1.  ¿Jachin riʼ ri Nimalaj Babilonia?

2.  ¿Jampaʼ xpe ri Mesías?

3.  Ri jujun taq jastaq che kkibʼan ri kunanelabʼ chiʼ kajwataj ri kikʼ

4.  Chiʼ jun kʼulaj kkijach kibʼ

5.  Ri nimaqʼij

6.  Yabʼil che kqʼax che jun chik

7.  Kʼayij y ri utaʼik kitobʼanik ri qʼatal taq tzij

 1. ¿Jachin riʼ ri Nimalaj Babilonia?

¿Jasche kqabʼij che ri «Nimalaj Babilonia» kraj kubʼij konojel ri qastzij taj kojonem? (Apocalipsis 17:5). Chqilaʼ oxibʼ rumal.

• Kʼo utaqanik puwiʼ ronojel ri uwach Ulew. Kbʼixik che tʼuyul pa kiwiʼ «kʼiʼalaj winaq» y che «ktaqan pa kiwiʼ ri ajawinelabʼ re ri uwach Ulew» (Apocalipsis 17:15, 18).

• Are ta jun nimalaj qʼatbʼal tzij o ri nimaʼq taq kʼayij. Ri Biblia kubʼij che «ri ajawinelabʼ aj uwach Ulew» y «ri e ajkʼay» kʼa e kʼo na are chiʼ ksachisax uwach ri Nimalaj Babilonia (Apocalipsis 18:9, 15).

• Kutzʼilobʼisaj ri ubʼiʼ ri Dios. Kbʼix «ajmakalaj ixoq» che, rumal che kuya tobʼanik chke ri qʼatal taq tzij rumal che ktojik y kyaʼ tobʼanik che (Apocalipsis 17:1, 2). Keʼusubʼu y e ukamisam kʼi winaq (Apocalipsis 18:23, 24).

Chawilaʼ kʼutunem 13, punto 6

 2. ¿Jampaʼ xpe ri Mesías?

Ri Biblia kubʼij che are chiʼ majaʼ kpe ri Mesías cho ri uwach Ulew kqʼax na 69 semanas (chasikʼij Daniel 9:25).

• ¿Jampaʼ xmajtaj ri 69 semanas? Pa ri junabʼ 455 nabʼe chuwach ri Cristo. Pa ri junabʼ riʼ xopan ri qʼatal tzij Nehemías pa Jerusalén rech xuyak chi jumul ri tinamit (Daniel 9:25; Nehemías 2:1, 5-8).

• ¿Jampaʼ xuchʼij ri 69 semanas? Pa jujun taq profecías re ri Biblia, jun qʼij kraj kubʼij jun junabʼ (Números 14:34; Ezequiel 4:6). Rumal laʼ jun semana kraj kubʼij 7 junabʼ. Pa wajun profecía riʼ, ri 69 semanas kraj kubʼij 483 junabʼ (69 multiplicado por 7).

• ¿Jampaʼ xkʼis ri 69 semanas? We kqamaj lo rajilaxik 483 junabʼ pa ri junabʼ 455 nabʼe chuwach ri Cristo, kopan kʼa pa ri junabʼ 29 re ri qaqʼij. a Pa ri junabʼ riʼ ri Jesús xubʼan ri uqasanjaʼ y xux ri Mesías (Lucas 3:1, 2, 21, 22).

Chawilaʼ kʼutunem 15, punto 5

 3. Ri jujun taq jastaq che kkibʼan ri kunanelabʼ chiʼ kajwataj ri kikʼ

Ri kunanelabʼ kkibʼan jujun taq procedimientos che ri kikʼ che ri cristianos kekun taj kkibʼano. Jun kʼutbʼal, kqaya ta ri qakikʼel rech kkoj che jun chik ni kqaya taj che kkʼol kanoq rech kkoj chi chqe chiʼ kojbʼan operar pa jun chi qʼij (Deuteronomio 15:23).

