Isaías 3:1-26
3 ¡Kay nishqäta lapayki mayapäkuy!Lapanta mandaq TAYTA DIOSMI Judá nacionta kachariykunqa.Jerusalén markatapis mananami yanapanqanatsu.Tsaymi tsaycho taqkunapaq mikuypis ni yakupis mana kanqanatsu.
2 Tsaynömi mana kanqanatsu geniuyuq runakunapis ni soldädukunapis,juezkunapis ni profëtakunapis,rikakuqkunapis ni mayor runakunapis,
3 mandaq capitankunapis ni marka mandaq runakunapis,yätsikuqkunapis, ali yachaqkunapis ni brüjukunapis.
4 Mandaqninkuna kananpaqmi tsayraq yachakuq mözukunalata y wamrakunalata churapäkunqa.
5 Kikinpura pasaypa chikinakurmi kawapäkunqa.Vecïnunkunawanpis juknin jukninwanmi pelyapäkunqa.Mözukunapis awkinkunata mana respitashpanmi contran rikakunqa.Waktsa runakunapis yachaq runakunapa contranmi sharkapäkunqa.
6 Tsayno kaptinmi papäninpa wayincho kaykaq wawqinta kayno ninqa:“Jatikunaykipaq röpalaykipis qampa kaykanraqmi.Mana ali kawaypita jorqapäkamänaykipaq noqakunapa mandamaqnï kaykulay”.
7 Wawqinnami jurashpan kayno ninqa:“Tsaytaqa ¿imapaqtaq awnipäshaykipis?Manami noqapapis mikuynï ni röpäpis kantsu.Kay markapa mandaqnin kanäpaq ama churamaytsu”.
8 Jerusalén marka ushakätsishqami kanqa.Judá nación runakuna pasaypa mana ali kawaymanmi chayanqa.Tsayno nakapäkunqa manakaqkunata rimashqanpita y jutsata rurashqanpitami.Tsaynöpami paykunaqa TAYTA DIOSPA contran rikakushqa.
9 Jutsata rurapäkushqantaqa qaqlanpis wilakuykanmi.Jutsata rurarpis manami penqakärintsu.Sodoma runakunapa jutsankunanömi jutsankuna maytsaymanpis mayakaykan.¡Wawalaw, kikinkunami ashipäkushqa castigashqa kananpaq!
10 Ali runaqa alita rurashqanpitami kushishqa kawanqa.
11 Jutsa ruraqkunaqa ¡imanöraq kanqa!Paykunaqa pasaypami nakanqa.Mana alita rurashqanman tupumi castigashqa kanqa.
12 Kuyashqä runakuna, mandaqnikikunami pantakätsishushpayki lutanta ruraykätsishunki.Nakatsishuqnikikunaqa wamrano mana tantiyakuqmi karkaykan.Autoridänikikuna kananpaqpis warmikunalami yaykurkaykan.
13 Kuyashqan runakunata juzgananpaq kamarikushqanami TAYTA DIOS kaykan.*
14 Tsaymi mayor runakunata y mandaqkunata TAYTA DIOS qayaykatsir kayno ninqa:“Qamkunaqa üva chakrätami* pasaypa usharkaykanki.Waktsakunata suwapashqaykitapis wayikikunamanmi shuntarkaykanki.
15 Kuyashqä runakunata ¿imanirtaq tsayno nakarkaykätsinki?Waktsakunatapis ¿imanirtaq tsayno makitsakurkaykankiLapanta mandaq TAYTA DIOS karmi tsayno nï”.
Jerusalén warmikunata castigananpaq nishqan
16 Mastapis TAYTA DIOS kaynömi nin:“*Sión warmikuna pasaypa ali chïna tukushpanmi miluykacharraq purirkaykan.Rikaparpis qewsapaykäshunkimi.Chakinkunacho watakushqan adornunkuna waqananpaqmi qatswaykaqnöraq purinpis.
17 Tsayno kashqanpita qaracho qeshyawan castigaptïmi qara putuyashqa penqaypaq puripäkunqa”.
18 Jerusalén warmikunata castigarmi Tayta Dios ushakätsinqa chakincho jatirashqan adornunkunata,vinchankunata y coröna niraq adornunkunata,
19 walqankunata y brasilëtankunata,umancho jatirashqan vinchïllankunata
20 y uma watakunanta,chakinman watakuna brasilëtankunata y tseqla watakunan wachkïllankunata,perfüminkunata y suertipaq tsararashqan wayrurunkunata,
21 sortëjankunata y senqankunaman jatikunan zarcïllunkunata,
22 kuyaylapaq sëda röpankunata y pañuëlunkunata,vëlunkunata y bolsankunata,
23 espëjunkunata y fïnu tëlankunata,umancho shukutarashqan tëlakunata y kata jakunkunatapis.
24 Tsay witsanqa perfümiwan ali asyänanpa* trukan büdanömi fiyupa asyanqa.Wachkïllanpa trukan waskalami kanqa.Shumaq piltakushqa kananpa trukan aqtsaynaq qara putumi kanqa.Sëda röpakunata jatikunanpa trukan lütu röpatami jatikärinqa.Qaqlankunapis kuyaylapaq kananpa trukan melanaypaq qeri ushashqami kanqa.
25 Jerusaléncho taq olqu kaqkunatami espädawan wanutsipäkunqa.Pelyayta yachaqkunapis guërrachömi ushakanqa.
26 Markaman yaykuna punkukunapis waqarmi lakikärinqa.*Jerusalén markapis runan kacharishqa warminömi kanqa.
Ichic wilacuycuna
^ 3.14 Tayta Diospa üva chakranqa kuyashqan Israel runakunami kaykan (Isa. 5.1-7).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 3.24 Wakin runakunaqa mushkünanpa nipäkun.
^ 3.26 Jer. 14.2; Lam. 1.4.
