Miqueas 700 watas ñaupajta qhelqasqanman jina, Jesusqa Belenpi nacekorqa. Kinsa chunka watanmantaj, nisunman 29 watapi, Daniel Mesiasmanta qhelqasqan juntʼakullarqataj. Chay watapi Jesús bautizakorqa, Diostaj espíritu santonwan ajllarqa. Jinamanta suyasqa “mirayqa”, nisunman Mesías, qhelqakusqanman jinapuni maychus tiemponpi rikhurerqa.

Chantá Jesusqa, “Diospa reinon evangeliomanta” usqhayllata willayta qallarerqa (Lucas 8:1-3). Profetas qhelqasqankuman jinapunitaj, payqa kʼacha, khuyakuyniyojtaj karqa. Chantapis wajkunamanta llakikoj. Kausayninkupi yanapananpaj jina, munakuywantaj yachachej. “Runasta sanoyacherqa tukuy laya onqoykunamanta.” Jinamantataj Dios paywan kashasqanta rikucherqa (Mateo 4:23). Ashkha runas, Jesuspa ujnin discipulon jina nerqanku: “Mesiasta tariyku”, nispa (Juan 1:41).

Jesusqa Jallpʼata kamachinan kashajtin guerras, jallpʼa ikhakuykuna, waj laya chʼampaykuna ima kananta nerqa. Chayrayku tukuyman yuyaycharqa: “Ama puñuspa wakichisqapuni kaychej”, nispa (Marcos 13:37).

Jesusqa juntʼa runa karqa, tukuy imapitaj Diosta kasukorqa. Chaywanpis enemigosnenqa wañucherqanku. Wañuynenqa juchasninchejrayku pago jina karqa. Jinamanta Adanwan Evawan paraisopi wiñay kausayta chinkachisqankuta watejmanta tarinanchejpaj.

Jesuspa wañuynin, kinsa pʼunchayninman atiyniyoj ángel jina kausarimusqanpis, uj profeciata juntʼashallarqataj. Kausariytawan 500 kuraj discipulosninman rikhurerqa. Niraj cieloman wicharishaspataj, yachachisqasninman paymanta, Reinonmanta ima “tukuy laya runas[man]” willanankuta kamacherqa (Mateo 28:19, 20). Chay kamachiyta, ¿juntʼarqankuchu?

(Kaykunamanta orqhokun: Mateo, Marcos, Lucas, Juan, 1 Corintios.)