2 Pëdru 3:1-18
3 Kuyashqa wawqikuna y panikuna, kananwanqa ishkë kutinam qamkunaman cartakamü, y puntatanöllam cläru pensayänëkipaq yarpätsiyarniki qamkunata yanapëkäyaq.*+
2 Tsëtaqa rurëkä Teyta Diospa limpiu willakoqninkuna puntallapitana niyanqankunata,* y qamkunachö apostolkunawan Señor y Salvakoq mandayäshunqëkita yarpäyänëkipaqmi.
3 Këta musyayë, ushanan tiempuchöqa alli kaqpita burlakoq nunakunam kayanqa, y munayanqannö mana allikunata rurarmi+
4 kënö niyanqa: “¿Imëtan pë këkämunampaq änikunqan tiempu chämunqa?+ Unë awiluntsikkuna wanukuyanqan witsampitaqa, Teyta Dios nunakunata kamanqan witsanchönöllam llapan imëkapis kananyaq igual këkan”.+
5 Pëkunaqa kikinkuna munarmi këkunata ardëpa* mana kaqpaq churayan: Teyta Dios parlanqanrëkur unë witsanchö ciëlukuna, y yakupita rakishqa y yakupa chowpinchö* alli patsakashqa patsa kanqanta,+
6 y tsëkunawan entëru patsata yaku tsapariptinmi, tsë witsanchö mana cäsukoq nunakunaqa ushakäyarqan.+
7 Teyta Dios tsëta parlanqanrëkurmi, kanan witsan ciëlukuna y patsapis ninawan ushakänampaq këkan, y juiciu junaqpaq y Diosta mana respetaq nunakuna ushakäyänan junaqpaqmi këkäyan.+
8 Tsënö kaptimpis, kuyashqa wawqikuna y panikuna, ama këta qonqëkuyëtsu: Jehovä* Diospaqqa juk junaqmi mil watanö, y mil watanam juk junaqnölla.+
9 Teyta Jehoväqa* manam wakin nunakuna pensayanqannötsu änikunqanta cumplita demorëkan,+ sinöqa mana ni pï ushakänanta munar y llapankuna arrepentikuyänanta munarmi, qamkunawan pacienciakur këkan.+
10 Tsënö kaptimpis, Teyta Jehovä* nunakunata juzganan mantsakëpaq tiempuqa+ suwakoq nunanömi shamunqa.+ Tsë junaqqa alläpa büllarmi ciëlukuna juklla ushakäyanqa,+ y alläpa achacharmi patsachö y ciëluchö kaqkunapis tsullur ushakanqa, y patsachö y tsëchö llapan kaqkunam ninawan ushakäyanqa.+
11 Tsë llapan tsënö tsullur ushakänan këkaptinqa, ¡imanö nuna kayänëkipaq kaqman pensayë! Alli portakur y llapan shonquykikunawan Teyta Diosta sirwir këkäyë,
12 Teyta Jehovä*+ nunakunata juzganan mantsakëpaq tiempu chämunanta alkäbu alkäbu shuyarar. Tsëchömi ciëlukunaqa ninawan ushakäyanqa,+ y llapan achachashqa këkaqmi tsullur ushakanqa.
13 Peru noqantsikqa, Teyta Dios änimanqantsiknömi mushoq ciëlukunata y mushoq patsata shuyarëkantsik,+ y tsëchöqa alli kaqta rurarllanam kawayanqa.+
14 Tsëqa kuyashqa wawqikuna y panikuna, tsëkunata shuyëkarninqa llapan puëdiyanqëkimannö kallpachakuyë, limpiuta, llapanchö alli portakuykaqta y yamë këkaqta Teyta Dios tariyäshunëkipaq.+
15 Manam tsëllatsu, Señornintsikpa paciencianqa salvakunapaq kanqanta yarpäyë, Teyta Diospita yachëta chaskishqa karnin, kuyë wawqi Pablupis, qamkunaman qellqamunqannö.+
16 Pëqa llapan cartanchömi tsëkunapaq parlarqan. Tsënö kaptimpis, tsë cartankunachö wakin wakinqa manam fäcil entiendinantsu. Tsëkunatam mana estudiashqakuna y markäkuyanqanchö o yärakuyanqanchö mana allinö këkaqkunaqa, wakin Qellqarëkaqkunawan rurayanqannölla jukmampa tumatsiyan, y tsërëkurmi kikinkuna ushakäyanqa.
17 Tsëmi kuyashqa wawqikuna y panikuna, puntallapitana tsëkunata musyëkarqa, leyta mana cäsukoq* nunakuna engañayäshurniki mana rakikätsiyäshunëkipaq y alli kaqchö tsarakuyta mana dejayänëkipaq imëpis cuidakuyë.+
18 Awmi, Señornintsik y Salvamaqnintsik Jesucristu masraq qamkunawan alli këkutsun, y pëpita mas yachakur këkäyë. Kanan y imëyaqpis alabashqa këkutsun. Tsënö kallätsun.*
Nötakuna
^ Kënöpis niyanmi: yanapëkä.
^ O “willakuyanqankunata”.
^ Kënöpis niyanmi: yaptalla.
^ Kënöpis niyanmi: pullanninchö.
^ O “mana allita ruraq”.
^ O “Amen”.
