TAPANMANTA
¿Pikunataj Jehovaj testigosnin kanku?
Estados Unidosmanta, Becky nin: “Miguelta unayña rejsini. Payqa Jehovaj testigon, religionnintaj umayta muyuchiwaj. ¿Pitaj Jehová? ¿Imaraykutaj Jehovaj testigosnin fiestasman mana rinkuchu? Chay religionpi kasqanmantaqa llakikoj kani”.
Canadamanta, Zenon nin: “Vecinosniy Jehovaj testigosninwan Bibliamanta yachakuyta qallarejtinku, nej kani: ‘¿Ima niyta munan chay sutirí? Manasina allinchu uj religionpajqa’”.
Estados Unidosmanta, Kent nin: “Warmiywan noqawanqa yuyaj kayku, iglesiaman mana risqaykumanta juchachakusqaykurayku, Jehovaj testigosnin visitawasqaykuta. Ni mayqen iglesiapi allinta yachachiwarqaykuchu. Chayrayku yuyaj kayku, ni Jehovaj testigosninpis allinta yachachinawaykuta”.
Dinamarcamanta, Cecilie nin: “Mana yacharqanichu pikunachus kasqankuta, nitaj imapichus creesqankuta”.
Ichapis paykunata rikorqanki, wasimanta wasi chayri waj lugarespi willashajta, Bibliamanta publicacionesta jaywashajta, runasmantaj Bibliamanta yachachishajta. Kay revistatapis ichá paykuna saqesorqanku. Jinapis ichá yuyanki Becky jina, Zenon jina, Kent jina, Cecilie jinataj, ninkitaj: “¿Pikunataj Jehovaj testigosnin kanku?”, nispa.
Jehovaj testigosninmanta imallatapis yachayta munanki chay, ¿imatá ruwawaj? ¿Imaynatá yachawaj imapichus creesqankuta? ¿Ima qolqewantaj willanku, tantakuna wasisninkutapis ruwanku? ¿Imaraykutaj wasiykiman jamunku chayri callespi parlapasunku?
Cecilie nillantaj: “Jehovaj testigosninmantaqa Internetpi ashkhata leerqani. Paykunamantaqa mana allin imasta uyarerqani. Chayrayku Jehovaj testigosninmantaqa mana allintachu yuyaj kani”, nispa. Payqa Jehovaj testigosninwan parlarisparaj mana yuyasqanman jinachu kasqanta yacharqa.
Ichá qanpis Jehovaj testigosninmanta yachayta munallankitaj. Jina kajtenqa paykunallatataj tapuriwaj. Paykuna kay revistata orqhonku, chayrayku paykunalla tapuykunasniykiman kutichisunkuman (Proverbios 14:15). Qhepan yachaqanaspeqa yachakunki, Jehovaj testigosnin pikunachus kasqankuta, imapichus creesqankuta, imastachus ruwasqankutataj.
