Juan 12:1-50
12 Pascua Fiestapaq joqta junaq pishikaptinmi, Jesusqa Läzaru kawanqan Betaniaman+ charqan. Pëtam Jesusqa wanunqampita kawaritsimushqa karqan.
2 Tsëchömi cenatsiyarqan. Martam sirwipakur këkarqan,+ y Läzarunam wakinkunawan juntu Jesuswan cenëkarqan.
3 Tsënam Marïaqa imawampis mana takushqa nardupita rurashqa, mediu litrunö* alläpa cuestaq perfümita Jesuspa chakinman jichëkur aqtsanwan tsakitsipurqan, y tsë perfümiqa wayi juntam pukutärirqan o mushkuskirqan.+
4 Peru qateqninkunapita traicionanampaqna këkaq Jüdas Iscariötim+ kënö nirqan:
5 “¿Imanirtan tsë perfümita trescientus denariuchö* rantikuykur, tsë qellëta waktsakunata qarëkurquntsiktsu?”.
6 Rasumpa kaqchöqa, manam waktsakunapaq yarpachakurtsu tsëtaqa nirqan, sinöqa ladron karmi. Pëqa qellë cäjata katsirmi tsëman winayanqan qellëta suwakoq.
7 Tsënam Jesusqa nirqan: “Ama kë warmita ima niyëtsu. Pëqa pampashqa kanärëkurmi costumbri kanqanmannö cuerpüta alistëkan.+
8 Waktsakunaqa qamkunawanmi imëpis këkäyanqa,+ peru noqaqa manam llapan tiemputsu qamkunawan këkäshaq”.+
9 Tsëyaqnam mëtsikaq judïu nunakunaqa, Jesus Betaniachö këkanqanta musyëkur pëta rikaq shayämurqan, peru manam Jesusta rikaqllatsu, sinöqa wanunqampita kawaritsimunqan Läzarutawan rikaqmi.+
10 Tsëmi mandakoq sacerdötikunaqa, Läzarutapis wanutsiyänampaq yachatsinakuyarqan.
11 Tsëtaqa rurayarqan, mëtsikaq judïukuna tsëman ëwar Jesusman markäkur o yärakur qallëkuyaptinmi.+
12 Waränin junaqnam fiestaman ëwashqa mëtsikaq nunakuna musyaskiyarqan Jerusalenman Jesus chëkanqanta.
13 Tsëmi palmërakunapa rämankunata aparkur taripaq yarqamur fuertipa kënö niyarqan: “¡Salvëkunëkipaqmi rogakuyaq! ¡Bendicishqam Teyta Jehoväpa* jutinchö+ shamoq Israelpa Gobernaqnin!”.+
14 Mallwa ashnuta tarïkurmi Jesusqa tsëman montarqan,+ kënö nir qellqarëkanqannö:
15 “Ama mantsakäyëtsu, Sionpita nunakuna.* ¡Rikë! Gobernaqnikim mallwa ashnun montashqa shamuykan”.+
16 Qallananllachöqa manam qateqninkuna tsëkunata entiendiyarqantsu. Peru mas puëdeq këta Jesus chaskiriptinqa,+ tsëkuna pëpaq qellqashqa këkanqanta, y nunakuna tsëkunata rurayanqantam yarpäriyarqan.+
17 Sepultürapita yarqamunampaq mandar Läzaruta Jesus kawaritsimunqanta rikaq mëtsikaq nunakunaqa,+ tsë pasanqantam willakur këkäyarqan.+
18 Tsë milagruta rurashqa kanqanta wiyarmi, mëtsikaq nunakunapis pëwan tinkoq yarqayämurqan.
19 Tsëmi fariseukunaqa kikinkunapura kënö ninakuyarqan: “Rikäyanqëkinöpis noqantsikqa manam imatapis logrëkantsiktsu. ¡Rikäyë, llapan nunakunam pëpa qepanta ëwakuyashqa!”.+
20 Fiestachö Teyta Diosta adoraq ëwaqkunachömi, juk ishkë griëgu nunakunapis këkäyarqan.
21 Pëkunam Galilëa provinciachö Betsaida markapita Felïpiman+ witïkur, “Teytë, Jesustam rikëta munayä” nir rogayarqan.
22 Tsënam Felïpiqa Andresta willaq ëwarqan, y Andreswan Felïpinam Jesusta willaq ëwayarqan.
23 Peru Jesusqa kënömi nirqan: “Chämushqanam höra Nunapa Tsurin mas puëdeq këman churashqa kanampaq.+
24 Rasunllatam qamkunata nï,* trïgu muru allpaman shikwar mana ushakarqa,* juk murullam imëpis këkanqa. Peru ushakarqa,*+ mëtsikatam wayun.
25 Pï nunapis vïdanta alläpa kuyarqa, vïdantam ushakätsinqa,+ peru kanan witsan vïdanta chikeqqa, imëyaqpis kawëta chaskinampaqmi salvanqa.+
26 Pï nunapis sirwimëta munarqa, qepäta shamutsun, y mëchöpis këkanqächömi, sirwimaqnïpis këkanqa.+ Sirwimaq kaqtaqa, Teytam bendicinqa.
27 Kananqa alläpa llakishqam këkä,+ ¿ima nishaqraq? Teyta, kë mana aguantëpaq hörapita salvëkallämë.+ Tsënö kaptimpis, tsëpaqmi kë hörapaqqa shamurqö.
