1, 2. 1) ¿Imanirtaj apóstol Pabluga nergan imapitapis “mas aliqa kaykan kuyanakushqantsimi”? 2) ¿Ima tapucuycunapitataj canan yachacushun?

 APÓSTOL Pabluga parlamurgan Diosman yäracunapaj, imata shuyarashganchipita y cuyacuypitapis. Pero nergan: “Lapanpitapis mas aliqa kaykan kuyanakushqantsimi” (1 Cor. 13:13). ¿Imanirtaj chayno nergan? Shamoj tiempucho ricashunmi Jehovapa lapan aunicuynincuna cumplicushgantana. Pero Jehovatawan runa masinchicunata cuyashganchega imaycamapis jinala winaycämungami.

² Cananga caycunapita yachacushun: ¿Imanirtaj jucninchi jucninchi cuyanacushun? ¿Imacunata rurartaj cuyanacunchi? ¿Imatataj rurashwan yäracoj masinchicunata cuyashganchi mana ushacänanpaj?

3. ¿Imanirtaj jucninchi jucninchi cuyanacushun?

³ Rasunpa cristiano cashganchitaga ricächicunchi jucninchi jucninchi cuyanacuptinchiraj. Chaymi Jesusga apostulnincunata cayno nergan: “Kuyanakäriptikimi pïmaypis musyapäkunqa discïpulükuna kashqaykita” (Juan 13:35). Rasunpa cuyanacuptinchega,  Pablo nishganno juc shongunola cawacushun (Col. 3:14). Jina caytapis apóstol Juan yäracoj masincunata nergan: “Tayta Diosta kuyarqa runa mayikitapis kuyay” (1 Juan 4:21). Chauraga, Jehovata cuyashganchega ricacanga yäracoj masinchicunata cuyaptinchiraj.

4, 5. ¿Imanotaj musyanchi Jehovapaj cuyacuyninchi imano cashganta? Tantiachicamuy.

⁴ ¿Imanirtaj ninchi hermanunchicunata cuyarga Jehovatapis cuyaycanchi? Cayman yarpäshun: juc doctorga pilapapis shongun imano cashganta musyananpäga pulsuntarämi yataycun. ¿Imataj chaypita yachacunchi?

⁵ Juc doctorga juc runapa pulsun débil o fuerte caycashganta yataycur-raj musyan shongun imano cashganta. Chaynolami noganchipis waquincunata cuyashganchichomi ricacämunga Jehovapaj cuyacuyninchi imano cashganta. Chaura yäracoj masinchicunata alapa manana cuyashganchita cuentata gocurga, Jehovapaj cuyacuyninchipis ushacaycanmanchi. Pero hermanunchicunata alapa cuyashganchiraycur imaycatapis ruraptinchega, Jehovapaj cuyacuyninchipis masraj winaycanga.

6. ¿Imaraj pasaycanman yäracoj masinchicunata alapa manana cuyarga? (1 Juan 4:7-9, 11).

⁶ ¿Imaraj pasanman yäracoj masinchicunata alapa manana cuyarga? Chayno captenga Jehovawan amistäninchipis peligruchochi caycanman. Chaymi apóstol Juan cayno nergan: “Runa mayintsita rikaykar mana kuyaykarqa ¿imanöparaq mana rikashqantsi Tayta Diosta kuyashwan?” (1 Juan 4:20). ¿Imataj yachacunchi? Jehovata cushichiyta munarga jucninchi jucninchirämi cuyanacushun (leiriy 1 Juan 4:7-9, 11).

7, 8. ¿Imanopataj ricächicunchi rasunpa cuyanacushganchita?

⁷ Bibliachoga achca cuticunacho cayno nimanchi: “Jukniki juknikipis kuyanakäriy” (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Pero cuyacuyninchega shogulanchichomi yurimun; pipis ricayta puedinchu. Chauraga, ¿imanopataj waquincunaga musyapäcunman cuyacoj cashganchita? Chayga ricacämunga rurayninchicunacho y parlashganchichopis.

⁸ Ricärishun imanotaj ricächicunchi yäracoj masinchicunata rasunpa cuyashganchita. Bibliaga nimanchi “ama lulapänakuytsu” (Zac. 8:16). ‘Runa mayikiwan kuyanakur ali kaway’ (Mar. 9:50). “Wakinkunapis ali kawananpaq yarpachakäriy” (Rom. 12:10). ‘Jucniqui jucniquipis shumaj chasquinacuy’ (Rom. 15:7, TDI). “Perdonanakäriy” (Col. 3:13). “Jukniki juknikipis shakyätsinakur yanapanakäriy” (Gál. 6:2). “Jukniki juknikipis shakyätsinakäriy” (1 Tes. 4:18). “Jukniki juknikipis tantiyatsinakur shakyätsinakäriy” (1 Tes. 5:11). “Jukniki juknikipaqpis Tayta Diosta manakäriy” (Sant. 5:16).

