Isaías 46:1-13
46 Bel diosqa vincishqami kaykan.Nebo diospis manakaqman churashqami kaykan.*Tsay dioskunatami uywakunawan cargarkur apakärin.Tsaykuna pasaypa lasarmi utikätsin.*
2 Tsay ïdulukunaqa saqtaptinpis manami sharkuntsu.Yärakushqan runakunata manami salvantsu.Tsay runakunata ïdulunkunatawanmi juk lädu nacionman prësu apakärin.
3 Tayta Diosmi kayno nin:“Jacobpita miraq Israel runakuna, mayapäkamay.Mamaykipa pachancho kashqaykipita patsami qamkunata tsapashqä.Yurishqayki junaqpitami marqashqa puritsishqä.
4 Awkinyaptikipis tsaynölami ali rikashayki.Pasaypa soquyashqatapis yanapashaykimi.Qamkunata noqami kamashqä.Maypa pusharpis jancharäshaykimi.
5 “¿Imamanraq tinkutsimanki?¿Piraq noqano kanman?
6 Wakin runakunami qorita y qellayta balanzacho pësarkur ïdulu ruraq runata pägapäkun ïduluta rurapänanpaq.Rurapaykuptinmi tsay ïdulupa nawpanman qonqurpakuykur adorapäkun.
7 Wintukurkur aparmi jamaränan kaqman jamaykatsin.Jamatsishqanpitaqa manami witikuntsu.Tsay ïduluqa mayjina ruwakäriptinpis manami salvantsu.*
8 “Mana cäsukuq runakuna, tsayta tantiyakur penqakäriy.
9 Unaypita patsa ayluykikunata imano yanapashqätapis yarpapäkuy.Noqalami Dios kä.Noqapita mas juk Diosqa manami kantsu.Manami ima ïdulupis noqaman tinkuntsu.
10 Noqami unaypita patsa ima pasananpaq kaqtapis wilakatsï.Pasananpaq atska wata pishiykaptinmi musyatsï.Ruranäpaq yarpashqätaqa lapantami rurä.
11 “Inti jeqamunan kaq lädupitami juk runata qayashqä.Aytsa pacha condornömi karu nacionpita shamunqa.Nishqäta rurananpaqmi tsay runata pushamushaq.Yarpashqänölami lapantapis rurashaq.
12 “Salvanäpaq kaqta mana criyiqkuna, cäsukamay.
13 Karu nacioncho kashqaykipita kutitsimushaykimi.Shuntamunäpaq walka junaqlanami pishiykan.*Sióncho tänaykipaqmi kutitsimushayki.Kuyashqä Israel runakuna kaptikimi salvamushayki”.
Ichic wilacuycuna
^ 46.1 Bel dios y Nebo diosqa Babilonia runakuna adorashqan dioskunami karqan. Tsay dioskuna vincishqa kashqanta y manakaqman churashqanta nirqan Persia nacionpa mandaqnin rey Ciro Babilonia nacionta vincinanpaq kaptinmi.
^ 46.1 Jer. 50.2; 51.44.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
