2 Corintius 7:1-16
7 Tsëmi kuyë wawqikuna y panikuna, tsëkunata änimashqantsik këkaptinqa,+ cuerpuntsikta y imanö pensanqantsikta mana limpiu tikratseqkunapita limpiakushun,+ tsënöpa Teyta Diosta respetar pëpa rikëninchö mas limpiu kanapaq.
2 Noqakunapaq shonquykikunachö kuyakuy kananta permitiyë.+ Noqakunaqa manam pitapis mana alli tratayarqötsu, manam pitapis mana alliman chätsiyarqötsu y manam mëqan nunapita provechakuyarqötsu.+
3 Këtaqa manam condenayänaqpaqtsu niyaq. Puntata niyanqaqnöpis, juntu wanunapaq o juntu kawanapaqpis, qamkunaqa shonqükunachömi këkäyanqëki.
4 Qamkunataqa clärum parlapäyaq.* Qamkunapitaqa alläpam alabakü. Imëka sufrimientukunapa pasëkäyaptikipis, shumaq shoqashqa y alläpa kushishqam këkä.+
5 Macedoniaman+ charqa manam yamë këta tariyarqätsu, tsëpa rantinqa, imëka mas sufrimientukunapam pasayarqä: waqtachömi pelyakuna karqan y rurichönam mantsakur këkäyarqan.
6 Peru llakishqa këkaqkunata shoqaq Teyta Diosmi,+ Tïtu noqakunaman shamunqanwan shoqayämarqan.
7 Manam noqakunaman shamunqanllawantsu, sinöqa qamkuna pëta shoqayanqëkiwampis. Pëqa rikäyämëta munayanqëkita, alläpa llakikuyanqëkita y noqapaq alläpa yarpachakuyanqëkitam willayämarqan y tsëkunam masraq kushitsiyämarqan.
8 Tsëmi cartäwan qamkunata llakitsishqa karpis+ llakikütsu. Peru wallka tiempullapa karpis, tsë carta llakitsiyäshunqëkita rikarmi qallananchöqa llakikurqä,
9 peru kananqa kushikümi, manam qamkunata llakitsinqäpitatsu, sinöqa llakikuyanqëki arrepentikuyänëkipaq yanapayäshunqëkipitam. Qamkunaqa Teyta Diospa rikëninchö alli kanqanmannö llakikurmi, noqakunarëkur ima mana allitapis sufriyarqunkitsu.
10 Teyta Diospa rikëninchö alli kanqanmannö llakikuyqa, arrepentikur salvacionta tarinapaqmi yanapakun, tsëpitaqa manam ni pï nunapis llakikuntsu,+ peru kë munduchö nunakuna llakikuyanqanqa wanuymanmi chätsikun.
11 ¡Rikäyë Diospa rikëninchö alli kanqanmannö llakikuyanqëki imanö yanapayäshunqëkita! Tsënö llakikuyanqëkiqa yanapayäshurqunki, yapë qamkunapita allita parlayänampaq, mana allita rurayanqëkipita llakikuyänëkipaq, Teyta Diosta respetayänëkipaq, imatapis llapan shonquykikunawan rurëta munayänëkipaq, imatapis gänas gänaslla rurayänëkipaq y mana allikunata rurayanqëkita corregiyänëkipaqmi.+ Tsëkunachöqa, llapanchömi culpannaq* kayanqëkita rikätsikuyarqunki.
12 Manam mana allita ruraqrëkurtsu ni tsë mana allita sufreqrëkurtsu qamkunaman qellqamurqä,+ sinöqa qamkunachöpis y Teyta Diospa rikëninchöpis, niyanqaqkunata cäsukuyänëkipaq kallpachakuyanqëki cläru kanampaqmi.
13 Tsëmi alli shoqayämashqa.
Peru kikïkuna shoqashqa karpis, kallpayoq kanampaq llapëki yanapashqa kayaptiki Tïtu kushishqa kanqanmi, masraq kushitsiyämashqa.
14 Pëchö qamkunapita alabakushqa karpis, manam penqakushqatsu usharqö. Qamkunapita niyanqäkuna rasumpa kanqannöllam, qamkunapita alabakur Tïtuchö parlayanqäpis rasumpa kaqlla kashqa.
15 Manam tsëllatsu, llapëki cäsukoq kayanqëkita y alläpa respëtuwan chaskiyanqëkita yarparmi, qamkunata masraq kuyayäshunki.+
16 Imëkachö qamkunaman confiakuyta puëdinqäpitam* alläpa kushikü.
Nötakuna
^ Kënöpis niyanmi: parlapä.
^ O “limpiu; jutsannaq”.
^ O capazchi “qamkunarëkur kallpayoq kanqäpitam”.