9. ¿Imanirtaj waquincunata shogaptinchiraj ricächicunchi cuyacoj cashganchita? (Fotucunatapis ricay).

⁹ Cananga maslata yachacurcushun  imata rurartaj cuyanacunchi. Pablo nergan: “Jukniki juknikipis shakyätsinakäriy”. ¿Imanirtaj chayta ruraptinchiraj rasunpa cuyanacuycanchi? Juc librupis cayta nin: “‘Shacyächinacuyga’ ninanmi ‘pipis sasacunapa pasaycaptin laduncho caycashwan shacyächinapaj’”. Chauraga maygan hermanunlanchipis nacaycajta ricar shacyächiptinchega yanapacuycanchi jinala Jehovata sirviycänanpaj. Jina wagaycajta ricarga, paycunawan waganchi, chaynopa ricächicunchi paycunata cuyashganchita (2 Cor. 7:6, 7, 13).

10. ¿Imanotaj laquipäcoj runaga?

¹⁰ Juc runa laquipäcoj captenga, maquincho caycashgantami ruran nacaycajta shacyächinanpaj, shogananpaj y puedishganmanno yanapananpäpis. Chaura puntataga laquicunraj pipis nacaycashganta ricar, nircur calpachacun imanolapapis yanapananpaj. Y chay lapantaga shongupitami ruran. Chaynolami Jehovapis noganchiwan ruran. Pabluga nergan Jehová runacunata cuyapashganraycurmi shogan. Aumi, Jehová Diosga “kuyapämantsi y imaypis shakyätsimantsi” (2 Cor. 1:3). Chauraga Taytanchi Jehovano laquipäcoj manami pipis canchu. Payga “ima nakaycho kaptintsipis shakyätsimantsi” (2 Cor. 1:4). Juc runa pasaypa yacunaycaptin yacuta upuptenga alina ricacun, chaynolami Jehovapis cuyamashpanchi shogamaptinchega shongunchipis ancashyarcunraj. ¿Imaraj noganchitapis yanapämäshun waquincunata laquipar shoganapaj? Jehovano laquipäcoj captinchimi. ¿Imanotaj chayta rurashwan? Ricärishun.

11. Colosenses 3:12 y 1 Pedro 3:8 nishganno, ¿imaraj yanapämäshun waquincunata cuyapar shoganapaj?

¹¹ Yäracoj masinchicunawan waran waran jinala cuyanacunapaj y shacyächinacunapäga, paycunawan juc shongunola cuyapänacur cawacushwan. Chaypäga paycunaman yarpachacushun y familianchitano ricashun (leiriy Colosenses 3:12; 1 Pedro 3:8). Cuyapäcoj captinchega mayna yarpaycanchina nacaycajcunata imanolapapis yanaparcunapaj. Jesuspis nergan: “Runaqa shonqun yarpashqantami alitapis o mana alitapis parlan. Ali runaqa shonqun alita yarpashqantami parlan” (Mat. 12:34, 35). Chauraga, hermanunchicunata cuyapar shogaptinchega, ricacämun paycunata alapa cuyashganchitami.

12. 1) ¿Imapitataj cuidacunapaj Jesusga nergan? 2) ¿Imatataj lapanchi tapucushwan?

¹² Lapanchimi cay mandatuta cäsucuyta munanchi: “Juknintsi juknintsipis kuyanakushun” (1 Juan 4:7). Pero Jesusga nergan canan wichan imayca mana alicuna miraptin runacunaga “mana kuyanakunqanatsu” (Mat. 24:12). Chaywanga manami niycarganchu discipuluncuna manana cuyanacunanpaj. Pero cuidacunanchimi Diosta mana cuyaj runacunano mana canapaj. Chaymi canan cay tapucuyman yarpachacushun: ¿imalapis caycanchuraj musyanapaj hermanunchicunata  alapa cuyaycashganchita o manapis? Ricärishun.

13. ¿Ima pasaptintaj musyacanga rasunpa cuyacoj cashganchita?

