Isaías 33:1-24
33 ¡Wawalaw, ushakätsikuq Asiria nación!Wakin nacionta atacaptikipis qamtaqa manami mayqanpis atacashushqankiraqtsu.Juk nacionkunata traicionaptikipis qamtaqa manami mayqanpis traicionashushqankiraqtsu.Atacayta usharkuptiki kikikitami atacapäkushunkipaq.Juk nacionkunata traicionayta usharkuptiki kikikitami traicionashunkipaq.
2 TAYTA DIOS, kuyapaykalämay.Qamlamanmi yärakamü.Waran waran yanapaykalämay.Nakaykunapitapis salvaykalämay.
3 Räyunöraq parlashqayki mayakämuptinmi runakuna qeshpir aywakärin.Rabyashqaykita tantiyakurmi lapan nación runakuna maytsaypapis qeshpir aywakärin.
4 Paykunapa imaykankunatapis contrankunami apakärin.Tsaytsika chukluskunanöraqmi ushapäkun.
5 Munayniyuq TAYTA DIOS jana patsachömi kaykan.Paymi *Sióncho taq runakunata alita rurananpaq yachatsin.
6 Ima pasamaptintsipis paymi yanapamäshun.Paymi tantiyatsimäshun y yachaytapis qomäshun.Ima desgraciapitapis paymi salvamäshun.Tsaymi TAYTA DIOSTA *mantsakur riquëzata tsararaqno kaykantsi.
7 Contrantsikunata ruwakamunanpaq kachakunata kachaykaptintsipis paykunaqa mana kuyapaypami atacamashqantsi.Tsaymi geniuyuq soldäduntsikunapis y autoridänintsikunapis cällikunacho waqarkaykan.
8 Pipis manana puriptinmi nänikunapis chunyaraykan.Mana atacamänantsipaq awnirkamashpantsipis manami cumplipäkuntsu.*Testïgukunapa nawpancho promitishqantapis manami cäsupantsu.Manami runa mayintapis respitapäkuntsu.
9 Pasaypa lakikushpanmi kay patsapis antsa kaykan.Líbano muntipis penqakushpanmi tsakiykan.Sarón pampapis chunyaq jirkanömi rikakushqa.Basán jirka y Carmelo jirkapis qarayashqami kaykan.
10 Asiria runakunatami TAYTA DIOS kayno nin:“Kanan castigayta qalaykuptïmi musyankipaq lapanpaq munayniyuq kashqäta.
11 Qamkunapa yarpayniki tsaki punshanömi kaykan.Lapan rurashqaykipis trïgu päjanömi kaykan.Tsaymi päjata nina rupar ushaqno qamkunatapis ushakätsishaykipaq.
12 “Lapan markaykikunapis uchpayashqanyaqmi rupar ushakanqa.Tsakishqa kashata nina rupar ushashqannömi qamkunatapis ushakätsishunkipaq.
13 Karucho taqkuna, rurashqäkunapita parlashqanta mayapäkuy.Cercacho taqkuna, munayniyuq kashqäta tantiyakäriy”.
14 Sióncho jutsayuq runakuna pasaypa mantsakashqami karkaykan.Diosta mana cäsukuqkunami fiyupa mantsakushpan kayno nirkaykan:“Kay nakaykuna rupaykaq ninano kaykaptinqa ¿piraq kawanqa?Imaypis bunyaypa bunyar rupaykaq ninano kaykaptinqa ¿piraq salvakunqa?”
15 Tsaypita salvakunqa alilata ruraq runa,rasun kaqlata parlaq runa,pipa imantapis mana qechuq runa,sobornuta mana chaskipakuq runa,wanutsinanpaq niptinpis mana awniq runa,y mana ali ruraykunapita witikuq runami.*
16 Tsayno kawaq runaqa kay patsacho alimi kawanqa.Qaqacho rurashqa wayiman amparakuqnömi kanqa.Tsay runataqa manami imapis pasanqatsu.Paypaqqa mikuypis ni yakupis manami pishinqatsu.
17 Munayniyuq chipchipyaykaq reytami rikashun.Nacionnintsipa lindërunkunapis mas karucho kaykaqtami rikashun.
18 Tsaymi mantsakuypaq contrantsikunapaq yarparkur kayno nishunpaq:“Impuestu cobraqkunapis ni impuestu qellayta yupaqkunapis manami kannatsu.Contrantsi soldädukunapis törrintsikunata manami rikapannatsu”.
19 Tsay chikimaqnintsi jäpa runakunaqa mana tantiyashqantsi idiömapami parlapäkun.Paykunaqa ali chölu tukushpanmi pitapis mana respitantsu.Tsay runakunataqa manami rikashunpaqnatsu.
20 Tsaypa trukanqa Diosta alabana fiestata Sióncho rurarkaykaqtami rikashunpaq.Jerusaléncho runakuna jawka taykaqtami rikashunpaq.Estäcankuna mana tsutakaptin y wataraq waskankuna mana rachikaptin puritsina toldu següru kashqannömi Jerusalén markapis següru kanqa.
21 Tsaychömi TAYTA DIOS musyatsimäshun munayniyuq kashqanta.Jerusalén kuchunpa jatun mayu tumaypa tsaparaqnömi kanqa.Tsaymi contrantsikuna atacayta munamashpantsipis mana kamäpakunqatsu.
22 TAYTA DIOSMI jueznintsi kaykan.TAYTA DIOSMI leykunata qomashqantsi.TAYTA DIOSMI mandamaqnintsi rey kaykan.Paymi contrantsikunapita tsapämäshun.
23 *Büquipa mastilninpita* waskakuna paskakaptin aywayta mana kamäpakushqannömi contrantsikunapis kanqa.Wayra tanqananpaq büquipa vëlan mana mashtakaptin aywayta mana kamäpakushqannömi kanqa.Tsaymi chikimaqnintsikunata vincirkur imaykankunatapis rakipänakushunpaq.Weqrukunapis paykunapa imaykankunatami apakärinqapaq.
24 Sióncho taqkunataqa lapan jutsankunatami Tayta Dios perdonanqa.Tsaycho taq runaqa manami mayqanpis “qeshyaykämi” ninqapaqtsu.
Ichic wilacuycuna
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 33.8 Kay textucho parlaykan Asiria runakunapaqmi. Asiriapa mandaqnin rey Senaquerib mana atacananpaq awnirkurpis Jerusalénta atacananpaq tsaytsika soldädunkunata kacharqan (2Rey. 18.14-17).
^ 33.15 Sal. 15.2-5; 24.3-5.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 33.23 Büquipa mastilninqa kaykan büquipa chawpincho jatunkaray ichiraykaq qerumi. Büquipa vëlanqa mastilninpita warkaraykaq jatun toldumi kaykan. Vëlata wayra tanqaptinmi büquipis aywan.
