Diosqa, tukuy runas payman qayllaykunankuta munan (Salmo 145:18, 19). Palabran Bibliaqa, ima llakiynillanchejtapis willarinanchejta niwanchej (Filipenses 4:6, 7). Chaywanpis mana tukuy mañakuykunatachu uyarin. Sutʼinchanapaj, kutipakuspa kikin kikillanta mañakojkunata, mana uyarinchu. (Mateo 6:7 leey.)

Kamachiykunasninta mana kasukojkunatapis, nillataj uyarinchu (Proverbios 28:9). Sutʼinchanapaj, ñaupa tiempopi, runata wañuchej israelitaspa mañakuyninkuta mana uyarejchu. Rikunchej jina, Dios uyarinawanchejpajqa, kamachiykunasninta juntʼananchej tiyan. (Isaías 1:15 leey.)

Dios uyarinawanchejpajqa, creeyniyoj kananchej tiyan (Santiago 1:5, 6). Arí, Pay kasqantapuni, noqanchejmantataj llakikusqanta creenanchej tiyan. Chaypajtaj Palabranta ukhunchana. Imaraykuchus creeyninchejqa, chaypi saphichasqa kanan tiyan. (Hebreos 11:1, 6 leey.)

Chantapis Jesús jina, sonqomantapacha mañakuna, mana jatunchakuspataj (Lucas 22:41, 42). Arí, Diosman imatachus ruwananta ninamantaqa, kamachiykunasninta entiendenapaj kallpachakuna. Chaypajtaj Bibliata leena. Jinamanta munayninman jina mañakusun. (1 Juan 5:14 leey.)