Romänus 6:1-23
6 Tsëqa, ¿ima nishuntan? ¿Teyta Dios alläpa alli kanqan mas rikakunampaqtsuraq jutsata* rurar këkäshun?
2 ¡Manam tsënötsu! Jutsa* rurëpaq wanushqana këkarqa,+ ¿imanötan jutsata rurar këkashwan?+
3 ¿O manaku musyayanki bautizakushqa kar Cristu Jesuswan+ juknölla këkaqkuna, wanunqanchöpis pëwan juknölla këkänapaq bautizakushqa kanqantsikta?+
4 Tsëmi wanunqanchö o wañunqanchö bautizakur+ pëwan juntu pampashqa karquntsik, tsënöpa Teyta Diospa poderninwan wanushqampita Cristu kawatsimushqa kanqannölla, noqantsikpis jukläya kawëyoq kanapaq.+
5 Pë wanunqannölla wanur pëwan juknölla këkarqa,+ pë kawarinqannö kawarimurpis pëwanmi juknölla kashun.+
6 Musyantsikmi unë imanö kanqantsikqa pëwan juntu qeruchö clavashqa kanqanta,+ tsënöpa jutsata* ruraq cuerpuntsik kallpannaq tikraptin,+ jutsapa esclävun këta dejanapaq.+
7 Awmi, wanukoq o wañukoq kaqqa, jutsata* ruranqampitam perdonashqana* quedarin.
8 Manam tsëllatsu, Cristuwan wanushqa këkarqa, pëwan kawanapaq kaqmampis creintsikmi.
9 Musyantsikmi wanushqampita sharkatsimushqa kanqampitaqa,+ Cristu manana wanunampaq kaqta.+ Awmi, pëqa manam patronnö kaq wanuypa makinchönatsu këkan.
10 Pëqa jutsata* ushakätsinampaqmi, imëyaqpis kanampaq juk kutilla wanurqan,+ peru kananqa Teyta Dios munanqanta rurarmi kawëkan.
11 Tsënölla qamkunapis jutsapaq* wanushqanö kayë, peru Cristu Jesusrëkur Teyta Diospaq kawëkaqnö kayë.+
12 Tsëmi munanqanta rurar mana kayänëkipaq,+ wanoqlla cuerpuykikunachö jutsa* rurë dominayäshunëkita* permitiyëtsu.
13 Ama mana allita rurayänëkipaq cuerpuykikunata jutsata* entregayëtsu, tsëpa rantinqa wanushqanö këkäyanqëkipita kawëman kutimushqanö, Teyta Diospa makinman churakäyë y alli kaqta rurayänëkipaq Diospa makinman cuerpuykikunata entregayë.+
14 Qamkunaqa manam leypa makinchötsu këkäyanki,+ sinöqa Teyta Diospa alläpa alli këninchömi,+ tsëmi jutsaqa* patronnikikunatsu kanan.
15 Tsëqa, ¿leypa makinchö mana kar, sinöqa Diospa alläpa alli këninchö kartsuraq jutsata* rurashun?+ ¡Manam tsënötsu!
16 ¿Manaku musyayanki pipapis cäsukoq esclävun kayänëkipaq churakarqa, cäsukuyanqëkipa esclävun tikrayanqëkita,+ wanuyman+ chätsikoq jutsapa* kar+ o allita rurëman chätsikoq cäsukoq këpa karpis?
17 Peru Diostam agradecikuyä jutsapa* esclävun kashqa karpis, Teyta Dios yachatsiyäshunqëkita llapan shonquykikunawan cäsukuyanqëkipita.
18 Awmi, jutsapita* salvakushqa karmi,+ kananqa alli kaq rurëkunapa sirweqnin tikrayarqunki.+
19 Jutsasapa* karnin pishipäyaptikim nunakuna parlayanqannö qamkunata parlapëkäyaq.* Mana alli kaqta rurayänëkipaq, melanëpaq rurëkunapa y mana alli rurëkunapa esclävun kanampaq cuerpuykikunachö kaqkunata entregayanqëkinölla, kananqa Teyta Diosta kushitsinqanta rurayänëkipaq, alli rurëkunapa sirweqnin kanampaq cuerpuykikunachö kaqkunata entregayë.+
20 Jutsapa* esclävun karqa, alli kaqta rurëpitam libri kayarqëki.
21 Tsëqa, ¿imamantan chätsiyäshurqëki tsë witsan rurayanqëkikuna? Tsëkunata rurë wanuyman chätsikuptinmi, kananqa tsëkunata rurayanqëkipita penqakuyanki.+
22 Tsënö kaptimpis, jutsa* rurëpita libri tikrar Diospa sirweqninna karmi, kananqa limpiu nuna këman chätsikoq rurëkunata rurëkäyanki+ y tsëkunata rurarqa imëyaqpis kawëtam tariyanki.+
23 Jutsa* rurëpita päguqa wanuymi o wañuymi,+ peru Diospita chaskinqantsik qarëqa, Señornintsik Cristu Jesusrëkur+ imëyaqpis kawëmi.+
Nötakuna
^ Kënöpis niyanmi: pecäduta.
^ Kënöpis niyanmi: Pecädu.
^ Kënöpis niyanmi: pecäduta.
^ Kënöpis niyanmi: pecäduta.
^ O “librina”.
^ Kënöpis niyanmi: pecäduta.
^ Kënöpis niyanmi: pecädupaq.
^ Kënöpis niyanmi: pecädu.
^ Griëgu idiömachöqa “gobernayäshunëkita” ninmi.
^ Kënöpis niyanmi: pecäduta.
^ Kënöpis niyanmi: pecäduqa.
^ Kënöpis niyanmi: pecäduta.
^ Kënöpis niyanmi: pecädupa.
^ Kënöpis niyanmi: pecädupa.
^ Kënöpis niyanmi: pecädupita.
^ Kënöpis niyanmi: Pecädu ruraq.
^ Kënöpis niyanmi: parlapëkä.
^ Kënöpis niyanmi: Pecädupa.
^ Kënöpis niyanmi: pecädu.
^ Kënöpis niyanmi: Pecädu.
