Apocalipsis 21:1-27
21 Tsënam mushoq ciëluta y mushoq patsata rikarqä;+ unë kaq ciëluqa y unë kaq patsaqa manam karqannatsu,+ y lamarpis+ manam karqannatsu.
2 Tsënöllam sagrädu markata, awmi, Mushoq Jerusalenta Teyta Dios këkanqampita, awmi, ciëlupita urëkämoqta rikarqä.+ Y qowampaq o runampaq* listu këkaq adornashqa novianömi këkarqan.+
3 Tsëpitanam gobernar täkunapita fuertipa kënö neqta wiyarqä: “¡Rikë! Teyta Diospa carpa* wayinmi nunakunawan këkan. Pëmi pëkunawan kawanqa, y pëkunam sirweqninkuna kayanqa. Kikin Teyta Diosmi pëkunawan këkanqa.+
4 Y nawinkunapitam llapan weqita limpianqa,+ y nunakunaqa manam wanuyanqanatsu o wañuyanqanatsu,+ llakikuyanqannatsu, waqayanqanatsu ni nanatsikuyanqanatsu.+ ¡Teyta Diosmi llapan sufritsimanqantsik kaqkunata ushakätsinqa!”.
5 Gobernar täkunachö jamarëkaqmi kënö nirqan:+ “¡Rikë! Llapan imëkatam mushoqta rurëkä”.+ Kënöpis nirqanmi: “Tsë ninqäkunata qellqë, tsëkunaqa confiakuypaqmi y rasumpa kaqllam”.
6 Y kënömi nimarqan: “¡Tsë ninqäkunaqa cumplikärishqanam! Noqam Alfa y Omëga* kä, qallanan y ushanan.+ Llapan yakunaq kaqtaqa, kawatsikoq yakuyoq pukyuchö* yakutam debaldilla qarashaq.+
7 Llapan venceq kaqmi tsëkunata chaskinqa, y noqam Diosnin kashaq, y pëmi tsurï kanqa.
8 Peru cobardi kaqkuna, mana markäkoq o yärakoq kaqkuna,+ mana limpiu kaqkuna, melanëpaqkunata ruraqkuna, asesïnukuna,+ oqllanakur melanëpaqkunata ruraqkuna,*+ brujerïata ruraqkuna, santukunata adoraqkuna y llapan ulikoq o llullakoq+ kaqkunaqa, ishkë kaq wanuyta rikätsikoq,+ ninawan y azufriwan rawrëkaq o lunyëkaq qochamanmi jitashqa kayanqa”.+
9 Ultimu qanchis castïgukunata qanchis tazonkunachö katseq qanchis angelkunapita+ juk kaq shamurmi, kënö nimarqan: “Shamuy, noviata, awmi, Orqu* Üshapa warmintam rikätsishqëki”.+
10 Tsëmi santu espïritupa poderninwan jatun altu jirkaman apamarqan, y Teyta Dios këkanqampita, awmi, ciëlupita urëkämoq Jerusalen sagrädu markatam rikätsimarqan,+
11 y Teyta Diosnömi chipaparqan.+ Chipapanqanqa alläpa shumaq ruminö, awmi, vidriunö cläru chipapaq jaspi ruminömi karqan.+
12 Jatun altu murällayoqmi karqan, y döci punkukunachömi döci angelkuna karqan, y tsë punkukunachömi Israelchö döci kastakunapa* jutinkuna qellqarëkarqan.
13 Inti o rupay yarqamunan läduchömi kima punku karqan, norti läduchönam kima punku, sur läduchönam kima punku y inti jeqanan läduchönam kima punku karqan.+
14 Manam tsëllatsu, tsë markapa murällampa cimientuchöqa döci rumikunam karqan, y tsë rumikunachömi Orqu* Üshapa döci apostolninkunapa döci+ jutinkuna këkarqan.
15 Noqawan parlëkaqqa markata, punkukunata y murällata medinampaqmi, örupita medina shoqushta katsirqan.+
16 Tsë markaqa cuadrädum karqan, y largumpis y anchumpis igualmi karqan. Pëqa shoqushwanmi tsë markata medirqan: dos mil doscientus veinti kilömetrustanö;* largun, anchun y altumpis igualmi karqan.
17 Tsënöllam murällatapis medirqan: sesenta y cuatru metrustanö,* nunakuna utilizäyanqan medïdanmannö, y tsënöllam angelkuna utilizäyanqan medïdapis.
18 Murällaqa jaspi rumipitam karqan,+ y markaqa alli kaq örupita karmi vidriunö cläru karqan.
19 Markapa murällampa cimientunqa, tukuyläya shumaq rumikunawanmi adornashqa këkarqan: punta kaq cimientuqa jaspi rumim karqan, ishkë kaqnam zafïru rumi karqan, kima kaqnam calcedonia rumi karqan, chusku kaqnam esmeralda rumi karqan,
20 pitsqa kaqnam sardönica rumi karqan, joqta kaqnam sardiu rumi karqan, qanchis kaqnam crisölitu rumi karqan, puwaq kaqnam berïlu rumi karqan, isqun kaqnam topaciu rumi karqan, chunka kaqnam crisopräsa rumi karqan, onci kaqnam jacintu rumi karqan y döci kaqnam amatista rumi karqan.
21 Manam tsëllatsu, döci punkunkunapis döci perlaskunam karqan; cada punkum juk perlaspita rurashqa karqan. Y tsë markapa mas reqishqa cällinqa, alli kaq örupita karmi vidriunö cläru rikakoq.
22 Manam tsëchöqa templuta rikarqätsu. Llapanta Puëdeq+ Jehovä* Dios y Orqu* Üsham templun kayan.
23 Tsë markaqa manam inti o rupay o killa aktsinanta wanantsu.* Teyta Dios chipapanqanmi aktsin,+ y Orqu* Üsham chiwchin.+
24 Nacionkunaqa tsë aktsiwanmi puriyanqa, y patsachö gobernaqkunam chipapaq kayanqanta+ tsëman apayanqa.
25 Tsëchö mana paqas kaptinmi, punkunkunata entëru junaq wichqayanqatsu.+
26 Y tsëmanmi nacionkuna chipapaq kayanqanta y respetashqa kayanqanta apayanqa.+
27 Tsëmanqa pikuna kawayänampaq kaqta rikätsikoq, Orqu* Üshapa librunchö jutinkuna qellqaraq kaqllam yëkuyanqa.+ Peru imapis mana limpiu kaq, y melanëpaqkunata ruraq y engañakoq nunaqa, manam tsëman imëpis yëkunqatsu.+
Nötakuna
^ Kënöpis niyanmi: ollqumpaq.
^ Kënöpis niyanmi: toldu.
^ O “yaku pashtaqchö”.
^ O “A y Z”. Alfa y Omëgaqa griëgu idiömachö abecedariupa qallanan y ultimu letranmi kayan.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Kënöpis niyanmi: Mächu.
^ O “Israelpa tsurinkunapita yarqoq 12 kastakunapa”.
^ Kënöpis niyanmi: Mächu.
^ Griëgu idiömachöqa “12.000 estadius” ninmi. Juk estadiuqa 185 metrusmi karqan. Rikäri “Masllata musyanapaq” neqchö B14 kaqta.
^ Griëgu idiömachöqa “144 cödus” ninmi. Rikäri “Masllata musyanapaq” neqchö B14 kaqta.
^ Kënöpis niyanmi: Mächu.
^ Kënöpis niyanmi: necesitantsu.
^ Kënöpis niyanmi: Mächu.
^ Kënöpis niyanmi: Mächu.
