1. ¿Imatataj yarpapäcun waquin runacuna imacamayajpis cawapäcunanpaj yarparir?

 ACHCA runacuna ali cawananpäga ali micuyta micupäcun fisicatapis rurapäcun. Chayno captinpis manami yarpanchu imaycamayajpis cawananpaj. Waquincuna mana ushacaj cawayta tarinapäga manami creinchu y waquincunana “imapäraj nacaycalar cawashun” nir yarpapäcun. Juan 3:16 y 5:24 textucunacho Jesusmi nergan imaycamapis cushishga cawayta puedishganchita.

 2. Juan libro sojta caj capitulucho, ¿imatataj nin mana ushacaj cawaypita? (Juan 6:39, 40).

² Jesús achca runacunata tantata pescadutapis garargan, chayga almiraypaj milagro cashga. a Warannin junaj Capernaúm marcachona caycar, Jesús runacunata yachachergan wanojcuna cawarimunanpaj cajta y mana ushacaj cawayta tarinanpaj, cay yachachishganta milagrupitapis más almiraypaj cashga (leiriy Juan 6:39, 40). Wanushga amiguyquicunaman y familiayquicunamanpis yarpay. Jesusmi nergan paycuna cawarimunanpaj y mana ushacaj cawayta tarinanpäpis. Ichanga sojta caj capítulo Juan librucho, Jesús mastaraj  yachachergan, y nishganta tantiananpaj waquincunapaj sasami cashga. Canan chaypita yachacushun.

 3. Juan 6:51 nishganno, ¿imatataj Jesús quiquinpita yachachicurgan?

³ Capernaúm marcacho runacunata Jesús tantata garashganpita, yarpächergan unay Jehová israelitacunata manata garashganta. Bibliacho maná cajpita nin ‘jana patsapita kaq tanta’ (Sal. 105:40; Juan 6:31). Chay hora Jesús yachachergan maná tanta cielupita shamushganta. Chay manata micojcunaga tiempuwanga wanurganmi (Juan 6:49). Jesús quiquinpita parlar nergan Dios camacächishgan ‘jana patsapita rasunpa kawatsikuq tanta’ cashganta (Juan 6:32, 33, 35). Nircur Jesús tantiachicurgan payga maná tantawan igual mana cashganta. Paymi nergan: “Noqami jana patsapita shamuq kawaykaq tanta kaykä. Pipis kay tantata mikurqa mana ushakaq kawaytami tarinqa” (leiriy Juan 6:51). Jesús parlashganta judiucuna mana tantiacurganchu. Paycuna capazchi nergan: ¿imanirtaj payga nin maná tantapitapis más ali cashganta? Chauraga Jesús cayno nergan: “kay tantaqa kikïpa aytsämi kaykan”. Jesús parlashganta ali tantiarga noganchi familianchipis imaycamapis cawayta tarishunmi. Mä ricärishun.

JESUSPA CUERPUN TANTANOMI CAYCAN

 4. ¿Imanirtaj waquincuna Jesusta wiyaycur alapa manchacärirgan?

⁴ Jesusta wiyajcuna aychanta garananpaj niptin waquincunaga manchacärirgan. Y cayno nergan: “¿imanöpataq kay runa aytsanta mikatsimäshun?” nir (Juan 6:52). Nircur Jesús nishganga más almiracuypaj cashga: “Runapa Tsurinpa aytsanta mana mikurqa y yawarninta mana upurqa manami mana ushakaq kawayta taripäkunkitsu” (Juan 6:53).

 5. ¿Imanirtaj mana yarpashwanchu Jesusga yawarninta runacunata upuchinanpaj?

⁵ Noé cawashgan wichanchona Jehová nergan runacuna yawarta mana micunanpaj (Gén. 9:3, 4). Israelitacunapa tiempunchopis Jehová mandargan pipis yawarta micuptenga wanuchishga cananpaj (Lev. 7:27). Jesusga Diospa Leyninta imaypis cäsucojmi (Mat. 5:17-19). Chauraga payga yarpaylapis yarparganchu runacunata aychanta micuchinanpaj y yawarninta upuchinanpaj. Mas bien caywanga Jesús tantiachiyta munargan mana ushacaj cawayta runacuna taripäcunanpaj (Juan 6:54).

 6. ¿Imataj yanapämanchi Jesús aychanpita yawarninpita nishganta tantianapaj?

