Roma llajta kantusninpi nacekorqani, wajcha runas ukhupitaj wiñakorqani. Maytataj ñakʼarerqani. Mamaytaqa mana rejserqanichu, tataywanpis mana allintachu apanakorqani. Callesllapi kausakoj kani.

Chunka watitayoj kashaspa suwakuyta qallarerqani. Wasiymantataj 12 kashajtiy riporqani. Tatayqa ashkha kutispi carcelmanta orqhomuwarqa. Runaswan siminakunapajpis churasqa karqani, may phiña runataj karqani. Chunka tawayoj kashajtiy ujtawan mana kutimunaypaj wasiymanta riporqani. Callespi drogakuspa kausakoj kani. Tutaña kajtintaj mayqen automanpis yaykuspa chhapuyay horakama puñoj kani. Maypichus yaku tarisqaywantaj tumpata mayllarqokoj kani.

Suwayman mayta amañaykorqani. Callespi bolsonesta qhechoj kani, edificiosman, wasismanpis suwaj yaykoj kani. Jinamanta may rejsisqa suwaman tukorqani chayrayku uj pandillaqa paykunaman ujchakunaypaj wajyarikuwarqanku. Ajinamanta bancosmantapis suwayta qallarerqani. Manchay phiña runa kasqayrayku pandillaymanta kajkunata manchachej kani. Pistolaywanpunitaj purej kani, puñunaypajpis cabeceray uraman churaj kani. Maqanakuy, drogakuy, suway, khuchichakuy, sajra parlay chay tukuyninta ruwaj kani. Policiaqa sapa kuti japʼinawankupaj jina qhatiykachawaj kanku. Ashkha kutistaj japʼichikorqani. Jinamanta ashkha watasta callespi, carcelpi ima kausakorqani.

Uj kuti carcelmanta llojsiytawan, ujnin kaj tiayta waturimorqani. Paywan, iskay primosniywan Jehovaj testigosninña kasqankuta, mana yacharqanichu. Paykunaqa tantakuyninkuman wajyarikuwarqanku, noqataj qhawarimusaj nispalla rerqani. Chayaytawantaj punku qayllanpipuni  tiyakuyta munarqani, pichus yaykushasqanta chayri llojsishasqanta yachanaypaj. Chaypipis pistolaywan kasharqani.

Chay tantakoyqa kausayniyta tijracherqa, kaytaqa mosqokushanichá, nispa nerqani. Imaraykuchus runasqa kusisqas, kʼachastaj karqanku. Kunankamapis yuyarikunipuni testigospa kʼacha kayninkuta. Chayqa ñaupa kausayniywan, ¡ni tumpata kikinchakorqachu!

Chayrayku Bibliamanta Jehovaj testigosninwan yachakuyta qallarerqani. Yachakusqayman jinataj reparakorqani kausayniyta tijrachinay kasqanta. Sutʼincharinapaj Proverbios 13:20 nisqanta sumajta japʼeqarqani, chaypi nin: “Yachayniyojkunawan purejqa yachayniyojllataj kanqa. Wampu runaswan purejrí mana allinman chayanqa”, nispa. Chayrayku pandillaymanta karunchakunay karqa. Chaytaj mana atikullajtinpis Jehovaj yanapayninwan saqeporqani.

Cuerpoytapis llimphucharqani. Mayta kallpachakorqani cigarro pitayta, drogakuyta ima saqenaypaj. Jatuchaj chujchasniytapis kʼutorqani, aretestapis ninrisniymanta orqhokorqani, sajra parlaytapis niña parlajchu kani. Chaypacharaj sajra munayniyta atipanaypaj kallpayoj karqani.

Leeyta, estudiayta nipuni munajchu kani. Chayrayku Bibliata estudianaypaj mayta kallpachakunay karqa. Pisimanta pisitaj Jehovata munakuyta qallarerqani. Jinallapi sonqo yuyayniy juchachayta qallariwarqa. Sapa kutitaj llakisqalla kaj kani. Imaraykuchus sajra ruwasqasniyta Jehová mana perdonanawanta yuyaj kani. Chayllapi leej kani imaynatachus rey Davidta anchata juchallikojtinpis Jehová perdonasqanta, chaytaj sonqochawaj (2 Samuel 11:1–12:13).

Chantapis wasimanta wasi willamuyta manchachikullajtaj kani (Mateo 28:19, 20). Imajtinchus sajrata ruwarqani chay runaswan ni imarayku tinkuyta munajchu kani. Chaywanpis pisimanta pisi chay manchachikuyniyta atiparqani. Tatanchej Jehovamanta runaman willaspataj, kusikuyta qallarerqani. Imajtinchus Payqa juchasninchejta kantumanta pampachan.

Jehovata rejsisqayqa salvawarqa. Imajtinchus wakin amigosneyqa wañupunkuña, wakintaj carcelpi kashanku. Noqataj kusisqa kashani. Imaraykuchus uj sumaj kausay kananta suyashani. Yachanitaj llampʼu sonqoyoj kayta, kasukuyta, phiñakuyniytapis ñitʼiyta. Chayrayku tukuywan allinta apanakuni. Chantapis uj kʼacha warmiwan casarakuni, paypaj sutintaj Carmen. Iskayniykutaj vecinosniykuman Bibliamanta yachachiyku.

Kunanqa mana suwaspañachu kausani. Wakin kutisqa bancospi llankʼani llimphuchaspallaña manataj suwaspañachu.