E kʼi chke ri winaq che kkibʼan wajun pregunta riʼ, kiriqom kʼax pa ri kikʼaslemal y kkaj kkiriq kubʼsal kʼuʼx. Y nikʼaj chik kkichomaj che ri nimalaj kʼaxkʼolil che xbʼan chke ri judíos kukʼut ri itzelal che kʼolik y che kʼo ta jun Dios kel ukʼuʼx chqe.

Molom tzij: Awas che kqataʼ che ri Dios jasche xbʼan itzelal chke ri judíos.

 Ri qastzij: E kʼi winaq che kʼo nim kikojonik xkitaʼ che ri Dios jasche sibʼalaj kʼo itzelal. Jun kʼutbʼal ri profeta Habacuc xutaʼ che ri Dios: «¿Jasche kabʼan la chwe che keʼenwil kʼi kʼaxkʼolil xuqujeʼ itzelal?» (Habacuc 1:3). Ri Dios xuyaj ta ri profeta, xaneʼ xubʼano che ktzʼibʼax kan pa ri Biblia rech kojutoʼ kimik.

Molom tzij: Ri Dios kutoqʼobʼisaj ta qawach chi’ kqariq kʼax.

 Ri qastzij: Ri Dios itzel kril ri kʼaxkʼolil (Proverbios 6:16-19). Ri Biblia kubʼij che pa taq uqʼij ri Noé, ri Dios sibʼalaj «kʼax kʼu xunaʼ pa ri ranimaʼ» are chiʼ xril ri itzelal che kʼo cho ri uwach Ulew (Génesis 6:5, 6). Rukʼ wariʼ kqachʼobʼo che ri itzelal che xbʼan chke ri judíos xuqujeʼ xubʼan kʼax che ri Dios (Malaquías 3:6).

Molom tzij: Ri itzelal che xbʼan chke ri judíos are jun kʼajisabʼal wachaj che xuya ri Dios pa kiwiʼ.

 Ri qastzij: Pa ri nabʼe siglo ri Dios xuya bʼe che ri romanos xkibʼan kʼax che Jerusalén (Mateo 23:37–24:2). Are kʼu chiʼ xkʼulmataj wariʼ, ri Dios ubʼanom ta chi kʼax che jun jupuq winaq. Xaneʼ ri Biblia kubʼij: «Man kʼo ta kʼu jalbʼem ibʼ chkixoʼl ri aj judeyibʼ kukʼ ri man aj judeyibʼ taj» (Romanos 10:12).

Molom tzij: We ta kʼo jun Dios che qastzij kojuloqʼoqʼej mat xbʼan kʼax riʼ chke ri judíos.

 Ri qastzij: Ri Dios uyaʼom bʼe che ko kʼaxkʼolil are kʼu are ta kbʼanowik (Santiago 1:13; 5:11).

 Rech kqʼalajisax jujun taq molom tzij che bʼim chrij, y ri rumal che uyaʼom che k’a kʼo na kʼax. Ri Biblia kubʼij che are ri Itzel tajin kuqʼat tzij puwiʼ ri uwach Ulew, y man are ta ri Dios (Lucas 4:1, 2, 6; Juan 12:31). Chqilaʼ kebʼ jastaq che kojutoʼ che uchʼobʼik jasche ri Dios xuya bʼe che xbʼan kʼax chke e jujun judíos.

1.   Ri Dios kuya bʼe chke ri winaq che kkichaʼ ri kkaj kkibʼano. Ri Dios xuya ubʼixik chke ri Adán y Eva, ri kraj ri areʼ che kkibʼano are kʼu xeʼutaqchiʼj ta che ubʼanik. Ri e areʼ kitukel xkichaʼ ri xkaj xkibʼano. Y rumal ri xkichaʼ ubʼanik xukʼam lo ri kʼax chqij qonojel (Génesis 2:17; 3:6; Romanos 5:12). Rumal laʼ chi jun winaq utz ta uchaʼik jun jastaq kubʼano kuriq kʼax. Jun wuj che kchʼaw chrij ri judaísmo kubʼij: «Ri rumal che kʼo sibʼalaj kʼaxkʼolil cho ri uwach Ulew are che ri winaq utz ta kkibʼan che uchaʼik ri kkibʼano». Ri Dios uyaʼom bʼe che ri e winaq kkichaʼ ri kkaj kkibʼan pa ri kikʼaslemal.

2.   Ri Dios kraj y kkun che usukʼumaxik ri kʼax che xbʼan chke ri judíos. Ri areʼ kubʼij che keʼukʼasuj na e kʼi winaq che e kaminaq, chkixoʼl e kʼo ri judíos che xekamisaxik. Xuqujeʼ kubʼano che ksach chke ri winaq ri itzelal che xbʼan chke ojer kanoq (Isaías 65:17; Hechos 24:15). Ri loqʼoqʼebʼal che kunaʼ ri Dios chke ri winaq kubʼano che kutzʼaqatisaj na ri kubʼij (Juan 3:16).

 E kʼi winaq che xekʼojiʼ pa ri tiempo che xbʼan kʼax chke ri judíos, kiriqom utzilal pa ri kikʼaslemal y kikʼutum ri kikojonik chrij ri Dios. ¿Jas xetoʼwik? Are uchʼobʼik jasche ri Dios uyaʼom bʼe che kʼo itzelal y che xa jubʼiqʼ chi kraj kusachisaj uwach.