Are kʼu kʼo jujun che weneʼ kojkunik kqabʼano, junam rukʼ ri análisis re ri kikʼ, ri hemodiálisis, ri hemodilución o kqakoj ri máquina che kuchʼaj ri kikʼ rech kkoj chi jumul chqe o ri bomba de derivación cardiopulmonar. Chkijujunal ri cristianos kkichaʼ jas kkibʼan che ukojik ri kikikʼel chiʼ kebʼan operar, kbʼan examen chke o jun tratamiento. Ri ajkunanelabʼ jalajoj kkibʼan che ukojik wa taq procedimientos riʼ. Rumal laʼ, rajawaxik ri cristiano nabʼe kretaʼmaj jas kbʼan che ukojik ri ukikʼel chiʼ kbʼan operar, kbʼan jun examen che o chiʼ kukoj jun tratamiento. Chatchoman chrij wariʼ:

• ¿La kubʼan kʼax che ri retaʼmabʼal nukʼuʼx we kkoj jun máquina chwe che kuchʼaj ri nukikʼel tekʼuriʼ kkoj chi jumul chwe o che kqʼatex ri nukikʼel? ¿La kinchomaj riʼ che nukikʼel na rumal laʼ rajawaxik taj ktix «puwiʼ ri ulew»? (Deuteronomio 12:23, 24).

• We kesax ri nukikʼel, ksukʼumaxik o kkunaxik tekʼuriʼ kkoj chi jumul chwe, ¿la kuya bʼe ri retaʼmabʼal nukʼuʼx kinbʼan wariʼ?

Chawilaʼ kʼutunem 39, punto 3

 4. Chiʼ jun kʼulaj kkijach kibʼ

Ri uTzij ri Dios kubʼij che utz taj kkijach kibʼ ri kʼulaj y kubʼij che kekun taj kekʼuliʼ rukʼ jun chi winaq we kijachom kibʼ (1 Corintios 7:10, 11). Are kʼu, jujun taq mul ri cristianos kijachom kibʼ rumal che ri kikʼulaj kkibʼan ri jastaq riʼ:

• Kraj ta wi kuya ri kajwataj che ri familia: Ri achi kraj ta wi kuya ri kajwataj che ri ufamilia, che kubʼano che kʼo ta chi kkitijo o kkikojo (1 Timoteo 5:8).

• Sibʼalaj kchʼayanik: Are chiʼ jun winaq sibʼalaj kchʼayik weneʼ kubʼano che xaq kyawaj chik o che kuya ri ukʼaslemal pa kʼax (Gálatas 5:19-21).

• Kubʼano che kkun ta wi kuqʼijilaj ri Jehová: Ri achi o ri ixoq kubʼano che ri ukʼulaj kkun ta wi kuqʼijilaj ri Jehová o kunimaj ri utaqanik (Hechos 5:29).

Chawilaʼ kʼutunem 42, punto 3

  5. Ri nimaqʼij

Ri oj cristianos kqabʼan ta nimaqʼij che ri Jehová utz ta krilo. Are kʼu chkijujunal ri cristianos kkichaʼ jas kkibʼano rukʼ ri jastaq che kʼo ubʼanik rukʼ ri nimaqʼij. Chatchoman chrij ri e kʼutbʼal riʼ.

• Are chiʼ «Feliz Navidad» kchaʼ jun winaq chawe. Weneʼ más utz che xaq xiw kabʼij «maltyox» che. We ri winaq kraj kretaʼmaj más jasche kabʼan ta wajun nimaqʼij riʼ katkunik kaya ubʼixik che.

• Ri awachajil o ri awixoqil che Testigo taj kubʼij chawe che kitijaʼ iwa kukʼ ri ifamiliares pa jun nimaqʼij. We ri retaʼmabʼal akʼuʼx kuya che katbʼek are más utz riʼ che kaya ubʼixik che ri akʼulaj che kabʼan ta jun jastaq o costumbre che kʼo ubʼanik rukʼ ri qastzij taj kojonem.

• Ri ajefe kraj kusipaj pwaq chawe pa jun nimaqʼij. ¿La kaxutuj? Weneʼ rajawaxik taj. Chachomaj wariʼ: ¿La kuchomaj ri ajefe che ri pwaq riʼ kʼo ubʼanik rukʼ ri nimaqʼij che tajin kbʼanik? ¿O kuya chawe rumal che nim kril ri achak y kraj kumaltyoxij chawe?

• Jun winaq kuya jun sipanik chawe pa jun nimaqʼij. Weneʼ ri winaq kubʼij chawe: «Wetaʼm che kabʼan ta ri nimaqʼij riʼ, are kʼu kwaj kinya wajun sipanik chawe». Weneʼ xa kraj kukʼut utzilal. Are kʼu, ¿la tajin kubʼan wariʼ rumal che kuya pa kʼax ri akojonik o che kabʼan ri nimaqʼij? Are chiʼ at chomanaq chi chrij wariʼ at katchowik we kakʼam ri sipanik o kakʼam taj. Are chiʼ kqachaʼ ubʼanik jun jastaq kqaj che kubʼan ta kʼax ri retaʼmabʼal qakʼuʼx y kqakʼut sukʼilal che ri Jehová (Hechos 23:1).

