Pa ronojel ri uwach Ulew kbʼan ta ri sukʼilal. Wariʼ xa kebʼ kʼutbʼal:

•   Pa enero 2018, jun ixoq qʼatal tzij re Estados Unidos xresaj lo jun achi pa cárcel che weneʼ 38 junabʼ kʼo chi chilaʼ. Jun prueba re ADN che xbʼan che xukʼutu che kʼo ta umak.

•   Pa septiembre 1994, pa jun tinamit re África, oxibʼ alabʼom xetzʼapix pa cárcel rumal che xkaj taj xebʼe pa chʼoj. Pa septiembre 2020, 26 junabʼ chik e kʼo pa cárcel xaq xetzʼapixik y xil ta na we qastzij ajmakibʼ.

 We ariqom kʼax rumal che kʼo ta sukʼilal, weneʼ kanaʼo junam rukʼ ri xunaʼ ri Job, jun achi che xkʼasiʼ ojer y che xubʼij wariʼ: «Kintzʼonoj nutoʼik, man kʼo ta kʼu jachin jun kubʼan ta sukʼilal chwe» (Job 19:7). Paneʼ kqachomaj che kkʼojiʼ ta sukʼilal cho ri uwach Ulew, are kʼu ri Biblia kubʼij che kopan na jun qʼij che kqʼat na tzij pa kiwiʼ konojel ri winaq rukʼ sukʼilal. Are kʼu ri pixabʼ che kuya ri Biblia kojkitoʼo rech kqachʼij ri kʼax che kbʼan chqe rumal che kʼo ta sukʼilal.

 Ri winaq kkibʼan ta sukʼilal rumal che kkinimaj ta ri kubʼij ri Dios. Ri Biblia kubʼij che ri qastzij sukʼilal xaq xiw ri Dios kkunik kuyaʼo (Isaías 51:4). Pa ri Biblia ri tzij sukʼilal xuqujeʼ ri jikomal jujun taq mul xa junam kraj kubʼij (Salmo 33:5). ¿Jas che kqabʼij wariʼ? Rumal che are chiʼ ri winaq kkinimaj ri Dios kʼo sukʼilal. Are kʼu, are chiʼ keniman ta che Dios kkibʼan ta ri sukʼilal. Chatchoman chkij ri e kʼutbʼal riʼ:

•   Ri winaq che xaq kchoman chbʼil ribʼ. Ri itzel taq kirayinik ri winaq kubʼano che kemakunik (Santiago 1:14, 15). E kʼi winaq, kkibʼan kʼax chke ri nikʼaj chik rumal ri itzel taq kirayinik. Are kʼu ri Dios kraj che kqatzukuj ri utz chke ri nikʼaj chik (1 Corintios 10:24).

•   Kkibʼan kʼax rumal che ketaʼm taj. Jujun taq winaq kkibʼan kʼax chke nikʼaj chik, rumal che ketaʼm ta ri qas xkʼulmatajik, are kʼu chuwach ri Dios wariʼ are jun makaj (Romanos 10:3). Chnaʼtaj chqe che ri Jesús xkamisaxik rumal che ri winaq qas ta ketaʼm ri xkʼulmatajik (Hechos 3:15, 17).

•   Ri winaq kekun taj kkibʼano che kʼo sukʼilal. Ri políticos, ri nimaʼq taq kʼayij y ri e kojonem re ronojel ri uwach Ulew rajawaxik kkibʼano che kʼo sukʼilal. Are kʼu, konojel kkibʼan kʼax chke ri winaq, keʼelaqʼik, itzel kekil nikʼaj chik y junam ta kekil ri qʼinomabʼ kukʼ riʼ mebʼaʼ. Wariʼ ubʼanom che kʼo kʼaxkʼolil cho ronojel uwach Ulew. Paneʼ kʼo jujun chke ri winaq riʼ kʼo jun utz kanimaʼ. Are kʼu ronojel ri kkaj kkibʼano utz ta kelik rumal che kʼo ta ri utobʼanik ri Dios kukʼ (Eclesiastés 8:9; Jeremías 10:23).