¹³ Pilapis jagayächimashganchi hora imata rurashganchichomi musyacanga rasunpa cuyacoj cashganchi o manapis (2 Cor. 8:8). Apóstol Pedruga nergan: “Imano karpis lapan shonquykiwan kuyanakäriy. Rasunpa kuyakuq runaqa imaykata ruraptinpis perdonanmi” (1 Ped. 4:8). Chaura hermanunchicuna pantarcuptin o contranchicho imalatapis ruraptin cuyanapaj sasa captinpis, jinalami cuyashun.

14. 1 Pedro 4:8 textuga, ¿imano cuyanacunapaj nimanchi y imawantaj tincuchishwan?

¹⁴ Pedro nishganta shumaj tantiarcushun. 8 caj versículo galaycunancho payga nergan: “Lapan shonquykiwan kuyanakäriy”. Y chay versiculupa ushananchona nin “kuyakuq runaqa imaykata ruraptinpis perdonanmi”. Imanomi juc telawan imayca mana alicunata o mana ricacänanpaj cajcunata chaparcunchi, chaynolami shongupita rasunpa  cuyacoj carga yäracoj masinchicuna cutin cutin pantarcuptinpis jinala perdonashunmi.

15. ¿Rasunpa cuyacoj carga imatataj rurashwan? (Colosenses 3:13).

¹⁵ Yäracoj masinchicunata alapa cuyarga calpachacushunmi pantashgancunata perdunanapaj, chaytaga rurashwan sasa captinpis (leiriy Colosenses 3:13). Waquincunata perdonashganchichomi ricacämunga rasunpa cuyacoj cashganchita, y Jehovata cushichiyta munashganchitapis. ¿Ima masraj yanapämäshun waquincuna pantashgancunalaman mana yarpänapaj?

16, 17. ¿Imataj rurashwan waquincunapita ali cajcunalata yarparänapaj y imawantaj tincuchishwan? (Fotucunatapis ricay).

¹⁶ Waquincuna alita rurashgancunaman yarpachacushun, pantashgancunamanga mana. Cayman yarpäshun, gamshi hermanucunawan cushi cushila carcaycar fotucunata tomacunqui. Pero juc foto mana ali yarguptenga, ¿imataj chay fotuwanga ruranqui? Borrarinqui ¿au?, y ali caj fotucunalawanchi quedacunqui.

¹⁷ Chararashganchi fotucunata ricaycurga yarpanchimi unaycho hermanunchicunawan ali pasashganchita. Pero imaylapis paycuna pantarcuptenga,  ¿imataraj rurashwan? ¿Chaylaman yarparaycäshunchuraj? Manami. Imanomi juc mana ali fotuta borrarinchi, chaynolami hermanunchi pantashgantapis umanchipita borrarishwan (Prov. 19:11; Efes. 4:32). Aumi, imaycacuna caycan hermanunchiwan ali pasashganchita yarparänapaj, chaymi pantashgantaga jucla gongashwan. Chayta rurarga paycunapita “ali cajcunalatami yarpäshun”.

18. ¿Imatataj canan yachacushcanchi?

¹⁸ ¿Imanirtaj calpachacushwanraj cuyacuyninchi mana ushacänanpaj? Canan ricashganchino yäracoj masinchicunata cuyaptinchirämi Jehovatapis cuyaycanchi. Y chayga ricacämun hermanunchicunata shacyächiptinchi y shogaptinchipis, chaypäga laquipäcoj runa cananchi. ¿Imanotaj ricächicunchi lapan shongunchiwan cuyanacushganchita? Waquincuna pantashgancunata perdonaptinchi.

19. ¿Imanirtaj canan wichan masraj cuyanacunanchi?

¹⁹ ¿Imanirtaj canan wichan masraj cuyanacunanchi? Apóstol Pedruga nergan: “Kay patsa ushakänanpaq walkalanami pishiykan. [Chaymi] imano karpis lapan shonquykiwan kuyanakäriy” (1 Ped. 4:7, 8). ¿Imacunaraj pasanga ushacay junaj caylachona caycaptin? Jesús cayno nergan gatejnincunapaj: “Noqaman yärakamashqaykipitami pïmaypis chikipäkushunkipaq” (Mat. 24:9). Chaymi waquincuna chiquimaptinchipis Jehovata jinala sirvinapäga, juc shongunola cuyapänacur cawacushwan. Chayta rurarga, Satanás hermanunchicunapita raquichimäshunchu y juc shongunolami cawacushun (Col. 3:14; Filip. 2:1, 2).