Marta: Buen día, imaynalla. Suteyqa Marta. Kay pʼunchay, runaswan tumpata parlarishayku. ¿Imá sutiyki?

Sofía: Sofía.

Marta: Kusikuni rejsisuspa doña Sofía. Qanpaj uj qhelqasqata apamusharqani. Kaypi kashan, nin: Chiqa kutichiykunata yachayta munawaqchu.

Sofía: ¿Hermanoschu kankichej?

Marta: Mana. Noqaykoqa Jehovaj testigosnin kayku. Nisharqayki jina...

Sofía: Amallaraj señora. Tiempollaykita usuchinki noqawanqa.

Marta: Mana unaytachu parlarisunchej.

Sofía: Niyki jina, qhasillata parlarisun. Dios kasqanmantapis iskayrayasqa kashani.

Marta: ¿Jinatapunichu yuyaj kanki?

Sofía: Mana. Wawa kashaspa, iglesiamanpis rej kani. Chaywanpis unayña mana rinichu.

Marta: ¿Imarayku?

Sofía: Mamitay accidentakusqanmantapacha, manaña Diosmanta yachayta munanichu.

Marta: Mmm... Chaymá llakeyqa.

Sofía: Arí, kunantaj mamitayqa, mana purikuytapis atinchu.

Marta: Llakiy ari.

Sofía: Chayrayku wakin kutis tapukuni: “Dios kanpuni chayqa, ¿imaraykutaj kay jina llakiykuna kananta saqenri? ¿Imajtintaj ñakʼarisqaykuta qhawallanri?”, nispa.

Marta: Chay jina llakiypi rikukuspaqa, jinatapuni tapukunchej. Chaytaj mana juchachu. Ñaupa tiempopipis, Diosta yupaychaj wakin runas, jinallatataj tapukorqanku.

Sofía: ¿A, si?

Marta: Arí, chayta Bibliapi rikuchisuyta munayman.

Sofía: Yapis.

Marta: Kaypi imatachus profeta Habacuc, Diosman tapurisqanta rikuchin. Chaypaj Habacuc 1 capitulopi, 2 chantá 3 versiculotawan leerisun. Chaypi nin: “Tata Dios, maykʼajkamataj qanta qhaparikamuspa, yanapata mañakusaj, mana uyarichikuspa? Maykʼajkamataj qhaparikamusqayki kallpaman atienekuspa sajrata ruwaykuna kasqanrayku, manataj qan jamunkichu kacharichinawaykupaj? Imaraykutaj rikuchiwanki chay chhika ñakʼariyta?”. Ichá qanpis kikinta tapukullarqankitaj.

Sofía: Arí.

Marta: Habacuc jinata tapukusqanmanta, Diosqa mana phiñakorqachu, nitaj mana creeyniyoj kasqanta nerqachu.

Sofía: Mmm. Mana chayta yacharqanichu.

Marta: Chantapis Bibliaqa, Dios ñakʼarisqanchejta rikusqanta, maytataj llakikusqanta niwanchej.

Sofía: ¿A, si?

Marta: Arí. Kay Éxodo 3:7 qhawarina. ¿Leeriwajchu?

Sofía: Qanlla leeriy.

Marta: Ya. Jinata nin: “Tata Diostaj nillarqapuni: Cheqamanta noqa rikuni imaynatachus israelita wawasniy Egiptopi ñakʼarishasqankuta. Uyarini mayta qhaparikusqankuta jilaqatas  jasutʼisqankurayku; allinta yachani ñakʼarisqankuta”. Leerisqanchejman jina, ¿ñakʼarisqanchejta Dios rikunchu?

Sofía: Arí, rikoj kasqa.

Marta: Chaywanpis payqa, mana ñakʼarisqanchejta qhawallanchu. Kay versiculoj tukukuyninpi, Dios nin: “Allinta yachani ñakʼarisqankuta”. Mana munakuyniyoj kanman chay, ¿jinata ninmanchu?

Sofía: Nichá.

Marta: Chaywanpis pitapis ñakʼarejta rikoyqa, ñakʼarisqanmanta sonqonchejta nanachikuywan, mana kikinchu.

Sofía: Arí, mana kikinchu.

Marta: Astawan sutʼinchanapaj, israelitas ñakʼarishajtinku imaynatachus Dios llakikusqanta qhawarina. Chaypaj kay Isaías 63:9 versiculoj qallariyninta leerisun. Jinata nin: “Israelitas llakisqa kashajtinku, paypis llakisqallataj karqa”. Qhawarinchej jina, Diosqa israelitasta ñakʼarejta rikuspa, mayta llakikorqa. ¿Icharí?

Sofía: Arí.

Marta: Chaytaj Dios noqanchejmanta mayta llakikusqanta rikuchiwanchej. Ñakʼarejtinchejqa sonqon nanan. Imallapis llakichiwajtinchej, paypis llakikullantaj.

Marta: Niraj ripushajtiy, kaysitumantawan parlarisuyta munayman.

Sofía: Parlarillaway.

Marta: Chaypaj kay Jeremías 10:12 leerisun, yachasuntaj imatachus Biblia Diospa atiyninmanta nisqanta. Kaypi nin: “Tata Diosqa atiyninwan kay pachata ruwarqa, yachayninwan kay pachata sumajta sayacherqa, yachayniyoj kasqanwantaj cielotapis jatunman aysarqa”. Kaypi tumpata tʼukurina. Kay pachapi, cielopi ima tukuy imata ruwananpaj, ¿mashkha atiyniyojtaj Dios kanman?

Sofía: May jina atiyniyojchá.

Marta: Arí. Kunan, tukuy imata ruwananpaj atiyniyoj chay, ¿manachu ñakʼariykunata chinkachinanpajpis atiyniyojllataj kanman?

Sofía: Kanmanpuni.

Marta: Kunan, mamitaykipi tʼukuriy. Payta ñakʼarejta rikuspa, sonqoyki nanasunki, ¿icharí?

Sofía: Imaynatá mana nanawanqari, mamitaycharí.

Marta: Sanoyachinaykipaj atiyniyoj kawaj chay, ¿manachu sanoyachinkiman?

Sofía: Sanoyachiymanpuni ari.

Marta: Kunan, kaypi tʼukurina. Bibliaqa Diosninchej runasta ñakʼarejta rikuspa, sonqon nanasqanta nin, may atiyniyoj kasqantataj rikuchin. Munaspaqa ñakʼariykunata kunanpacha tukuchiyta atinman. Chayta mana ruwananpaj, ¿reparankichu imaynatachus sonqonta ñitʼiykushanman?

Sofía: Mana chaypi tʼukurisqanichu.

Marta: Chaywanpis ichá tapukunki: “¿Imaraykutaj Dios ñakʼariykuna kananta saqeshanri?”, nispa. *

Sofía: Arí, yachayta munayman.

Marta: Munajtiykeqa, qhepan semanata kutimuyman chaymanta parlarinanchejpaj.

Sofía: Ya, kutimuy ari. *