KʼUTUNEM 35
BʼIXONEM 123 Rukʼ sukʼilal chojniman che ri utinamit ri Dios
¿Jas kqabʼan che kitoʼik ri e esam bʼi pa ri congregación?
«Kʼo na kikotemal chilaʼ chikaj rumal rech jun ajmak ri kukʼex ukʼuʼx, chkiwach ri jumuchʼ bʼelejlajuj [99] sukʼ, ri man rajawaxik taj ukʼexik kikʼuʼx» (LUC. 15:7).
KYAʼ UBʼIXIK
¿Jasche jujun mul rajawaxik keʼesax bʼi jujun winaq pa ri congregación y jas tobʼanik kkiya ri kʼamal taq bʼe chke rech kkibʼan arrepentir kibʼ y kkibʼan chi jumul ramigo ri Jehová?
1, 2. a) ¿Jas kuchomaj ri Jehová chrij ri winaq che kubʼan jun makaj y kubʼan ta arrepentir ribʼ? b) ¿Jas kraj ri Jehová?
RI Jehová itzel kril ri makaj (Sal. 5:4-6). Areʼ kraj che rukʼ ronojel qanimaʼ kqanimaj ri utaqonik che kʼo pa ri Biblia. Qastzij riʼ che ri Jehová retaʼm che jujun mul weneʼ kojsachik rumal che oj ajmakibʼ (Sal. 130:3, 4). Pero itzel keril ri winaq ri «man kkiya ta uqʼij ri Dios, xaq kkikoj ri utoqʼobʼ ri Dios che ubʼanik ronojel itzel rayinik» (Jud. 4). Rumal laʼ, ri Biblia kubʼij che ri Dios kusachisaj na kiwach ri itzel taq winaq pa ri nimalaj chʼoj re ri Armagedón (2 Ped. 3:7; Apoc. 16:16).
2 Qetaʼm che, ri Jehová kraj taj che ksach kiwach ri winaq. Junam rukʼ ri xqil kan pa ri nikʼaj chi kʼutunem, ri Biblia kubʼij che ri Jehová kraj che konojel kkibʼan arrepentir kibʼ (2 Ped. 3:9). Ri kʼamal taq bʼe kkibʼan ke jachaʼ kubʼan ri Jehová are chiʼ rukʼ paciencia kekitoʼ ri winaq rech kkibʼan arrepentir kibʼ y kkibʼan chi jumul ramigos ri Jehová. Are kʼu konojel taj kkaj ri tobʼanik che kyaʼ chke (Is. 6:9). E kʼo jujun kkaj taj kkikʼex ri kikʼaslemal y kkibʼan ta arrepentir kibʼ paneʼ ri kʼamal taq bʼe kʼi mul ketzijon kukʼ. ¿Jas rajawaxik kkibʼan ri kʼamal taq bʼe?
«CHIWESAJ BʼAʼ RI AJMAK RIʼ CHIXOL»
3. a) Junam rukʼ ri kubʼij ri Biblia, ¿jas rajawaxik kbʼan che ri winaq che xubʼan jun nimalaj mak y kubʼan ta arrepentir ribʼ? b) ¿Jasche kqabʼij che ri winaq areʼ mismo xtzukunik che kesax bʼi pa ri congregación?
3 We jun winaq xubʼan jun nimalaj makaj y kubʼan ta arrepentir ribʼ ri kʼamal taq bʼe rajawaxik kkibʼan ri kubʼij 1 Corintios 5:13: «Chiwesaj bʼaʼ ri ajmak riʼ chixoʼl». Kojkunik kqabʼij che ronojel ri kukʼulmaj areʼ mismo xtzukunik (Gál. 6:7). ¿Jasche kqabʼij wariʼ? Rumal che xukʼam ta ri tobʼanik che kʼi taq mul xkiya ri kʼamal taq bʼe che (2 Rey. 17:12-15). Y rukʼ ri kubʼano kukʼutunisaj che kraj taj kunimaj ri utaqonik ri Jehová (Deut. 30:19, 20).
4. ¿Jasche kyaʼ ubʼixik che xesax bʼi ri winaq pa ri congregación?
