Diosqa ñaupa tiempopi juecesta churarqa llajtanta ñakʼariykunamanta kacharichinanpaj (Jueces 2:18). Bibliaqa Juicio Pʼunchaymanta parlaspa tukuy runaspaj may kusiy kananta nin. Imajtinchus Diosqa tukuy runasta llakiykunamanta kacharichenqa. (Salmo 96:12, 13; Isaías 26:9 leey.)

Chaytataj Jesusnejta ruwanqa. Imaraykuchus payta Juezta jina churarqa kausajkunata, jinallataj wañusqastapis cheqan kayninman jina juzgananpaj (Hechos 10:42; 17:31). Jesusqa chay Juicio Pʼunchaypi Diosta mana rejsispa wañupojkunata kausarichimonqa. Paykunataj Diosta rejsiyta, munakuyta ima atenqanku. (Hechos 24:15 leey.)

Biblia nisqanman jina waranqa watasta. Chay wataspitaj wañusqas kausarimuspa, Diosta rejsiyta, kasukuyta ima atenqanku (Apocalipsis 20:4, 12). Ashkha runasqa yuyanku niraj wañupushaspa imatachus ruwasqankuman jina Juicio Pʼunchaypi juzgasqa kanankuta. Bibliatajrí, sutʼinchan kausarimusqankumanta qhepaman imatachus ruwasqankuman jina juzgasqa kanankuta. (Romanos 6:7 leey.)

Bibliaqa waj juicio pʼunchaymanta parlallantaj. Chaytaj mana yuyasqallamanta niraj chay waranqa watas qallarishajtin chayamonqa. Chay pʼunchaytaqa, tukukuy pʼunchay nispa nikullantaj. Chaymantataj kay revistaj qallariyninpi parlarerqanchejña. Chay juicio pʼunchaypi Diosqa sajra runasta chinkachenqa (2 Pedro 3:7). Chayrayku Diosta cheqamantapuni munakusqanchejta rikuchina tiyan. (2 Pedro 3:9, 13 leey.)