28 Teyta, jutikita respetatsillë”. Tsënam ciëlupita kënö nimunqan wiyakarqan:+ “Respetatsirqömi, y yapëmi respetatsishaq”.+
29 Tsëta wiyëkurnam tsëchö mëtsika nunakunaqa räyumushqa kanqanta niyarqan. Wakinnam, “juk angelmi parlapashqa” niyarqan.
30 Tsënam Jesusqa kënö nirqan: “Tsë parlamunqanqa manam noqarëkurtsu wiyakashqa, sinöqa qamkunarëkurmi.
31 Kananmi nunakuna* juzgashqa këkäyan; kananmi nunakunata gobernaq+ waqtaman qarqushqa kanqa.+
32 Tsënö kaptimpis, qeruman warkushqa kariptïqa,+ tukuyläya nunakunanam noqaman witiyämunqa”.
33 Tsënöqa nirqan, imanö wanunampaq o wañunampaq kaqta musyatsikurmi.+
34 Tsënam tsëchö mëtsika nunakunaqa kënö niyarqan: “Noqakunaqa allim musyayä, Cristu imëyaqpis kawanampaq kaqta+ Leychö ninqanta. Tsëqa, ¿imanirtan qamqa ninki Nunapa Tsurin qeruman warkushqa kanampaq kaqta?+ ¿Mëqan Nunapa Tsurimpaqtan parlëkanki?”.
35 Tsënö niyaptinnam Jesusqa pëkunata kënö nirqan: “Aktsiqa ichik mas tiempuran qamkunachö kanqa. Ampi o tsakë* mana venciyäshunëkipaq, aktsi qamkunachö këkanqanyaq puriyë; ampichö pureqqa, manam mëta ëwanqanta musyantsu.+
36 Aktsi qamkunachö këkanqanyaqqa, aktsipa tsurinkuna kayänëkipaq, aktsiman markäkuyë o yärakuyë”.+
Tsëkunata nirirnam Jesusqa ëwakur pëkunapita ratakurqan o tsinkakurqan.
37 Puntankunachö mëtsika milagrukunata rurashqa këkaptimpis, pëkunapa manam pëman markäkuyarqantsu o yärakuyarqantsu.
38 Tsënöqa pasarqan, Diospa willakoqnin Isaïas kënö ninqan cumplikänampaqmi: “Teyta Jehovä,* ¿pitan markäkushqa o yärakushqa noqakuna willakuyanqäman?+ ¿Pitataq Teyta Jehoväqa* puëdeq kanqanta musyatsishqa?”.+
39 Imanir mana creikuyanqampaqpis Isaïasqa kënömi nirqan:
40 “Nawinkunatam wichqapushqa y shonqunkunatam chukruyätsipushqa,* tsënöpa nawinkuna mana rikänampaq, shonqunkuna mana entiendikoq kanampaq, Teyta Diosman mana kutiyämunampaq y mana alliyätsinäpaq”.+
41 Alläpa väleq carguman churashqa kanqanta rikarmi, Isaïasqa pëpaq tsëkunata parlarqan.+
42 Tsënö kaptimpis, judïukunapa gobernadorninkunapis atskaqmi pëman markäkuyarqan o yärakuyarqan,+ peru Diosta adorayänan wayipita fariseukuna qarquyänanta mantsarmi tsëtaqa rikätsikuyaqtsu.+
43 Pëkunaqa Diospa rikëninchö alli këta ashiyänampa rantinmi, nunakunapa rikëninchö alli këta masqa ashiyaq.+
44 Tsënö kaptimpis, Jesusqa fuertipam kënö nirqan: “Noqaman markäkoqqa o yärakoqqa, manam noqallamantsu markäkun, sinöqa mandamaqnïmampis yärakuykanmi;+
45 y noqata rikämaqqa, mandamaqnïtapis rikëkanmi.+
46 Noqaqa aktsinömi nunakunaman shamurqö,+ noqaman markäkoqkuna o yärakoqkuna ampichö o tsakëchö* mana kayänampaq.+
47 Peru ninqäkunata wiyëkar mana cumpleq kaqtaqa, manam juzgätsu. Noqaqa manam nunakunata juzgaqtsu shamurqö, sinöqa salvaqmi.+
48 Noqata mana chaskimaqta y ninqäkunata mana chaskikoqtaqa, noqa ninqäkunam ushanan kaq junaqchö juzganqa.
49 Noqaqa manam kikïllapitatsu parlarqö, sinöqa kikin mandamaqnï Teytam, imata ninäpaq y imata parlanäpaq kaqta nimashqa.+
50 Musyämi pë mandakunqankunaqa imëyaqpis kawëman chätsikunqanta.+ Tsëmi imatapis parlarqa, Teyta nimanqantanölla parlä”.+
Nötakuna
^ O “1 libra”. Tsënö nirqa, Röma nacionchö utilizäyanqan librapaqmi parlëkan. Tsëqa 327 grämusnömi kaq. Rikäri “Masllata musyanapaq” neqchö B14 kaqta.
^ O “Sionpa warmi wamran”.
^ Kënöpis niyanmi: niyaq.
^ Griëgu idiömachöqa “wanurqa” ninmi.
^ Griëgu idiömachöqa “wanurqa” ninmi.
^ Tsënö nirqa, Diosta mana sirweq nunakunapaqmi parlëkan.
^ Kënöpis niyanmi: Tutapë.
^ O “mana cäsukoqta tikratsishqa”.
^ Kënöpis niyanmi: tutapëchö.
