Hëchus 4:1-37
4 Nunakunata ishkan parlapëkäyaptinnam, mandakoq sacerdötikuna, templuchö soldädukunata mandaq y saduceukunaqa, pëkunaman witiyarqan.+
2 Apostolkuna nunakunata yachatsiyaptin, y wanunqampita o wañunqampita Jesus kawarimunqanta cläru willakuyaptinmi, pëkunaqa cölerashqa këkäyarqan.+
3 Tsëmi paqas hörana kaptin, prësur waränin junaqyaq carcelchö katsiyarqan.+
4 Tsënö kaptimpis, pëkuna yachatsikuyanqanta wiyaqkunaqa, atskaqmi creikoq tikrayarqan, y ollqukunaqa cincu milnömi kayarqan.+
5 Waränin junaqnam, gobernadorninkuna, markachö dirigeqkuna y Ley qellqaqkunaqa Jerusalenchö juntakäyarqan.
6 Tsëchömi mandakoq sacerdöti Anas,+ Caifas,+ Juan, Alejandru y mandakoq sacerdötipa llapan kastankunapis këkäyarqan.
7 Pëkunam Pëdrutawan Juanta shëkatsir,* “¿ima poderwantan o pipa jutinchötan tsëta rurayarqunki?” nir tapupar qallëkuyarqan.
8 Tsënam Pëdruqa santu espïrituta chaskir+ pëkunata kënö nirqan:
“Israelchö gobernadorkuna y markachö dirigeqkuna,
9 qamkunaqa lisiädu nunapaq allita rurayanqäpitam kanan junaq tapupäyämanki,+ y kë nunata pï alliyätsishqa kanqantam musyëta munayanki.
10 Tsëqa, llapëki y llapan Israel nunakuna musyayë, Nazaretpita Jesucristupa+ jutinchö alliyanqanta. Pëtam qamkunaqa qeruchö wanutsiyarqëki,+ peru Teyta Diosqa wanunqampitam kawaritsimushqa.+ Përëkurmi kë nunaqa puntëkikunachö sänuna këkan.
11 Pëmi, ‘qamkuna albañilkuna mana väleqtanö rikar jitariyanqëki rumi, y pëmi esquïnachö ëwaq maestra rumi tikrashqa’.+
12 Salvamänantsikrëkur nunakunapita Teyta Dios akranqan jutipita masqa manam kë patsachö kantsu,+ tsëmi jukchöqa ni pichöpis salvacion kantsu”.+
13 Pëdruwan Juan mana mantsakur* parlayanqanta rikar y lluta nunakunalla y mana alläpa estudiashqa kayanqanta* cuentata qokurmi,+ alläpa espantakuyarqan. Y Jesuswan puriyashqa kayanqantam cuentata qokuyarqan.+
14 Peru alliyashqa nunata pëkunawan këkaqta rikarmi,+ ima nitapis puëdiyarqantsu.+
15 Tsëmi Judïukunapa Jatun Cortimpa sälampita yarquyänampaq nïkur, kikinkunapura parlar qallëkuyarqan,
16 y kënömi niyaq: “¿Imataraq kë nunakunawan rurashun?+ Jerusalenchö llapan nunakunam musyayan alläpa espantëpaq milagruta rurayanqanta,+ tsëtaqa manam neguëta puëdintsiktsu.
17 Tsëmi tsë pasanqampita mas nunakuna mana musyayänampaq, tsë nunapa jutinchö pitapis mana parlapäyänampaq mantsakätsir cläru nishun”.+
18 Tsëpitanam qayëkurnin Jesuspa jutinchö mana parlayänampaq ni yachatsikuyänampaq mandayarqan.
19 Tsëta contestarnam Pëdruwan Juanqa niyarqan: “Teyta Diosta cäsukuyänäpa rantin qamkunata cäsukuyänä, Diospa rikëninchö alli kanqanta pensayaptikiqa, tsëqa qamkunapitanam.
