Proverbius 22:1-29
22 Imëka riquëzayoq kanqantsikpitaqa, alli nuna kanqantsikpita reqimanqantsikmi mas alliqa.+
Pläta qellëyoq y öruyoq kanqantsikpitaqa, pïmëpis respetamanqantsikmi mas alliqa.
2 Rïcupis waktsapis igual-llam kayan,ishkantapis Teyta Jehovällam kamashqa.+
3 Alli pensëta yachaq nunaqa, ima peligruta rikarpis witikunmi,peru pensëta mana yachaq nunaqa, peligruta rikëkarpis manam witikuntsu, tsënöpam sufrin.*
4 Humildi kaq y Teyta Jehoväta respetaq* kaqqa bendiciontam chaskinqa,pïmëmi respetanqa y imëpis kawakunqam.+
5 Mana alli nunapa näninchöqa kasham junta këkan y mëtsika trampam kan,peru vïdanta kuyaq nunaqa tsëkunapitam witikun.+
6 Wamrëkita* llullullaraq kanqampita alli yachatsi,+alli yachatsiptikiqa awkinyarpis manam qonqanqatsu.+
7 Rïcu nunaqa, waktsa nunatam munanqanta ruratsin.
Y prestakoq nunaqa, prestaqnin nunapa sirweqninmi.+
8 Mana allikunata ruraq nunaqa kikinllam desgraciaman chanqa,+y cölerëpa mandakoq kënimpis ushakärinqam.+
9 Waktsakunata mikuynin qarëkoq alli nunaqa,bendiciontam chaskinqa.+
10 Imatapis mana entiendeq burlakoq nunata qarquri,qarquptikiqa manam pleytu,pelya ni insultanakuypis kanqanatsu.
11 Limpiu shonquyoq y shumaq parlakoq nunaqa,gobernantiwanmi amïgu kanqa.+
12 Teyta Jehoväqa rasumpa kaq imëyaqpis kanantam permitin,peru traicionëru nuna parlanqantaqa mana kaqpaqmi churarin.+
13 Qela nunaqa trabajaq ëwëta mana munarmi,“waqtachömi juk leon këkan, pläzapa pasëkaqtam mikuramanqa” nin.+
14 Lluta purikoq warmi* parlakunqanqa alläpa hondu pözunömi,+y Teyta Jehovä condenanqan nunaqa tsëmanmi ishkinqa.
15 Juk wamraqa,* wamra këninwanmi llutalla imatapis rurëta munan,+peru corregiyaptinqa* imatapis alli pensëkur rurëtam yachakunqa.+
16 Waktsakunata sakyar* rïcuyäkoq nuna,+y rïcukunata qarapaq nunaqa waktsam tikranqa.
17 Yachatsinqaqkunata alli entiendinëkipaqqa,+yachaq nunakuna parlayanqanta shumaq wiyakuy.+
18 Yachakunqëkikunata imëpis yarpaptikiqa alläpa kushikuypaqmi,+tsëmi yachakunqëkikunapita parlakunëkipaq imëpis listu këkanki.+
19 Qamtam kanan yachëkätseqTeyta Jehoväman confiakunëkipaq.
20 ¿Manaku qellqamurqöna consejarniki,yachatsirniki,
21 y rasumpa kaqllata y confiakuypaq kaqkunallata willarniki?
Tsëkunataqa qellqamurqö pï nunapis tapushuptiki rasumpa kaqllata willanëkipaqmi.*
22 Ama waktsa nunata, waktsa kanqampita suwapëtsu.+
Ama faltapakoq nunata markaman yëkuna punkunchö sufritsitsu.+
23 Teyta Jehovämi pëkunapa biennin yarqunqa,+y sakyapaq nunataqa wanutsinqam.
24 Ama mana alli geniuyoq nunakunawanqa juntakuytsu,imëpis cölerakoq nunakunawanqa ama juntakëtsu.
25 Pëkunawan juntakarqa, pëkuna rurayanqantam rurar qallëkunki,y trampaman ishkireqnömi kikikilla imëka mana alliman chärinki.+
26 Makinwan saludar-raq änikoqkunanöqa ama kankitsu.
Ama jukpa jaqanta pagakunampaq änikoqkunanöqa kankitsu.+
27 Pagakuyta mana puëdiptikiqa,cobrakurmi hasta pununqëki cämëkitapis apakuyanqa.
28 Unë kastëkikuna churayanqan lindërukunataama wititsinkitsu.+
29 ¿Rikarqunkiku imëkachöpis alli trabajaq nunata?
Tsë nunaqa manam lluta nunapa trabajaqnintsu kanqa,sinöqa gobernantikunapa trabajaqninmi kanqa.+
Nötakuna
^ O “castïguta chaskin”.
^ Hebreu idiömachöqa “mantsaq” ninmi. Rikäri “Bibliachö palabrakunata entiendinapaq” neqta.
^ O “Jövinnikita”.
^ Hebreu idiömachöqa “mana reqishqa” ninmi. Rikäri Proverbius 2:16 textupa nötanta.
^ O “jövinqa”.
^ Hebreu idiömachöqa “qarrutiwan corregi” ninmi. Rikäri “Bibliachö palabrakunata entiendinapaq” neqta.
^ O “engañar”.
^ Hebreu idiömachöqa “mandashoqnikita rasun kaqllata willanëkipaq” ninmi.