Chawilaʼ kʼutunem 44, punto 1

 6. Yabʼil che kqʼax che jun chik

Rumal che keqaloqʼoqʼej ri winaq kqakoj qachuqʼabʼ rech kqaqʼaxej ta jun yabʼil chke. Kqabʼan wariʼ we kʼo jun yabʼil chqe o paneʼ qas ta qetaʼm we kʼolik. Y wariʼ kqabʼano rumal che kqanimaj wajun pixabʼ riʼ che kʼo pa ri Biblia: «Chaloqʼoqʼej ri awajil atzʼaqat jachaʼ ri at chbʼil awibʼ» (Romanos 13:8-10).

¿Jas kraj kubʼij unimaxik wajun taqanik riʼ? Ri winaq che kʼo jun yabʼil che rajawaxik kuchajij ribʼ rech kuqʼaxej ta chi chke nikʼaj chik, rumal laʼ kutzʼumaj ta jun winaq, kumatzej taj y kuchap ta ri uqʼabʼ. Y kpe ta royowal we man kbʼan invitar rumal jun winaq che kuchajij ri ufamilia. Rech kkunik kubʼan uqasanjaʼ y kuqʼaxej ta chke nikʼaj chik rajawaxik kubʼij che jun kʼamal bʼe che kʼo jun yabʼil che. Y, we jun winaq nabʼe kanoq uriqom kan jun yabʼil rajawaxik kresaj jun examen re ri ukikʼel rech kekunik kkimaj uchʼabʼexik kibʼ rukʼ jun chi winaq. Ubʼanik wariʼ kqakʼutu che nim kqil wi ri qajil qatzʼaqat y xaq xiw ta kojchoman chqij oj (Filipenses 2:4).

Chawilaʼ kʼutunem 56, punto 2

 7. Kʼayij y ri utaʼik kitobʼanik ri qʼatal taq tzij

Kqanim ta qibʼ pa taq chʼoj are chiʼ kqatzʼibʼaj cho jun wuj ri pwaq che kqaya pa qajik, paneʼ che jun qachalal kqaya wi (Jeremías 32:9-12). Are kʼu jujun taq cristianos kechʼojin chrij wariʼ o chrij jun chi jastaq. We kkʼulmataj wariʼ, rajawaxik che aninaq ketzijonik y rukʼ utzilal kkisukʼumaj ri kʼax.

Are kʼu, ¿jas kbʼan che usukʼumaxik jun elaqʼ o jun molom tzij? (Chasikʼij Mateo 18:15-17). Ri Jesús xubʼij che rajawaxik kbʼan ri oxibʼ jastaq riʼ:

1. Ri kʼo chʼoj chkixoʼl rajawaxik kitukel kkisukʼumaj (chawilaʼ ri versículo 15).

2. We man ksukʼumataj ri chʼoj chkixoʼl utz che kkibʼij che jun o kebʼ qachalal che kekʼojiʼ kukʼ (chawilaʼ ri versículo 16).

3. Y we man ksukʼumataj ri kʼax rajawaxik ketzijon kukʼ ri kʼamal taq bʼe (chawilaʼ ri versículo 17).

Utz taj keqachʼabʼej ri qachalal pa taq qʼatbʼal tzij rumal che wariʼ kutzʼilobʼisaj ri ubʼiʼ ri Jehová y ri congregación (1 Corintios 6:1-8). Are kʼu kʼo jujun jastaq che rajawaxik na pa ri qʼatbʼal tzij ksukʼumax wi: ri uchupik ri kʼulanem, jachin kukʼ kekanaj wi kan ri akʼalabʼ rukʼ ri nan o ri tat, chiʼ kyaʼ ta ri kajwataj chke ri akʼalabʼ, chiʼ kyaʼ ta chi ri seguro de vida, chiʼ kebʼ oxibʼ winaq kʼo chʼoj chkixoʼl rumal che utz ta xel ri kikʼay y chiʼ kbʼan uwujil jun ulew o jun ja. Ri Biblia kubʼij che awas taj che jun qachalal kusukʼumaj wariʼ pa ri qʼatbʼal tzij we rukʼ utzilal kubʼano.

Xuqujeʼ ri Biblia kubʼij che awas taj kbʼe jun cristiano pa ri qʼatbʼal tzij rumal jun violación, chiʼ kbʼan abusar jun alaj akʼal, chʼayanik, nimalaj elaqʼ o kamisanik.

Chawilaʼ kʼutunem 56, punto 3