Bibliaqa Jesús wañusqasta kausarichisqanmanta parlan. Nitaj cuentollachu, imajtinchus Bibliaqa sutʼita rikuchin maykʼajchus, maypichus Jesús wañusqasta kausarichimusqanta. Sutʼincharina, 31 wata chaynejpi Jesusqa Capernaummanta Naín llajtaman ashkha runaswan risharqa. Chayashaspataj uj wañusqa joventa pʼampanankupaj apashasqankuta rikorqa. Qayllaykuspataj chay joventa kausaricherqa. Chaytataj mana Bibliallachu nin, manaqa ashkha runas rikorqanku. (Lucas 7:11-15 leey.)

Pisi tiemponmantaj, Jesusqa amigon Lazarota kausaricherqa, payqa tawa pʼunchaytaña wañusqa kasharqa. Chay milagrotataj ashkha runas rikullarqankutaj. Chayrayku nisunman Lázaro kausarimusqantapuni. (Juan 11:39-45 leey.)

Jesusqa khuyakusqanrayku kausarichimorqa. Chantapis kausarichimuspaqa, Tatan wañusqasta kausarichimunanpaj atiyta qosqanta rikucherqa. (Juan 5:21, 28, 29 leey.)

Jesús runasta kausarichimusqanqa, aswan qhepamanpis runasta kausarichimunantapuni rikuchin. Payqa may chhika runasta, jinallataj pikunachus Diosta mana rejserqankuchu chaykunatapis kausarichimonqa. Paykunataj Jehová Diosta rejsiyta, munakuyta ima atenqanku. (Hechos 24:15 leey.)