4 Are chiʼ jun winaq kubʼan ta arrepentir ribʼ kyaʼ ubʼixik che ri congregación che xesax bʼik y che testigo rech Jehová ta chik. a Are kʼu, kbʼan ta wariʼ rumal che xa kesax ukʼixbʼal ri winaq, xaneʼ rech ri congregación kubʼan ri kubʼij ri Biblia, kkimulij ta chi kibʼ rukʼ ri winaq y kewaʼ ta chi rukʼ (1 Cor. 5:9-11). Kʼo rumal che ri Jehová kubʼij wariʼ. Rumal laʼ ri apóstol Pablo xubʼij: «Ri jubʼiqʼ chʼam kuchʼamarisaj ronojel ri qʼor» (1 Cor. 5:6). We kesax ta bʼi ri winaq pa ri congregación che ubʼanom ta arrepentir ribʼ weneʼ kubʼano che ri nikʼaj chi qachalal kkichomaj che rajawaxik taj kkinimaj ri Jehová (Prov. 13:20; 1 Cor. 15:33).
5. ¿Jas kqachomaj chrij jun winaq che testigo rech Jehová ta chik y jasche?
5 ¿Jas kʼu kqachomaj chrij jun winaq che Testigo ta chik? Qastzij che kqachilaj ta chi wajun winaq riʼ, are kʼu kqachomaj taj che kkun ta chik ktzalij rukʼ ri Jehová, xaneʼ kqilo junam rukʼ jun alaj chij che sachinaq kanoq. Y chnaʼtaj chqe che xupatanij na ri Jehová. Y weneʼ tajin kuriq kʼax rumal che tajin ta chi kubʼan ri xubʼij che ri Jehová che kubʼano (Ezeq. 18:31). Rumal che ri Jehová uyaʼom na tiempo, maqachomaj che ri winaq kkun ta chik kupatanij chi jumul ri Jehová. Rumal laʼ, ¿jas tobʼanik kkiya ri kʼamal taq bʼe che ri winaq che esam bʼi pa ri congregación?
¿JAS KKIBʼAN RI KʼAMAL TAQ BʼE CHE KITOʼIK RI WINAQ CHE E ESAM BʼI PA RI CONGREGACIÓN?
6. ¿Jas kkibʼan ri kʼamal taq bʼe rech kkitoʼ ri winaq che e esam bʼi pa ri congregación?
6 ¿Jas kkibʼan ri kʼamal taq bʼe are chiʼ ri winaq kesax bʼi pa ri congregación? ¿La kkiya na tobʼanik che rech ktzalij rukʼ ri Jehová? ¡Kkiyaʼo! Are chiʼ ri comité de ancianos kkibʼij che ri winaq che kkun ta chik kkʼojiʼ pa ri congregación, kkibʼij che ri rajawaxik kubʼano rech ktzalij chi jumul. Pero xiw ta wariʼ kkibʼano. Kkibʼij che che kkaj ketzijon rukʼ are chiʼ qʼaxinaq chi kebʼ oxibʼ ikʼ rech kkilo we uyaʼom kan ubʼanik ri makaj. We kraj che ketzijon chi jumul rukʼ, ri kʼamal taq bʼe kkibʼij che ri rajawaxik kubʼano rech kubʼan arrepentir ribʼ y ktzalij chi jumul rukʼ ri Jehová. ¿Y we ubʼanom ta wi arrepentir ribʼ? Paneʼ je wariʼ ri kʼamal taq bʼe kkiya ta kan utoʼik.
7. ¿Jas kkibʼan ri kʼamal taq bʼe che resaxik uwach ri toqʼobʼisal wachaj che kukʼut ri Jehová chke ri winaq che e esam bʼi pa ri congregación? (Jeremías 3:12).
