Turku llajtamanta wajcha lugarpi wiñakorqani, chaytaj mar kantupi kashan. Tatayqa maqanakuspi atipaj. Chayrayku sullkʼaywanqa, maqanakuspaj wakichikullajtaj kayku. Escuelapi kashajtiy, mana iskaychakuspa maqanakuspi satʼikoj kani. Waynuchuña kashajtiytaj, may rejsisqa tʼojpaman yaykusqayrayku, astawan jatun maqanakuspi satʼikoj kani. Chantapis heavy-metal nisqa takiykunata uyariyta qallarerqani, chaytaj rock nisqata takejkuna jina kayta munanaypaj tanqawarqa.

Chayrayku tocanasta (batería) rantikuytawan, uj conjuntota rikhuricherqani, chaypitaj takej kani. Runaj ñaupaqenpi takishaspaqa, millay imasta ruwaspa gustachikoj kani. Phiña uywasman rijchʼakusqaykurayku, maytaña rejsichikusharqayku. Pisi tiemponman ashkha runaj ñaupaqenpiña tocaj kayku, wakin takiykunatapis grabarqayku, chaykunamanta wakintaj may rejsisqa karqanku. Kay 1980 wata tukukuyninpi, Estados Unidospa wakin llajtasninpi tocaj rerqayku. Los Ángeles, Nueva York llajtaspi wakin kutista tocarqayku. Chantapis Finlandiaman niraj kutishaspa, takiykunata orqhojkunamanta wakinwan rejsichikorqayku.

Conjuntoypi kayqa mayta gustawaj, chaywanpis mana kusisqachu karqani. Takiykunawan llankʼajkunaqa, sonqoyta pʼakerqanku, imajtinchus sajras, chhoqonakojkunataj karqanku. Chantapis kausayniywan, mana kusisqachu kasharqani. Sajra kasqayta yuyasqayraykutaj, infiernopi qʼolasqa kayta manchachikorqani. Kutichiykunata maskʼaspa, religionmanta imaymana librosta leerqani. Diosta ni jaykʼaj kusichinayta yuyaspapis, yanapayninta mayta mañakoj kani.

Kausakunaypajqa, cartasta apachej oficinapi llankʼaj kani. Uj pʼunchayqa, llankʼaj masiy Jehovaj testigon kasqanta uyarerqani. Chay ratopachataj, chay hermanota tukuy imata taporqani. Sapa tapusqayman Bibliawan kutichiwasqantaj, mayta  tʼukuchiwarqa. Chayrayku Bibliamanta yachachinawanta saqerqani. Semanasninman, conjuntoyta takiykunata grabanapaj wajyariwarqayku. Chay grabasqataj Estados Unidospipis llojsinan karqa. Suyasqay pʼunchay chayamusqanta yuyarqani.

Bibliamanta yachachiwaj hermanoman nerqani: “Kay kutitawan grabamusaj, chaymantataj cheqamantapuni Bibliaj nisqanta kasukusaj”, nispa. Paytaj imatachus ruwanayta ninawanmantaqa, Jesús Mateo 6:24 nisqanta leechiwarqa. Chaypi nin: “Mana pipis atinchu iskay patronesta ujllapi sirviyta”, nispa. Chayta entiendespaqa, titilla qhepakorqani. Chaywanpis pisi pʼunchaykunamanqa, yachachiwaj hermanoñataj titi qhepakorqa, imaraykuchus Jesuspa discipulon kanayrayku conjuntoymanta tʼaqakusqayta willarqani.

Bibliaqa espejo jina pantasqasniyta reparachiwarqa (Santiago 1:22-25). Kausayneyqa millay karqa, imajtinchus jatunchakoj kani, imatapis noqallapajpuni maskʼaj kani, millayta parlaj kani, maqanakoj kani, cigarrota pitaj kani, anchatataj machaj kani. Kausayniy Bibliaj nisqanwan churanakusqanta reparajtiy, jatun rumipis urmaykuwanman jina karqa. Chaywanpis kausayninta tijrachiyta munarqani (Efesios 4:22-24).

Bibliamanta yachakuyta qallarishajteyqa, ñaupa pantasqasniy anchata juchachawaj. Chaywanpis yachachejneyqa mayta yanapawarqa. Payqa Bibliapi Isaías 1:18 rikuchiwarqa. Chaypi nin: “Juchasniykichejqa may jina pukapis kachunku, ritʼi jina yuraj kanqanku”, nispa. Kay texto, wajkuna ima, kayta reparachiwan: Tatanchej Jehovaqa khuyakuyniyoj, pesachikojkunatataj perdonan.

Jehovata rejsisqay, munakusqay ima payman qokunaypaj tanqawarqa (Salmo 40:8). Chayrayku 1992 watapi Jehovaj testigosninpa ashkha suyuspa jatun tantakuyninkupi bautizakorqani. Chaytaj San Petersburgo (Rusia) llajtapi ruwakorqa.

Diospa llajtanpeqa sumaj amigosta tarini. Wakin kutispi kʼacha takiykunata tocanaykupaj tantakuyku, jinamanta Diospa qosqan regalowan kusirikuyku (Santiago 1:17). Warmiy Kristinaqa, uj sumaj tʼinka. Paywanqa, llakiypipis kusiypipis khuskapuni kayku.

Manachus Jehovata rejsiyman karqa chayqa, ichá wañusqaña kayman karqa. Ñaupajtaqa, chʼampaykunamanta mana llojsiyta atejchu kani. Chaywanpis kunanqa, kusisqa, sonqo juntʼasqataj kausani. Chantapis kausayniypi tukuy ima, maychus kananpi kashan.