Juan 2:1-25
2 Tsaypita kimsa junaqtanami casaray fiesta karqan Galileacho kaykaq Caná markacho. Tsay fiestachömi Jesúspa mamanpis kaykarqan.
2 Tsaymanmi Jesústapis discïpulunkunatawan qayatsirqan.
3 Fiesta manaraq ushakaptinmi vïnu ushakäkurqan. Tsawraqa Jesústa maman kayno nirqan: “Vïnu ushakäkushqanami”.
4 Tsayno niptinmi Jesús kayno nirqan: “Mamay, ¿imanirtaq tsayno niykämanki? Manaraqmi hörä chayamunraqtsu”.
5 Jesúspa mamannami sirvientikunata kayno nirqan: “Jesús nishushqaykita lapanta rurapäkuy”.
6 Tsaychömi rumipita rurashqa soqta urpukuna karqan. Tsay urpukunamanmi yakuta winapäkuq costumbrin kashqanno purificakunanpaq. Tsay urpukunaman pachak (100) litrunömi yaku yaykuq.
7 Tsawraqa sirvientikunata Jesús kayno nirqan: “Tsay urpukunaman yakuta juntaqpaq winapäkuy”.
Tsaymi yakuta winarqan juntashqanyaq.
8 Juntarkuptinnami Jesús kayno nirqan: “Ichiklata chaqarkur apapäkuy mayor sirvienti yawananpaq”.
Tsayno niptinmi Jesús nishqannöla chaqarkur apaparqan.
9 Mayor sirvienti yawarkurmi tantiyarqan ali kaq vïnu kashqanta. Itsanqa manami musyarqantsu maypita apashqantapis. Yanapaq kaq sirvientikunalami musyarqan maypita kashqantapis. Yawarkurnami casaraq mözuta qayaykur
10 kayno nirqan: “Wakin runakunaqa fiesta qalaykunalanchömi alinnin kaq vïnuta sirvitsin. Umatarkuptinnami sheqi kaqlatana sirvitsin. Tsayno kaptinpis qamqa fiesta ushananchöraq mas alinnin kaq vïnuta sirviykätsinki”.
11 Tsaynömi Galileacho kaykaq Caná markacho punta kaq milagruta Jesús rurarqan. Munayniyuq kashqanta rikarmi discïpulunkuna payman yärakärirqan.
12 Tsaypitanami mamanwan, wawqinkunawan y discïpulunkunawanpis Capernaúm markaman Jesús aywarqan.* Tsaychöqa walka junaqlami qoyäpäkurqan.
Templucho rantikuqkunata Jesús qarqushqan
Mateo 21.12-13; Marcos 11.15-17; Lucas 19.45-46
13 Israel runakunapa *Pascua* fiestan qalaykunanpaqna kaykaptinmi Jesús aywarqan Jerusalénman.
14 Chayashpanmi templu patiucho runakunata tarirqan törukunata, uyshakunata y palumakunatapis rantikurkaykaqta. Tsaynöpis tarirqan qellay rantikuqkunata.*
15 Tsayno tariykurmi sumbadorta rurarkur lapan rantikuqkunata uyshantinta töruntinta templu patiupita Jesús qarqurqan. Qellay trukatsiqkunapa mësankunatapis tikrarmi qellayninkunatapis mashtar usharqan.
16 Paluma rantikuqkunatanami kayno nirqan: “¡Kaykunata jorqapäkuy! ¡Imanirtaq papänïpa wayinta mercäduman tikratsishqanki!”
17 Jesús tsayno ruraptinmi discïpulunkuna yarparqan Tayta Diospa palabrancho kayno qelqaraykashqanta: “Templuykitaqa wanuy kawaymi respitatsishaq”.*
18 Israel autoridäkunanami Jesústa kayno nirqan: “¿Ima munaynikiwantaq rantikuqkunata qarqushqanki? Mä milagruta ruray munayniyuq kashqaykita musyapäkunäpaq”.
19 Tsayno niptinmi Jesús nirqan: “Kay templuta juchutsipäkuy. Juchutsiptiki kimsa junaqlatami sharkatsishaq”.*
20 Autoridäkunanami kayno nipäkurqan: “Kay templuta chusku chunka soqta (46) watatami sharkatsipäkushqa. ¿Imanöpataq qam kimsa junaqlata sharkaratsinkiman?”
21 Tsayno nirpis Jesús manami templupitatsu parlarqan, sinöqa templuman tinkutsikur kikinpaqmi parlarqan.
22 Wanushqanpita kawarimuptinnami Jesúspa discïpulunkuna yarparqan tsayno nishqanta. Tsaynöpami Jesús nishqanta y Tayta Diospa palabran nishqantapis criyipäkurqan.
Runakuna imata yarpashqantapis Jesús musyashqan
23 Jerusaléncho kaykar *Pascua fiestacho milagrukunata Jesús ruraykashqanta rikarmi Jesúsman atska runakuna criyipäkurqan.
24 Tsayno kaptinpis runakuna janan shonqula criyipäkushqanta musyarmi paykunaman Jesús mana yärakurqantsu.
25 Mana wilapaykaptinmi runakuna imata yarpashqantapis musyarqan.
Ichic wilacuycuna
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 2.13 Éxo. 12.1-27; Deut. 16.1-8.
^ 2.14 Jesús kawanan witsanmi Roma runakunapa qellayninta Israel runakuna tsararaq imatapis rantipakunanpaq. Tayta Diospaq ofrendata apananpaqmi itsanqa templuman apananpaq kaq qellaytaraq rantipäkuq.
^ 2.19 Mat. 26.61; 27.40; Mar. 14.58; 15.29.
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