⁶ Chauraga Jesús aychanpita y yawarninpita parlarga, ¿imapitaj tantiachicuycargan? Shumaj tantiarinapaj samaritana warmipita parlashganta ricärishun, Jesús payta nergan: “Noqa kamaripashqä yakuta upuq kaqmi itsanqa imaypis mana yakunanqatsu. Tsay kamaripashqä yaku shonquncho pukyuno kaptinmi imayyaqpis kawanqa” (Juan 4:7, 14). b Jesusga manami niycarganchu samaritana warmi yacuta  upushganlapita manami cawangachu. Nircur Capernauncho caycaj runacunata manami nirganchu aychanta micur y yawarninta upur mana ushacaypa cawayta tarinanpaj cajta.

¿SANTA CENAPÄCHURAJ PARLAYCARGAN?

 7. ¿Imataj waquincuna nipäcun Juan 6:53 textucho Jesús nishganpita?

⁷ Waquin religiosucuna nipäcun Señorpa Cenanman aywajcuna tantata micunanpaj y vinutapis upunanpaj cajta. Paycunapaj Juan 6:53 textucho Jesús nishganga igual-lami caycan Jesús Santa Cenata camacachishganwan (Mat. 26:26-28). ¿Imanirtaj chayta shumaj tantiashwan? Cada watami Señorpa Cenanta yarpänapaj Jehovapa testiguncunawan chaychicaj runacuna shuntacan. ¿Lapanchuraj tantata micunman y vinutapis upunman? Manami. Juan 6:53 textucho Jesús camacächishganga Santa Cenacho nishganwan manami igualchu caycargan.

 8. ¿Juan 6:53 textucho Jesusga Santa Cenapäcu parlaycargan? (Dibujucunatapis ricay).

⁸ Jesús parlashganga manami igualchu caycargan. Puntataga Juan 6:53-56 textucunacho Jesusga parlapargan Galileacho judío runacunata, y chayga cargan 32 watacho. Juc cajga  cargan Santa Cenata 33 wata Jerusalencho. Galileacho wiyaj runacunaga casi lapancuna pachalanpämi yarparaycargan, chaymi Jesús yachachishganta wiyayta munarganchu (Juan 6:26). Y Jesús nishganta shumaj mana tantiar aywacärirgan (Juan 6:14, 36, 42, 60, 64, 66). Juc wata pasarcuptin ichanga Jesús Santa Cenata camacächergan chunca juc fiel apostulnincunawan caycar. Paycuna lapanta mana tantiarpis, yäracurganmi Jesús Diospa wamran cashganta y cielupita uramushganta (Mat. 16:16). Chaymi Jesús paycunata felicitargan cayno nir: “Ima nakaycho kaptïpis noqawanmi imaypis qamkuna kashqanki” (Luc. 22:28). Chauraga manami nishwanchu Juan 6:53 textucho nishganga Santa Cenapita cashganta. Pero masmi caycan tantianapaj.

JESÚS PARLASHGANGA IMANOTAJ YANAPASHUNQUI

 9. ¿Pïcunapätaj Jesús parlaycargan Santa Cenacho?

⁹ Jesús apostulnincunawan Santa Cenata rurar levaduraynaj tantata macyar nergan: cayga “cuerpümi kaykan”. Y vinuta macyar cayno nergan: cayga “Dios pactuta rurananpaq jichashqä yawarnïmi” caycan (Mar. 14:22-25; Luc. 22:20; 1 Cor. 11:24). Mushoj pactutaga Jesús manami lapan runacunawanchu rurargan sinoga Diospa Gobiernuncho gobernananpaj acrashga cajcunalawan (Heb. 8:6, 10; 9:15). Chay hora apostulcunaga manami lapanta tantiarganchu. Nircur ichanga santo espirituta chasquipäcurgan y cielucho Jesuswan mandacämunanpaj acrashga cargan (Juan 14:2, 3).

10. ¿Santa Cenacho Jesús parlashgan y Galileacho parlashganga igualchu caycan? (Fotutapis ricay).

¹⁰ Santa Cenacho Jesús fiel apostulnincunawanmi caycargan. Paycunaga ‘walka uyshacunapita’ cajcunami caycan (Luc. 12:32). Chaypita pacha paycunano cielupa acrashga cajcunaga tantata micunman y vinutapis upunman. Paycunaga cielucho Jesuswanmi carcaycanga. Jesús apostulnincunawan parlashgan y Galilea runacunawan parlashganga manami igual-lachu caycan. Galileachoga achcajmi caycargan, chauraga Jesús achca runacuna bendiciuncunata chasquinanpaj parlaycargan.

