Alicante llajtitapi kausakorqani, chaytaj Españapi kashan. Wasiypeqa ancha chʼampaykuna karqa, chayrayku callellapiña sayaj kani. Wasiy qayllapi uj gomería kaj, chaypi José María llankʼarqa, paytaj amigoy karqa. Payqa kʼacha karqa, familiaymanta nisqaqa entiendewaj. Noqamanta 20 wataswan kuraj kaspapis, llakisqa kashajteyqa hermanoy jina karqa, sumaj amigoytaj.

José Mariaqa, Jehovaj testigosninwan Bibliata estudiasharqa. Yachakushasqanqa gustarqa, chayrayku noqamanpis willariwaj. Sumajta uyarispapis, niwasqanqa mana gustawarqachu. Joven kasqayrayku waj imasta ruwayta munaj kani. Tumpamantawantaj kausayneyqa niña kikinchu kanman karqa.

Mana accidentakusqaymanta parlayta munanichu, jinapis mana allin yuyayniyoj, wamputaj karqani. Uj pʼunchayqa kausayniy manaña kikinchu karqa. Joven kashaspa uj hospitalpi tukorqani, nitaj kuyuriyta aterqanichu. Imaynachus kashasqayta mana creeyta aterqanichu. Sapa kutitaj nej kani: “¿Imapajñá kausaniri?”.

José Mariaqa waturikuwaspa, chay ratopacha hospitalpa qayllanpi tiyakoj Jehovaj testigosninta waturinawankuta nerqa. Testigos waturikuwasqankoqa sonqoyta kuyuricherqa. Allinyarispataj Bibliata estudiayta qallarerqani. Yachakorqanitaj imaraykuchus ñakʼariy kasqanta, wañuy kasqanta, chantá sajra kaj kananta Dios saqesqanta. Chantapis Bibliapi leerqani imastachus Dios ruwananta, Jallpʼapipis mana juchayoj runas kausakunankuta. Nitaj pipis “Onqosqa kani” ninanta (Isaías 33:24). Chayta yachakuspaqa manaña aswan qhepaman kausaymanta llakikorqanichu.

Hospitalmanta llojsiytawan, astawan Bibliamanta yachakorqani. Jehovaj testigosninpa tantakuykunasninman, willaj ima rerqani ruedasniyoj sillaypi. Kay 1988 watapitaj 5 de noviembre killapi, 20 watayoj kashaspa, uj bañerapi bautizakorqani. Jehová kausayta munanallaypajpuni  yanapawarqa. Chaymantataj may agradecesqa kashani.

Jehovata yupaychanaytaqa ni ima jarkʼanawanta saqerqanichu. Tukuy atisqaytataj ruwarqani (1 Timoteo 4:15). Bibliamanta yachakuyta qallarishajteyqa, familiay mayta churanakoj. Jinapis Testigos, mayta yanapawarqanku tantakuykunata uyarinaypaj, willayman llojsinaypajpis.

Tiempowantaj tukuy imapaj yanapata necesitasqayta repararqani. Chayrayku mayta maskʼaspa, ni imata ruwayta atejkunapaj wasita Valencia llajtapi tarerqani, chaytaj Alicante llajtamanta 160 kilometrospi jina kashan. Chaymantapacha, chayqa wasiy jina karqa.

Mana puriyta atispapis Jehovata sirvillaytapuni munani. Ajina kasqaymanta pagawasqankuwan, waj yanapaspiwan uj computadorata rantikorqani, chaytataj camaypa ladonman churapuwarqanku. Chantá uj celulartawan rantikorqani. Sapa paqarin chaypi llankʼaj, computadorayta, celularniyta ima japʼichipuwan. Computadorata qhawanaypajtaj quijadaywan kuyuchini, teclasta chantá celularpi numerosta kʼaspisituwan jina simiywan japʼispa ñitʼini.

Chaykunaqa mayta yanapawan. Internetpi jw.org nisqaman yaykuyta atini, chantapis INTERNETPI BIBLIOTECA nisqaman. Chaykunaqa sumaj yanapaspuni. Sapa pʼunchay ashkha horasta Internetman yaykuni Bibliamanta orqhosqa publicacionesta estudianaypaj. Ajinamanta Diosmanta, kʼacha kasqanmanta ima yachakullanipuni. Sapayakojtiy chayri llakikojtiy, Internetpi taripasqay yachaqanas yanapawan.

Chantapis computadoraynejta tantakuykunasniykuta uyarini. Ajinamantataj cuartoymantapacha chay tantakuykunapi parlariyta atini, Diosmanta mañakuyta, Torremanta Qhawaj revistatapis leeriyta ima. Manaña tantakuykunaman riyta atispapis, hermanosniyoj kani.

Celularniywan, computadoraywanqa mana tiempoyoj kani. Mana wasimanta wasi willaspapis noqaqa willanipuni. Chay aparatosqa Diosmanta, runasman willanaypaj yanapawanku. Telefononejta willay mayta gustawasqanrayku tantakuypi ñaupajta apajkunaqa, telefononejta willakunanpaj wakichinayta niwanku. Telefononejta willaypeqa mana wasimanta llojsiyta atejkunapis willayta atinku.

 Jinapis mana computadora, nitaj celular qhawarisqallachu kashani. Imajtinchus amigosneyqa sapa pʼunchay waturikoj jamuwanku. Paykunaqa Bibliamanta yachakuyta munaj familiaresninkuwan, rejsisqasninkuwan ima jamunku. Ashkha kutispitaj, Bibliamanta noqa yachachinayta niwanku. Wakin kutitaj hermanos familiantin jamunku, paykunawan familiapi Diosta yupaychayninkupi kanaypaj. Wawas camaypi tiyarikunankutaqa mayta munani, paykunatataj tapurini imaraykuchus Jehovata munakusqankuta.

May agradecesqa kashani waturikuwasqankumanta. Cuartoyqa juntʼapuni kashan. Tukuynejmanta amigosniy jamunku. Chayta rikuspa chay wasipi llankʼajkunaqa tʼukushaj qhepakunku. Sapa pʼunchay Jehovaman agradecekuni kʼacha hermanosniyoj kasqaymanta.

Pillapis imaynachus kashasqayta tapuriwajtin, jinata nini: “Kallpachakushani”, nispa. Jinapis mana noqallachu chʼampaykunasniyoj kani. Imayna kausayniyoj kaspapis, tukuy cristianos “creeyrayku, chay sumaj tinkuypi” kallpachakushanchej (1 Timoteo 6:12). Sapa pʼunchay Jehovaman agradecekuni kausayniymanta. Diosta sirvinaypaj tiempoyta churani, aswan qhepaman imachus kananta suyakuspa. Chaytaj yanapawan kunankama muchunallaypajpuni.

Jallpʼapi uj Paraíso kananpi tʼukurini, chaypitaj may sumajpuni kanqa watejmanta correriy, phinkiriypis. Amigoy José Mariaqa, chakisninmanta onqosqa (poliomielitis onqoyniyoj). Paytataj chanzeakuspa nini pichus correspa atipananta. Paytaj niwan: “Pi gananan kajtinpis, aswan sumajqa Paraisopi kashaspa correnanchej”, nispa.

Camallapiña kasqaytaqa, mana creeyta atillarqanichu. Yachani, joven kashaspa mana allinta ruwasqayta. Jehová mana saqerpariwasqanmanta mayta agradecekuni. Payqa qowan ashkha hermanosta, kausayta, kusiyta, chantapis uj sumaj suyakuyta. Chayrayku niyman, Jehovaqa suyasqaymantapis astawanraj qowarqa.