7 Ri kʼamal taq bʼe kkesaj uwach ri Jehová che kutoqʼobʼisaj kiwach ri winaq che e esam bʼi pa ri congregación. Are chiʼ ri israelitas xeniman ta che ri Jehová, ri areʼ xaq ta xreyeʼj jampaʼ ketzalij chi rukʼ. Xaneʼ are ri areʼ xqebʼ kukʼ rech kuya ri utobʼanik chke, paneʼ kibʼanom ta arrepentir kibʼ. Junam rukʼ ri xqil pa ri ukabʼ kʼutunem re wajun Chajinel riʼ, ri Jehová xukoj ri ukʼutbʼal ri profeta Oseas rech xukʼutu che kutoqʼobʼisaj kiwach ri ajmakibʼ. Ri Jehová xubʼij che ri Oseas che ktzalij rukʼ ri rixoqil paneʼ tajin kmakun wi na (Os. 3:1; Mal. 3:7). Junam rukʼ ri Jehová, ri kʼamal taq bʼe rukʼ ronojel kanimaʼ kkaj che ri e esam bʼi pa ri congregación ketzalij chi jumul y kkibʼan arrepentir kibʼ, rumal laʼ kekitoʼo (chasikʼij Jeremías 3:12).
8. ¿Jas kojutoʼ ri kʼutbʼal che xukoj ri Jesús re ri ala che xel bʼi cho rachoch rech kqachʼobʼ ri toqʼobʼisal wachaj che kukʼut ri Jehová? (Lucas 15:7).
8 Chnaʼtaj chqe ri xqil pa ri ukabʼ kʼutunem che xchʼaw chrij ri ala che xel bʼi cho rachoch. Are chiʼ ri utat xrilo che xtzalij cho rachoch, «ri areʼ kʼut xel ukʼuʼx che, xxikʼinik xbʼek, xuqʼaluj ri ala, xutzʼumaj» (Luc. 15:20). Xreyej taj che kutaʼ kuybʼal umak che. Xaneʼ xukuy umak ri ukʼojol junam rukʼ ri kubʼan jun utzalaj tat che kloqʼoqʼenik. Ri kʼamal taq bʼe xuqujeʼ kkiloqʼoqʼej ri winaq che xubʼan jun mak, rumal laʼ kkaj kkitoʼo rech kupatanij chi jumul ri Jehová (Luc. 15:22-24, 32). Are chiʼ jun winaq kubʼan arrepentir ribʼ y kupatanij chi jumul ri Jehová ¡sibʼalaj kʼo kikotemal pa ri kaj xuqujeʼ puwiʼ ri uwach Ulew! (Chasikʼij Lucas 15:7).
9. ¿Jas jun utzalaj invitación kuya ri Jehová chke ri e esam bʼi pa ri congregación?
9 Qilom chik che ri Jehová kuya ta bʼe che ri kubʼan ta arrepentir ribʼ kkʼojiʼ na chupam ri utinamit. Xuqujeʼ qilom chik che ri Jehová kuya ri tobʼanik che kajwataj che ri winaq rech ktzalij chi jumul rukʼ. Rumal laʼ pa Oseas 14:4 kqil ri kuchomaj ri Jehová chkij ri winaq che kkibʼan arrepientir kibʼ: «Kixenkunaj na che ri man chʼabʼexik ta xiwaj; kixenloqʼoqʼej na puneʼ man taqal ta chiwe, okʼowinaq kʼut ri woyowal». ¡Sibʼalaj nim upatan che ri kʼamal taq bʼe kkilo we ri winaq tajin kubʼan arrepentir ribʼ rech jeriʼ kkiya ri tobʼanik che kajwataj che! ¡Y sibʼalaj nim upatan che ri winaq che e esam bʼi pa ri utinamit ri Jehová kkibʼan arrepentir kibʼ rech kkipatanij chi jumul ri Dios!
10, 11. ¿Jas tobʼanik kkiya ri kʼamal taq bʼe chke ri winaq che ojer chik e esam bʼi pa ri congregación?
10 ¿Jas tobʼanik kyaʼ chke ri winaq che ojer chik e esam bʼi pa ri congregación? Weneʼ kʼi chke tajin ta chi kkibʼan ri mak ri rumal che xeʼesax bʼi pa ri congregación y jujun chik weneʼ knaʼtaj ta chi chke jasche xeʼesax bʼik. Rumal laʼ ri kʼamal taq bʼe rajawaxik kekitzukuj ri winaq riʼ y kkiya ri tobʼanik che kajwataj chke. Are chiʼ kekitzukuj, utz che kkibʼan orar kukʼ y kkibʼij chke che kekunik ketzalij chi jumul pa ri utinamit ri Jehová. Are kʼu, we ri winaq ojer chik esam bʼi pa ri congregación, qas kʼo ta uchuqʼabʼ riʼ ri ukojonik. Rumal laʼ we ri winaq kraj kupatanij chi jumul ri Jehová, are ri kʼamal taq bʼe kkitzukuj jun qachalal rech kuya etaʼmanik re ri Biblia che, paneʼ majaʼ ktzalij pa ri utinamit ri Jehová.