11. ¿Galileacho Jesús parlashgan walca runacunalapächu cargan?

¹¹ 32 wata Galileacho Jesús pachalanpaj yarparaj judiucunata parlargan. Paycunatami Jesús yachachiyta munargan imaycamapis bendiciuncunata taripäcunanpaj, pipis wanuptinpis yapay cawarimunanpaj shamoj tiempucho. Y chayga manami carganchu walcajlapaj Señorpa Cenancho cashganno, sinoga Jesús Galileacho parlargan achca runacuna bendiciuncuna chasquipäcunanpaj. Chaymi Jesús nergan: “Pipis kay tantata mikurqa mana ushakaq kawaytami tarinqa. Kay tantaqa kikïpa aytsämi kaykan. Runakuna mana ushakaq kawayta tarinanpaqmi aytsäta sacrificiutano Tayta Diosta qoykushaq” (Juan 6:51). c

12. ¿Imatataj rurashwan imaycamapis cawanapaj?

 ¹² Galileacho Jesús manami nerganchu lapan runacuna imaycamapis cawanapaj, sinoga payman yäracur cäsucojcunalami. Yäracuyninchi manami shimilapitachu canman ‘nogaga Jesusman creyïmi, paymi salvamashga’ nir (Juan 6:29). Jesús parlashgan judiucunaga galanancho Jesusman creirganmi, nircur ichanga waquincuna payta jaguirir aywacurgan. ¿Imanirtaj chayta rurargan?

13. ¿Imatataj pipis ruranman Jesuspa rasunpa discipulun cananpaj?

¹³ Galileacho Jesús yachachishgan runacunaga munargan pay gueshyajcunata alchacächinanpaj, pachanta garananpaj y munashgalanta yachachinanpaj, chaycunaraycu Jesusta gatirpaycargan. Pero Jesús cay Pachaman manami shamurganchu runacuna munashgalanta rurananpaj. Payga munargan runacuna rasunpa discipulun cananpaj. Chaypäga lapan yachachishganta chasquicunman y cäsucunmanpis (Juan 5:40; 6:44).

14. ¿Imatataj rurashwan imaycamapis cawacunapaj?

¹⁴ Jesús yachachergan yäracoj cananpaj. Paymi cuerpunta yawarninta sacrificiuno entreganan cargan, chaymi judiucuna Jesús wanushganman yäracärinan cargan mana ushacaj cawayta tarinanpaj. Canan wichan noganchipis chayman yäracunanchi (Juan 6:40). Juan 6:53 textucho Jesús nishganga  tantiachimanmi pay wanushganman yäracuptinchiraj mana ushacaj cawayta tarishun. Jesús wanushganman pï maypis yäracuyta puedinmi imaycamapis cawacunanpaj (Efes. 1:7).

15, 16. ¿Imacunataj yachacunchi Juan sojta caj capitulupita?

¹⁵ Juan sojta caj capítulo nishganga lapanchita shacyächimanchi. Chaycho yachacunchi Jesús runacunata alapa cuyashganta. Galileacho caycar gueshyaycajcunata jampirgan, Diospa Gobiernunpita yachachergan, pachantapis gararganmi (Luc. 9:11; Juan 6:2, 11, 12). Jina más ali cargan cawachicoj tanta cashganta yachachishganmi (Juan 6:35, 48).

¹⁶ Jesús nerganpis waquin uyshancuna juc laducho caycashganta, paycunaga Jesús wanushganta Yarpänapaj junajcho manami tantata micunchu y vinutapis upunchu (Juan 10:16). Pero Jesús wanushganman yäracushganraycu paypa aychanpita y yawarninpita bendiciuncunata chasquin (Juan 6:53). Tantata micojcuna y vinuta upojcunapis Jesuswan pactuta rurashganpita cielucho gobernananpaj acrashga caycan. Chauraga, Juan sojta caj capitulupita yachacunchi cielupa acrashga captinchi o cay Pachacho cawanapaj caycaptinchipis, Jesús wanushganman yäracunanchi mana ushacaj cawayta tarinanchipaj.