 Utz taj. Ri Dios itzel krilo are chiʼ ri winaq kkibʼan kʼax chke ri nikʼaj chik y che kkibʼan ta sukʼilal (Proverbios 6:16-18). Xubʼij che ri profeta Isaías che kutzʼibʼaj wariʼ: «Ri Ajawaxel [Jehová] a kuloqʼoj ri sukʼilal, kretzelaj kʼu uwach ri elaqʼanik xuqujeʼ ri kibʼanik il patan» (Isaías 61:8).

 Ri Taqanik che xuya ri Dios chke ri israelitas ojer kanoq xukʼutu che nim ubʼanik che kbʼan ri sukʼilal. Xubʼij chke ri qʼatal taq tzij che kkitaʼ ta pwaq chke ri winaq y che are kkibʼan ri sukʼilal (Deuteronomio 16:18-20). Utz ta xrilo are chiʼ ri israelitas xkibʼan kʼax chke ri e mebʼaʼ y ri kʼo kirajawaxik, rumal laʼ ri Dios xeʼuxutuj (Isaías 10:1-3).

 Jeʼ kukʼamo. Ri Dios kukoj na ri Jesucristo, rech kusachisaj uwach ri makaj y kubʼano che ri e winaq keʼux tzʼaqat junam rukʼ ri xraj ri Dios nabʼe kanoq (Juan 1:29; Romanos 6:23). Xuqujeʼ xukoj ri uQʼatbʼal tzij pa ri kaj, rech kubʼan na che konojel ri winaq kkiriq na sukʼilal (Isaías 32:1; 2 Pedro 3:13). Rech kawetaʼmaj más chrij wajun Qʼatbʼal tzij riʼ chawilaʼ ri video ¿Jas riʼ ri Rajawbʼal ri Dios?

 Pa ri kʼakʼ uwach Ulew kkʼojiʼ na ri sukʼilal, konojel ri winaq kkiriq na jamaril y kkiriq ta chi kʼax (Isaías 32:16-18). Ri Dios xaq junam keril ri winaq, rumal laʼ nijun kbʼan kʼax che. Ronojel ri kʼax y ri bʼis che kʼolik rumal che kʼo ta sukʼilal ksach na uwach. Y knaʼtaj ta chi riʼ ri kʼax che xbʼan chqe (Isaías 65:17; Apocalipsis 21:3, 4). Rech kawetaʼmaj más chasikʼij ri kʼutunem «¿Qué hará el Reino de Dios?».

 Jeʼ qastzij. ¿Jas che kqabʼij wariʼ? Rumal che qilom chik che ri profecías che kubʼij ri Biblia qas e tzʼaqatajinaq y che ronojel ri tzʼibʼatal chupam qastzij. Rumal wariʼ kojkunik kqakubʼsaj qakʼuʼx chrij ri kubʼij ri Dios chqe pa ri Biblia. Rech kawetaʼmaj más chawilaʼ ri video y ri e kʼutunem riʼ:

•   ¿Jasche kqabʼij che ri kubʼij ri Biblia are ri qastzij? (video)

•   «Profecías que sí se han cumplido»

•   «Historial profético intachable»

•   «Razones para confiar en la Biblia»

 Ri Biblia kchʼaw chkij winaq che xkitoʼ kibʼ are chiʼ xbʼan kʼax chke. Jun kʼutbʼal, ri apóstol Pablo xqʼat ta tzij puwiʼ rukʼ sukʼilal. Ri Pablo xaq ta xril ri xbʼan che xaneʼ xutzukuj tobʼanik y xbʼe chuwach ri qʼatal tzij César (Hechos 25:8-12).

 Are kʼu, paneʼ kqakoj qachuqʼabʼ kojkun taj kqabʼano che kkʼojiʼ sukʼilal cho ronojel ri uwach Ulew (Eclesiastés 1:15). Paneʼ jeriʼ e kʼi winaq kilom y kiriqom utzilal rumal che kikubʼsam kikʼuʼx chrij ri Dios. Are chiʼ xketaʼmaj che pa ri uwach Ulew kkʼojiʼ na sukʼilal xubʼan chke che xebʼison ta chik y xkinaʼ jamaril.