«Paneʼ ri yabʼil COVID-19 kʼo ta chi kimik kraj taj kubʼij che kʼo ta chi kʼax tajin kubʼano. [...] Are chiʼ kpe jun chi pandemia, y qas qetaʼm che kpena jun chik, rajawaxik qachomam chik jas kqabʼano» (Tedros Adhanom Ghebreyesus, ri director re ri Organización Mundial re ri Salud, 22 re mayo 2023).

 E k’i winaq k’a tajin kkiriq na kʼax pa ri kichomanik y pa ri kibʼaqil rumal ri pandemia COVID-19. ¿La ketaʼm chi ri e qʼatal taq tzij y ri kunanelabʼ jas kkibʼano are chi’ kpe jun chi pandemia? O, ¿la kekun che resaxik ronojel uwach yabʼil che k’o kimik?

 Ri Biblia kubʼij che «ri Dios ri kʼo pa ri kaj kujeqebʼa na jun ajawibʼal» o jun qʼatbʼal tzij, y wajun qʼatbʼal tzij riʼ kresaj na ri yabʼil (Daniel 2:44). Rumal laʼ «man kʼo ta jun aj tinamit kubʼij ta na: ‹In yawabʼ›» (Isaías 33:24). Konojel ri winaq keyawaj ta chik y ri nim chi kijunabʼ kkʼojiʼ chi na kichuqʼabʼ (Job 33:25).