20 Peru noqakunaqa manam rikäyanqäpita ni wiyayanqäpita parlëta dejëta puëdiyätsu”.+
21 Tsëmi castigayänampaq imatapis mana tarir y nunakunata mantsar+ libri dejayarqan. Nunakunaqa tsë pasanqampitam Teyta Diosta alabar këkäyarqan.
22 Tsë milagruta rurar alliyätsiyanqan nunaqa, cuarenta watapitapis masyoqnam karqan.
23 Librina yarqurqa Jesuspa wakin qateqninkuna këkäyanqanman ëwarmi, mandakoq sacerdötikuna y markachö dirigeqkuna niyanqanta willayarqan.
24 Tsëta wiyëkurnam llapankuna juntu Teyta Diosman mañakur kënö niyarqan:
“Llapanta Gobernaq Teyta, qammi ciëluta, patsata, lamarta y tsëchö kaqkunata rurarqunki,+
25 y qammi santu espïrituykiwan sirwishoqniki unë awilükuna Davidwan+ kënö nirqëki: ‘¿Imanirtan mëtsë nacion nunakunaqa wakpa këpa purikachäyarqan? ¿Imanirtan mëtsë markachö nunakuna mana kaqkunata rurayänampaq pensayarqan?
26 Jehovä* Dioswan y akranqan nunawan* guërrata rurayänampaqmi, patsachö llapan gobernantikuna alistakuyarqan, y gobernaqkunam willanakur juntakäyarqan’.+
27 Tsënömi pasarqan, Herödiswan Ponciu Pilätum,+ juk nacionkunapita y Israelpita nunakunawan, qam akranqëki limpiu sirwishoqniki Jesuspa contran kë markachö juntakäyarqan.+
28 Tsëqa pasarqan podernikiwan munanqëki rurakänanta permitiptikim.+
29 Kananqa Teyta Jehovä,* mantsakätsiyämar niyämanqanta wiyëkullë y yanapëkayämë mana mantsakur qampa palabrëkipita parlar sïguiyänäpaq.
30 Tsëyaqqa nunakunata alliyätsir, y limpiu sirwishoqniki Jesuspa jutinchö+ milagrukunata y imëka espantëpaqkunata+ rurar podernikita rikätsikuy”.
31 Llapan shonqunkunawan mañakur* ushariyaptinnam, juntarëkäyanqan sitiu fuertipa kuyurqan y llapankuna santu espïrituta chaskirmi+ Teyta Diospa palabrampita mana mantsakurna willakur qallëkuyarqan.+
32 Llapan creikoqkunam juk shonqulla y juk yarpëlla kayarqan, y manam mëqampis nirqantsu kapunqankuna kikimpa kanqanta, sinöqa imëkankunatam rakipänakuyaq.+
33 Apostolkunapis Señor Jesus kawarimunqanta cläru musyatsikurmi këkäyarqan+ y Teyta Diosqa llapankunatam bendicirqan.
34 Pëkunachöqa manam mëqampis imata pishipakoqtsu.+ Llapan chakrayoq o wayikunayoq kaqkunam, tsëkunata rantikuykur chaskiyanqan qellëta apayaq
35 apostolkunata entregayänampaq.+ Tsëpitanam cada ünuta wananqanmannö* rakipuyaq.+
36 Tsëmi apostolkuna, Bernabë+ (tsëqa “wakinkunata shumaq yanapaq” ninanmi) nir reqiyanqan Chiprichö yureq Levïpa kastan Josëpis,
37 chakranta rantikuykur, tsë qellëta apar apostolkunata entregarqan.+
Nötakuna
^ Kënöpis niyanmi: ichïkatsir.
^ O “alli cläru”.
^ Tsënö nirqa, pushakoq religiösukunapa escuëlankunachö mana estudiashqa kayanqantam nikan, manam mana estudiashqa kayanqantatsu.
^ O “Cristunwan”.
^ O “rogakur”.
^ Kënöpis niyanmi: necesitanqanmannö.
