Isaías 54:1-17
54 TAYTA DIOSMI kayno nin:“Qoluq warmi,* ¡kushikuy!Wawata mana tarirpis ¡kushikushpayki cantay!Runan kacharishqa karpis runayuq warmipita masraqmi wawata tarinkipaq.*
2 Atska wawaykikuna yurinanpaq kaykaptinqa tolduykita jatunta ruray.Estäcakunata jawirkur waskakunawan tolduykikunata siguray.
3 Qamqa atskaman mirarmi alawqa kaq lädupa y itsuq kaq lädupapis juntapäkunkipaq.Qampita miraqkuna atska nacionkunatami acaparanqa.Raqälana kaykaq markakunatapis altsarkurmi tsaycho tanqapaq”.
4 Ama mantsakuytsu. Manami pipis jamurpäshunkipaqtsu.Ama penqakuytsu. Manami pipis ashlishunkipaqtsu.Wawaynaq kar penqakushqaykitapis qonqankipaqmi.Viüdayar penqakushqaykitapis mananami yarpankipaqtsu.
5 Kamashuqniki Tayta Diosmi warminpaq shuntashunki.*Paypa jutinqa lapanta mandaq *Yahwehmi kaykan.Payqa ima desgraciapitapis tsapäshunkimi.Israel runakunapa *santu Diosninmi kaykan.Tsaymi pïmaypis musyanqa intëru munduta makincho tsararaq Dios kashqanta.
6 Runan kacharishqa warmino lakishqa kaykaptikimi TAYTA DIOS qayashurqayki.Mözu kay warminta juk runa shuntaqnömi shuntashurqayki.
Tayta Diosnikimi kayno nin:
7 “Qamtaqa walka junaqlami kachaykurqä.Kananqa pasaypa kuyapashpämi yapay shuntakushayki.
8 Pasaypa rabyashpämi juk tiempula qampita witikurqä.Kananpitaqa imaypis kuyapäshaykimi”.*Salvashuqniki TAYTA DIOSNIKIMI tsayno nin.
9 “Noé kawashqan witsanmi jurarqä kay patsata imaypis yakuwan manana ushakätsinäpaq.*Tsaynölami kananpis jurä yapay rabyarpis mana castiganäpaq.
10 Jirkakuna kuyuptinpis y jirkankuna siksikyaptinpis qamtaqa imaypis kuyapäshaykimi.Imaypis alila kawanaykipaq *pactu rurashqantsita cumplishaqmi”.*Kuyapäshuqniki TAYTA DIOSMI tsayno nin.
Mushuq Jerusalénpita nishqan
11 Jerusalén markatami Tayta Dios kayno nin:“¡Pasaypa kuyapaypaq marka!¡Nakatsishuptiki manami pipis kuyapäshunkitsu!Tsayno kaptinpis kikïmi carbunclo rumikunawan cimientuykita rurashaq.Tsay jananmanmi zafiro rumikunawan perqashaq.
12 Rubí rumiwanmi rikachakuna törrikikunatapis rurashaq.Carbunclo rumiwanmi punkuykikunatapis rurashaq.Intëru kuchunpa murällaykitapis kuyaylapaq rumikunawanmi perqashaq.*
13 “Kikïmi wamraykikunatapis yachatsishaq.*Yanapaptïmi pïmaywanpis ali kawanqa.
14 Reypis munashqänömi mandanqa.Manami pipis nakatsishunkipaqnatsu.Jawka kawarmi pitapis mana mantsakunkipaqnatsu.
15 Manami mayqan nación runakunatapis kachamushaqtsu asulashunaykipaq.Shamuptin imaptinqa kikinkunatami ushakätsinkipaq.
16 “Noqami herrërutapis kamashqä shanshawan warirkatsir fiërruta takar armakunata rurananpaq.Noqami soldädukunatapis kamashqä lapanta ushakätsinanpaq.
17 Tsaymi mayqan soldädu vincishunaykitapis kachapäshaqtsu.Yanapaptïmi imatapis jitapäshuqnikita upälatsinkipaq.Lapan sirvimaqnïkunataqa kikïmi salvashaq”.TAYTA DIOSMI tsayno nin.
Ichic wilacuycuna
^ 54.1 Kay versïculukunacho Jerusalén markata tinkutsin qoluq warmiman. Wawaynaq kashqanta nin Jerusaléncho taqkuna nacionninpita qarqushqa kaptinmi. Wawan kananpaq kashqanta nin Diosman yärakuqkuna atska kananpaq kaptinmi.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 54.7-8 Sal. 30.5; Isa. 60.10; Lam. 3.31-33.
^ 54.9 Gén. 9.8-17.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 54.10 Jer. 32.40; Mar. 13.31.
^ 54.11-12 Apoc. 21.18-21.
