanta rurë. Kënömi nin: “Manaraq patsäkurnin Bibliata leyi. Patsäkunqëki höra Diosnintsikman y Biblia ninqankunaman yarparanqëkim yanapashunki” (Filipensis 4:8).

Pasëkanqëkita pillatapis willë. Alläpa penqakurpis, pasëkanqëkitaqa pillatapis willanëkim. Tsëmi yanapashunki tsë mana alli rurëta dejanëkipaq. Tsëtam rurarqan David jutiyoq jövin. Kënömi nin: “Papänïwanmi tsë asuntupaq parlarqä. Y manam imëpis qonqashaqtsu parlapämanqanta. Willanä mana fäcil kanqanta cuentata qokurmi, kuyëllapa kënö nimarqan: ‘Qamqa alläpa valientim kanki’. Tsënö nimanqanmi yanapamarqan tsë mana alli rurëta dejanäpaq.

Mana alli mana sientikunäpaq juk ishkë versïculukunata leyipäramarmi, tsë rurëkanqä rakcha o qanra kanqanta alli entiendinäpaq versïculukunata leyipämarqan. Tsëpitanam juk fëchata nimarqan tsë junaqyaq warmiwan këta munar partïta mana yatapänäpaq. Peru tsë fëcha manaraq chämuptin tsëman ishkirqa, mana alli mana sientikunäpaqmi nimarqan. Y nimarqanmi yapëchöqa mas tiempupa tsarakunäpaq”. ¿Imanötan tsëqa Davidta yanaparqan? Kikinmi kënö nin: “Pasëkanqäta papänï musyanqanqa alläpam yanapamarqan”. c

QATEQNIN KAQ CAPÏTULUCHÖ

¿Rasumpaku wakinkuna niyanqannö piwampis oqllanakuyqa allilla?

[Nötakuna]

BIBLIACHÖ YACHAKUNQANTSIK

“Tsëmi jövinkuna munayanqampita cuidakuy, y limpiu shonqunkunawan Señorman confiakoqkunawan juntu, alli kaqta ruranëkipaq, markäkoq o yärakoq kanëkipaq, kuyakoq kanëkipaq y yamë kanëkipaq kallpachakuy” (2 Timoteu 2:22).

KËTA RURË

Warmiwan o ollquwan këta munënikita dominanëkipaq, Jehovä Diosnintsikta poderninta mañakuy (2 Corintius 4:7).

¿MUSYARQËKIKU?

Warmiwan o ollquwan këta munar imatapis rurëqa fäcil-llam. Peru alli juiciuyoq nunaqa, japallan këkarpis alli controlakuytam yachan.

¡RURAR QALLË!

¿Imatataq ruräman alli kaqkunallaman y limpiu kaqkunallaman pensanäpaq? ․․․․․

Alläpa warminar o ollqunarqa, ¿imatataq ruräman mana allikunaman mana ishkinäpaq? ․․․․․

Kë asuntupitaqa, ¿imatataq papänïta o mamänïta tapurïman? ․․․․․

Y QAMQA, ¿IMA NINKITAN?

● ¿Imanirtan alli kanman Jehovä “perdonakoq” kanqanman yarpänëki? (Salmus 86:5).

● Kikin Diosnintsikmi kamamarquntsik ollquwan o warmiwan munëyoq këta, y tsë munëta dominanëkipaqmi nishunki. Tsëqa, ¿manatsuraq tsë munëta dominanëkipaq kaqta musyarnin nikäshunki?

[Willakuy]

“Ollquwan këta munar partïta yatapëta dejanqäpitaqa, alli concienciayoqnam sientikü. Limpiu concienciayoq këqa manam imawampis igualantsu” (Sära).

[Fötu]

Juk carrërachö cörrikarqa ishkirirpis sharkurmi cörrir sïguinki. Tsënöllam warmiwan o ollquwan këta munar partikita yatapëman ishkishqa karqa, mas kallpachakur sïguinëki