11 Ri kʼamal taq bʼe kkaj kkesaj uwach ri toqʼobʼisal wachaj che kukʼut ri Jehová. Rumal laʼ kkikoj kichuqʼabʼ che kitzukuxik y che kitoʼik ri winaq che kkaj ketzalij rukʼ ri Jehová y kkibʼij chke che kekunik ketzalijik. We jun winaq esam bʼi pa ri congregación ubʼanom chi arrepentir ribʼ aninaq kyaʼ bʼe che ketzalij pa ri utinamit ri Jehová (2 Cor. 2:6-8).
12. a) ¿Jas chrij rajawaxik kkichajij wi kibʼ ri kʼamal taq bʼe? b) ¿Jasche utz taj kqabʼij y kqachomaj che jujun winaq ktoqʼobʼisax ta chi kiwach rumal ri Jehová?
12 Ri kʼamal taq bʼe rajawaxik kkichajij kibʼ are chiʼ kkiya bʼe che jun winaq ktzalij lo pa ri congregación, weneʼ ri winaq xesax bʼik rumal che xubʼan abusar sexualmente che jun akʼal, weneʼ xux apóstata o xraj xusachisaj uwach jun kʼulanem. Rumal laʼ ri kʼamal taq bʼe rajawaxik kkilo we qastzij ubʼanom chi arrepentir ribʼ (Mal. 2:14; 2 Tim. 3:6). Ri kʼamal taq bʼe rajawaxik kkichajij ri congregación. Pero rajawaxik kqachʼobʼo che ri Jehová kukuy umak ri winaq che qas kubʼan arrepentir ribʼ y kubʼan ta chi ri umak. Paneʼ ri kʼamal taq bʼe rajawaxik kkil na we ri winaq ubʼanom chi arrepentir ribʼ pero kkibʼij taj che yaʼtal ta chik ktoqʼobʼisax uwach y ktzalij pa ri utinamit ri Jehová (1 Ped. 2:10). b
¿JAS KTOBʼAN WI RI CONGREGACIÓN?
13. ¿Jas kqabʼan che kilik ri xebʼan censurar y jas kqabʼan che kilik ri keʼesax bʼi pa ri congregación?
13 Junam rukʼ ri xqil kan pa ri jun kʼutunem, jujun taq mul kyaʼ ubʼixik pa ri congregación che jun qachalal xbʼan censurar. Are kʼu kqaya ta kan rachilaxik ri qachalal rumal che xubʼan arrepentir ribʼ y tajin ta chi kubʼan ri makaj (1 Tim. 5:20). Rumal laʼ ri congregación rajawaxik kuyaʼ ri tobʼanik che kajwataj che, rumal che esam ta bʼik (Heb. 10:24, 25). Are kʼu junam ta ri kbʼan che kilik ri winaq che keʼesax bʼi pa ri congregación. Keqachilaj ta chik y kojwaʼ ta chi kukʼ (1 Cor. 5:11).
14. We kesax bʼi jun winaq pa ri congregación, ¿jas kkichaʼ ubʼanik ri qachalal chkijujunal? (Xuqujeʼ chawilaʼ ri e wachbʼal).
14 ¿La kraj kubʼij che kqachʼabʼej ta chi ri esam bʼi pa ri congregación? Je taj. Ri kqabʼano are che kqachilaj ta chik. Pero we are jun qa familia o jun qamigo ri xesax bʼi pa ri congregación, chqajujunal kqilo we kqabʼij che che kbʼe pa ri e riqbʼal ibʼ. ¿Y jas kqabʼan che rilik are chiʼ kopan pa ri riqbʼal ibʼ? Ojer kanoq, keqachʼabʼej taj. Are kʼu kamik chqajujunal kqilo we kqachʼabʼej. Weneʼ jujun qachalal utz kkinaʼo kkiya utz upetik ri winaq. Are kʼu ri kqabʼan taj are che naj tiempo kojtzijon rukʼ y kqachilaj taj.
