CHAYQA cheqapuni. Kausayninchejqa llakiymanta, ñakʼariymanta juntʼa. Chayrayku ichá tapukunki: “¿Imapajtaj kausashanirí?”, nispa.

Mariamanta parlarina. Payqa imatapis ruwashajpuni, chaywanpis kunanqa 84 watasniyoj, nitaj wasillanmantapis llojsiyta atinchu. Yuyaynillanpipuni kajtinpis, cuerponqa manaña yanapanchu. Jinata kausaspa, ¿kusisqachu kanman?

Ichá qanpis maykʼajllapis tapukorqanki: “¿Imapajtaj kausanirí?”, nispa. Ichapis llankʼayniykipi chayllatapuni ruwasqaykirayku saykʼunkiña, nitaj pipis kallpachakusqaykita reparanchu. Allillan rishasojtintaj, ichá imachus qhepaman kananmanta llakikunki, sapallayki kasqaykita yuyanki, chayri phutikunki. Ichapis familiaykipi sapa kuti chʼajwas tiyan, chayri familiaykimanta pillapis wañupun. Uj runa André sutiyoj jinapi rikukorqa. Payqa tatanman manchay kʼaskasqa karqa. Chayrayku ujllata onqoykuspa wañupojtin, sinchʼita llakikorqa, nitaj imapis sonqochayta atinanta yuyan.

Ima llakiypi kaspapis, tukuy tapukunchej: “¿Maykʼajllapis kusisqa, sonqo juntʼasqataj kausayta atisajchu?”, nispa. Kay tapuypa kutichiynintaqa, Jesucristopi tarinchej, pichus 2.000 watas ñaupajta Jallpʼapi kausarqa. Ashkha chʼampaykunawan tinkuspapis, payqa kusisqa, sonqo juntʼasqataj kausarqa. Pay jina ruwasun chayqa, noqanchejpis kusisqa kausasun.