MAY rejsisqa runaman imallatapis regalanayki kajtin, ¿imatá regalawaj? Ñaupa tiempopeqa ima munayta qʼapaj imasta regalaj kanku reyesmanpis, imajtinchus qori jina valej. Chayrayku yachaysapa runasqa, “judiospa reynin[man]” regalosta jaywasqankumanta iskayqa karqa ima munay qʼapaj imas (Mateo 2:1, 2, 11).

Chantá Bibliaqa nillantaj Sabamanta reina, rey Salomonta waturishaspa qosqanta “kinsa waranqa jisqʼon pachaj sojta chunkayoj kilos qorita, may ashkha kʼacha qʼapaj jawinasta, jinataj may ashkha valorniyoj rumistapis. Mana jaykʼajpis Israelman chayasqachu chay chhika kʼacha qʼapaj jawinasqa, Sabá llajtamanta reinaqa Salomonman qorqa, chay chhikapuneqa” (2 Crónicas 9:9). * Waj reyespis, Salomonman apacherqanku qʼapashaj jawinasta amigosnin kasqankuta rikuchinankupaj (2 Crónicas 9:23, 24).

¿Imaraykutaj ñaupa tiempopi ima munay qʼapaj imas, chantá wajkunapis ancha valesqa kaj? Imaraykuchus cuerpoman jawikunapaj, religionespa costumbresninkuta ruwanankupaj, wañusqasta pʼampanapajtaj apaykachaj kanku (“ Ñaupa tiempopi apaykachakusqan” nisqa recuadrota qhawariy). Chantapis waj ladosmanta apakusqanrayku, rantikusqanraykutaj ancha valesqa karqa.

Chay tiempopeqa ima munay qʼapaj imas Jordán vallepi wiñaj, wakintataj karusmanta apakamunan karqa. Bibliaqa ashkha qʼapaj imasmanta parlan. Aswan rejsisqastaj kaykuna karqa azafrán, áloe, bálsamo, canela, incienso, mirra. Chantapis comino, menta, eneldo ima may rejsisqallataj karqa.

¿Maymantataj chaykunata apamoj kanku? Aloesta, casiata, canelata ima apakamoj maypichus kashan China, India, Sri Lanka chay lugaresmanta. Mirrata, inciensotataj orqhokoj, Arabiaj, Somaliaj chʼin pampasninpi wiñaj sachʼasmanta. Nardo nisqataj India suyullapi wiñaj, Himalaya lugarpi.

Chaykunata Israelman apakunanpajqa Arabianejta apananku karqa. Chayrayku kay The book of Spices (El libro de las especias) nisqa libro nisqanman jinaqa, uj tiempopi Arabianejtapuni chay ima munay qʼapaj imasta tukuynejman apakorqa. Israelmanta ura ladonpitaj Néguev chaynejpi llajtas kasqanta yachakorqa, chantá maypichus runas jarakoj kanku chaykunatapis. Chaytaj rikuchin chaynejta ima munay  qʼapaj imasta vendejkuna apasqankuta. Kay Centro del Patrimonio Mundial de la UNESCO nisqanman jinataj, chay lugaresqa rikuchin “chayta vendejkuna sumajta ganasqankuta [...] Arabiamanta mar Mediterráneo nisqakama”.

Ranqherosqa sumajta qʼapaj sachʼasta apaj kanku 1.800 kilometrosta jina Arabianejta (Job 6:19). Bibliapeqa parlan uj qotu ranqhero ismaelitasmanta pikunachus “apasharqanku perfumeta, balsamota, mirrata ima Egiptoman” (Génesis 37:25). Paykunamantaj Jacobpa wawasnin hermanonku Joseta vendeykorqanku.

Arabiamanta kajkunaqa unay tiempota ima munay qʼapaj imasta vendekusqanmanta cargoyoj karqanku. Paykunalla vendej kanku Asia japʼiymanta ima munay qʼapaj imasta, casia nisqata canelatawan. Arabiamanta kajkunaqa llulla cuentosta rikhuricherqanku ima munay qʼapaj imasta tarinapaj ima chʼampaykunachus kasqanmanta. ¿Imapaj? Mediterráneo lugarmanta llajtas Oriente lugarmanta llajtaswan mana negociosta ruwanankupaj. Ima munay qʼapaj imasta vendekusqanmanta “mana yachakusqanqa, ni mayqen tiempopi jina waqaychasqa karqa”, (The Book of Spices).

¿Imayna cuentostaj karqa? Greciamanta Herodotoqa 2.500 watas ñaupajta kausarqa. Payqa parlarqa phiña pʼisqos thapasninkuta canelaj ramasninwan qaqaspi ruwasqankumanta. Pay qhelqasqanman jina canelata tantajkunaqa jatuchaj aychasta churaj kanku qaqa uraman.  Pʼisqos ashkha aychata thapasninkuman apasqankurayku thapasqa urmaykamoj. Chantá canelata pallajkunaqa chay rato canelata oqharej kanku, ranqherosmantaj vendej kanku. Chay jina cuentosqa tukuynejman chayarqa. “Pallajkunaj kausaynin wañuy patapi jina kasqanrayku, canelataqa qorita jina valesqapi vendekoj”, (The Book of Spices).

Arabiamanta runaspa cuentosninku llulla kasqan sutʼinchakojtintaj, niña allinpajchu qhawasqa karqa. Chaymantaqa Egipto suyumanta Alejandría llajtapi ima munay qʼapaj imasta mayta vendekusharqa. Barcota purichej runas maykʼajchus allin viajanapaj kasqanta yachaykusqankutawan, Roma barcosqa Egipto suyoj barco sayachinasninmanta India suyuman viajayta qallarerqanku. Chayrayku ima munay qʼapaj imasqa ashkhaña karqa, baratollañataj.

Kay tiempopeqa ima munay qʼapaj imastaqa mana qorej precionwan kikinchakunmanchu. Nillataj reyesman regalanapaj apaykachakunmanchu. Jinapis chaykunata perfumespi, jampispitaj apaykachallankupuni. Ashkha runastaj mikhunasninkuman churanankupaj apaykachanku. Arí, ima munay qʼapaj imasqa ñaupa tiempopi jina kay tiempopipis may rejsisqallataj.