Chqajujunal kqilo we kqaya rutzil uwach jun winaq che Testigo ta chik o kqabʼij che we kbʼe pa ri e riqbʼal ibʼ. (Chawilaʼ ri párrafo 14).
15. ¿Jas chrij kchʼaw wi 2 Juan 9-11? (Chawilaʼ ri recuadro « ¿La junam makaj xechʼaw wi ri Juan y ri Pablo chrij?»).
15 Weneʼ kqachomaj, ¿jasche ri Biblia kubʼij che apachin kuyaʼ rutzil uwach jun ajmak «kubʼan re ri e itzelalaj taq uchak»? (chasikʼij 2 Juan 9-11). Ri contexto are kchʼaw chkij ri apóstatas y ri winaq che kekitaqchij ri nikʼaj chik che ubʼanik ri itzel kril ri Dios (Apoc. 2:20). Rumal laʼ, we ri winaq kubʼan ri kkibʼan ri apóstatas o nikʼaj chi makaj y kraj taj kuya kan ubʼanik, ri kʼamal taq bʼe kebʼe ta che usolixik. Are kʼu weneʼ kukʼex na ri ukʼaslemal. Pero we uyaʼom ta kan ubʼanik ri tajin kubʼano, kqaya ta rutzil uwach y kqabʼij ta riʼ che che kbʼe pa ri e riqbʼal ibʼ.
CHQESAJ UWACH RI TOQʼOBʼISAL WACHAJ CHE KUKʼUT RI JEHOVÁ
16, 17. a) ¿Jas kraj ri Jehová che kkibʼan ri ajmakibʼ? (Ezequiel 18:32). b) ¿Jas ketobʼan wi ri kʼamal taq bʼe rukʼ ri Jehová?
16 ¿Jas xqetaʼmaj pa ri cinco kʼutunem riʼ? Che ri Jehová kraj taj che ri winaq ksach kiwach (chasikʼij Ezequiel 18:32). Kraj che kkibʼan arrepentir kibʼ ri tajin kemakunik (2 Cor. 5:20). Rumal laʼ ri Jehová amaqʼel kubʼij chke ri winaq che kkibʼan arrepientir kibʼ y che kkipatanij chi jumul. Qastzij che are jun nimalaj eqeleʼn ri yaʼom chke ri kʼamal taq bʼe che ketobʼan rukʼ ri Jehová che kitoʼik ri winaq rech kkibʼan arrepentir kibʼ y ketzalij chi jumul rukʼ (Rom. 2:4; 1 Cor. 3:9).
17 ¡Sibʼalaj kʼo kikotemal pa ri kaj are chiʼ jun winaq kubʼan arrepientir ribʼ! Ri qa Dios Jehová, sibʼalaj kkikotik are chiʼ jun winaq ktzalij chi jumul rukʼ. Amaqʼel chojchoman chrij ri loqʼoqʼebʼal y ri toqʼobʼisal wachaj che kukʼut ri Jehová, je wariʼ más kqaloqʼoqʼej y más kqakubʼsaj qakʼuʼx chrij (Luc. 1:78).
BʼIXONEM 111 Ri rumal che kojkikotik
a Junam rukʼ ri xubʼij ri Pablo pa 1 Corintios 5:13, pa español kkoj ta chi ri tzij expulsado, xaneʼ se le ha sacado de la congregación.
b Junam rukʼ ri kubʼij ri Biblia, e kʼo jujun winaq che kkuyutaj ta chi ri kimak. Are kʼu are ta rumal ri mak che xkibʼano, xaneʼ are rumal che kkixutuj ri Jehová y kkaj taj kkikʼam ri tobʼanik che kyaʼ chke. Xaq xiw ri Jehová y ri Jesús kekunik kkiqʼat tzij puwiʼ ri winaq che jewaʼ kubʼano (Mar. 3:29; Heb. 10:26, 27).
