Salmos 2:1-12
2 ¿Imanirtaq runakuna Diospa contran sharkapäkun?¿Imanirtaq manakaqkunata yarpapäkun?
2 Manakaqkunata yarparmi nacionkunapa mandaqnin reykuna kamarikurkaykan guërrata rurananpaq.Paykunaqa Tayta Diospa contran y akrashqan reypa contran sharkunanpaqmi wilanakurkaykan* kayno nir:
3 “¡Munaynincho kashqantsipita yarqukushun!¡Makincho kashqantsipita qeshpikushun!”
4 Paykuna tsayno parlaptinmi jana patsacho Tayta Dios asikun.Tsay wilanakushqantapis manakaqmanmi churan.*
5 Nirkur fiyupa rabyashpanmi olqüpan.Pasaypa mantsakätsirmi kayno nin:
6 “Akrashqä runatami churashqä rey kananpaq.Paymi *Sión *sagrädu jirkancho mandaq kaykan”.
7 Tayta Diosmi kayno nimashqa:“Qamqa tsurïmi kanki.Kanan junaqpitaqa taytaykinami kaykä.*
8 Manakamaptikiqa lapan nacionkuna herenciayki kananpaqmi qoykushayki.Kay patsatapis qampa kananpaqmi juk kuchupita jukaq kuchunyaq qoykushayki.
9 Fiërru väraykiwanmi nacionkunata vincir ushakätsinkipaq.*Mitu mankata shaluriqnömi paykunata asulankipaq”.
10 Nacionkunapa mandaqnin reykuna, lapayki shumaq tantiyakäriy.Kay patsacho mandaqkuna, kay nishqäta shumaq chaskikäriy.
11 Tayta Diosta *mantsakur payta sirvipäkuy.Mantsakuypa adorapäkuy.
12 Diospa tsurinta respitar qonqurpakäriy.Mana respitaptikiqa jinan höra rabyakushpanmi wanutsishunkipaq.¡Payman yärakuqkunaqa kushishqami kawanqa!
Ichic wilacuycuna
^ 2.1-2 Hech. 4.25-26.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ sagrädu Liyinki santupita tantiyatsikuyta.
^ 2.7 2Sam. 7.14; Hech. 13.33; Heb. 1.5; 5.
^ 2.9 Apoc. 2.26-27; 12.5; 19.15.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
