KʼUTUNEM 8
¿Jasche ri Ajawaxel uyaʼom che kʼo itzelal xuqujeʼ kʼaxkʼolil?
1. ¿Jachin xmajow lo ri itzelal?
Ri kʼi junabʼ che ri Ajawaxel uyaʼom chike ri winaq kkiqʼat tzij, kikʼutum che kekun täj kkesaj ri kʼäx
Ri itzelal xumaj loq chiʼ ri Satanás xubʼij ri nabʼe molom tzij cho ri uwach Ulew. Nabʼe kanoq, are jun ángel che utz xuqujeʼ tzʼaqat, tekʼuriʼ «man jeqelinaq ta pa ri qastzij» (Juan 8:44). Xumaj urayixik che kyaʼ qʼijilanik che, wariʼ xaq xiw che ri Ajbʼanol ronojel ri jastaq taqal che kyaʼ uqʼij. Rukʼ jun molom tzij, xubʼan che ri Eva, ri nabʼe ixoq, xunimaj ri kubʼij ri areʼ are ta ri kubʼij ri Ajawaxel. Ri Adán xuqujeʼ xniman täj junam che xubʼan ri rixoqil. Ri xkichaʼ ubʼanik xukʼam lo kʼaxkʼolil xuqujeʼ kamikal. Chasikʼij uwach Génesis 3:1-6, 19.
Chiʼ xubʼij che ri Eva che kniman ta che ri Ajawaxel, ri Satanás xmajin loq che knimax ta ri Jehová. Nim ta xril ri nimalaj uqʼatbʼal tzij ri Jehová, o che xaq xiw areʼ taqal che kuqʼat tzij, ri Nim Ubʼanik puwiʼ ronojel. E kʼi winaq kibʼanom ke junam rukʼ ri Itzel kixutum ri uqʼatbʼal tzij ri Ajawaxel, rumal laʼ are Satanás «ri unimal we uwach ulew riʼ». Chasikʼij uwach Juan 14:30 xuqujeʼ 1 Juan 5:19.
2. ¿La kʼo utz ta che ri xubʼan ri Ajawaxel?
Ri uchak ri Jehová e utz. Ri nabʼe winaq xuqujeʼ ri ángeles kekunik kkinimaj ronojel ri kubʼij ri Ajawaxel (Deuteronomio 32:4, 5). Areʼ xuya chaqe che kojkunik kqachaʼ ubʼanik ri utz o ri utz täj. Wariʼ kubʼan chaqe che kqanimaj rumal ri qaloqʼoqʼenik. Chasikʼij uwach Santiago 1:13-15 xuqujeʼ 1 Juan 5:3.
3. ¿Jasche uyaʼom ri Ajawaxel che kʼo kʼaxkʼolil?
Xa jun tiempo uyaʼom ri Jehová rech knimax ta ri nimalaj uqʼatbʼal tzij. ¿Jasche? Rech kukʼutu che kʼo ta jun qʼatbʼal tzij che are ta areʼ kojowinaq kkunik kuya utzilal chike ri winaq (Eclesiastés 7:29; 8:9). Qʼaxinaq chi 6.000 junabʼ che ri kikʼaslemal ri winaq, sibʼalaj qʼalajinaq chik: che ri e ajkʼamal bʼe che xa e winaq e kunaq ta che resaxik ri kʼäx, ri kamisanik, ri chʼoj xuqujeʼ yabʼil. Chasikʼij uwach Éxodo 9:16 xuqujeʼ Jeremías 10:23.
Tekʼuriʼ, we kqaya che ri Ajawaxel kuqʼat tzij pa qawiʼ kqariq utzilal (Isaías 48:17, 18). Xa jubʼiqʼ chi kraj, Jehová keresaj ri ajqʼatal täq tzij che xa e winaq. Xaq xiw kekʼaseʼ kan cho ri uwach Ulew ri winaq che kkitoʼ ri Rajawbʼal (Isaías 11:9). Chasikʼij uwach Daniel 2:44.
Chawilaʼ ri video ¿Jasche uyaʼom ri Dios che kʼo kʼaxkʼolil?
4. ¿Jas kuya kqabʼano rumal ri upaciencia ri Ajawaxel?
Satanás xubʼij che ri e winaq xaq xiw kkipatanej ri Ajawaxel rumal ri kkiriq chirij. Rumal ri upaciencia, qonojel kuya kqakʼut rukʼ ri qakʼaslemal che ri Itzel are jun ajmolom tzij xuqujeʼ kqatoʼ ri Rajawbʼal ri Ajawaxel are ta ri kech ri winaq. Chasikʼij uwach Job 1:8-12 xuqujeʼ Proverbios 27:11.
5. ¿Jas kqabʼano rech are kqatoʼ ri Ajawaxel?
Rukʼ ri kqachaʼ ubʼanik, kqakʼutu we kqaj o kqaj täj che are ri Ajawaxel kuqʼat tzij pa qawiʼ
Nabʼe, rajawaxik kqetaʼmaj ri kraj kqabʼan che uqʼijilaxik xuqujeʼ kqabʼan pa kʼaslemal ri qastzij kojonik, che kresaj ri kukʼutu chupam ri Loqʼalaj Pixabʼ (Juan 4:23). Xuqujeʼ, we kqabʼan qe ri xubʼan ri Jesús chiʼ xukoj ta ribʼ pa política xuqujeʼ pa ri chʼoj, kqakʼutu che kqanimaj ta ri uqʼatbʼal tzij ri Satanás. Chasikʼij uwach Juan 17:14.
Satanás kukoj ri uchoqʼabʼ rech ri winaq kkibʼan itzelal xuqujeʼ tzʼil täq mak. Chiʼ kqaxutuj wa täq bʼantajik riʼ, weneʼ jujun chike ri e qachiʼl xuqujeʼ qafamiliar kojkiyoqʼo o kkibʼan kʼäx chaqe (1 Pedro 4:3, 4). We je kbʼantajik, chqatzukuj ri kachilanik ri winaq che kkiloqʼoqʼej ri Ajawaxel xuqujeʼ chqanimaj ri e sukʼ täq utaqonik ri Ajawaxel. Rukʼ wariʼ, kqakʼutu che ri Satanás xumol tzij chiʼ xubʼij che kʼo ta jun winaq kunimaj ri Ajawaxel we kuriq kʼäx. Chasikʼij uwach 1 Corintios 6:9, 10 xuqujeʼ 15:33.
Rumal che kojuloqʼoqʼej ri Ajawaxel qetaʼm che kresaj na ri kʼaxkʼolil xuqujeʼ ri itzelal. Ri kkikʼut ri kikojonik chiʼ kkibʼan ri kubʼij ri Ajawaxel, kkiriq na jun kikʼaslemal che kʼo ta ukʼisik cho ri uwach Ulew. Chasikʼij uwach Juan 3:16.
