Bibliamanta yachakusqankuqa, kawsayninkuta tikrachirqa

¿Imataq juk warmita llamkʼayninpi manaña suwakunanpaq, pakayllamanta wak suyusman diamantesta manaña apananpaq ima, yanaparqa? Chantá, ¿imaraykutaq juk warmi iskay kutipi pay kikin wañuchikuyta munaspapis, manaña wañuchikuypi tʼukurirqachu? ¿Imataq juk runata alcoholman, drogaman ima, qukusqanta atipananpaq yanaparqa? Imatachus paykuna kutichisqankuta qhawarina.

YACHANAPAQ

SUTIN: MARGARET DEBRUYN

WATASNIN: 45

SUYUN: BOTSUANA

ÑAWPAQ KAWSAYNIN: PAKAYLLAMANTA DIAMANTESTA WAK SUYUSMAN APAQ, SUWAKUQTAQ

ÑAWPAQ KAWSAYNIY: Tatayqa, Alemaniamanta karqa, chaywanpis Africamanta Namibia suyuman tiyakuq ripurqa. Chayrayku ñuqaqa, chay suyumanta, Gobabis llaqtapi nacekurqani. Mamaytaq Botsuana llaqtamanta, Bangologa ayllumanta karqa.

Sudafricamanta kamachiqqa, 1970 watapi, Namibia suyuta kamachichkarqa, chayraykutaq chay suyumanta kaqkunata, wak suyumanta kaqkunawan mana casarakunankuta kamachirqa. Tatay wak suyumanta kasqanrayku, mamaymanta tʼaqanachirqanku. Chayrayku mamayqa, Botsuanaman kutipurqa, hermanosniywan imataq, paywan ripurqayku. Ghanzi llaqtapitaq tiyakurqayku.

Chantá 1979 watapi, Lobatsi llaqtaman ripurqani, chaypitaq colegiopi estudiayta tukunaykama juk familiap wasinpi qhipakurqani. Tukuytawantaq, mecanicamanta juk tallerpi secretariajina llamkʼayta qallarirqani. Wiñasqaymanjina imatachus necesitasqanchikta Dios mana quwasqanchikta yuyasqayrayku, kawsanapaq imatapis ruwana kasqanta yuyaq kani.

Chayrayku, llamkʼayniypi atienekuwasqankurayku mana juchachanawankuta yuyaspa, chaypi suwakuyta qallarirqani. Chantá tuta juk tren chayamuptin, amigosniywan trenman yaykuq kayku, tukuy imata suwanaykupaq. Astawanpis, pakayllamanta wak suyusman diamantesta, bronceta, qurita ima, apaq kani. Drogasman qukurqani, imallamantapis usqhayllata phiñakuq kani, achkha waynaswantaq lluqsiyta qallarirqani.

Chaywanpis 1993 watapi, suwachkaqta taripawasqankurayku llamkʼayniymanta wikchʼuwarqanku. Amigosniytaq, policiawan mana japʼichikunankurayku, saqirpawarqanku. Chaytaq mayta sunquyta nanachiwarqa, chayrayku ni jaykʼaq pillapipis juktawan atienekunayta nirqani.

BIBLIAMANJINA KAWSAYNIYTA TIKRACHISQAY: Chaymanta qhipan watapiqa, Jehovamanta  sutʼinchaq misionerosta riqsirqani, Tim sutiyuq hermanota, warmin Virginiatawan. Paykunaqa, Bibliamanta yachachinawankupaq maypichus llamkʼaq kani, chayman chawpi pʼunchaypi jamuq kanku. Atienekunapaqjina kasqankuraykutaq, yachachinallawankupaqpuni wasiyman jamunankuta nirqani.

Pisi tiemponmantaq, Diosta kusichinaypaq Biblia nisqanmanjina kawsanayta repararqani. Sutʼinchanapaq, kay 1 Corintios 6:9, 10 pʼitikunata ñawirispa, “khuchichakojkuna, [...] jinallataq suwaspis, michʼaspis, machajkunapis, maldecejkunapis, chʼawkiyajkunapis manapuni Diospa reinontaqa herenciata jina jap’[inankuta]” yacharqani. Chayrayku, tukuy viciosniyta saqiyta qallarirqani. Manaña imatapis suwarqanichu, nitaq saqra amigosniywanpis tantakurqaniñachu. Chantá Jehovap yanapayninwan, munakusqay waynasta, manaña paykunawan lluqsinayta nirqani.

BENDICIONESTA JAPʼISQAY: Mayta kallpachakusqayrayku manaña usqhayllata phiñakunichu, nitaq pantaptinku wawasniyta qhaparqachaniñachu (Efesios 4:31). Astawanpis kʼachamanta qusayta chayri wawasniyta parlapayani, imaraykuchus chayqa, familiajina jukchasqa kanallaykupaqpuni yanapawayku.

Ñawpa amigosniy, vecinosniy ima, kunan, atienekunapaqjina kasqayta reparanku. Llamkʼayniypi manaña imatapis suwanichu, astawanqa, imatachus llamkʼayniypi ranqhachkasqaykuta, qullqita ima, allinta apaykachani. Ajinata ruwasqayraykutaq, sumaqta pagawanku, chayrayku wak runasman Bibliamanta yachachinaypaq tiempoy kapuwan. Kay Proverbios 10:22 pʼiti nisqanqa, chiqapuni kasqanta nini, chaypitaq nin: “Tata Diospa bendicionnenqa qhapajyachin, nitaj ima llakiytapis chay bendición apamunchu”, nispa.

YACHANAPAQ

SUTIN: GLORIA ELIZARRARÁS DE CHOPERENA

WATASNIN: 37

SUYUN: MÉXICO

NAWPAQ KAWSAYNIN: WAÑUCHIKUYTA MUNARQA

ÑAWPAQ KAWSAYNIY: Naucalpan llaqtapi, (México suyupi) qhapaq runas chawpipi wiñakurqani. Sipasyachkaspataq, ni pita kasukuqchu kani. Fiestamanta fiestataq puriy gustawarqa. Chantá 12 watayuq kachkaspa, cigarrota pitayta qallarirqani, 14 watayuq kachkaspataq alcoholta ukyayta qallarirqani. Chaymanta 16 watayuq kachkaspa, drogasman qukurqani. Astawan qhipamantaq, wasimanta ripurqani. Yaqha tukuy amigosniypis mana allintachu kawsakurqanku, imaraykuchus tatasninku sunquta nanachinapaqjina paykunata parlapayaq kanku, chayri maqaq kanku. Chayrayku, manaña kawsayta munaspa, iskay kutipi wañuchikuyta munarqani.

Chantá 19 watayuq kachkaspa, modelojina llamkʼayta, achkha politicoswan, riqsisqa runaswan ima, lluqsiyta qallarirqani. Chantá casarakurqani, wawasniyuqtaq karqani, chaywanpis familiaypiqa, ñuqa kamachiq kani. Cigarrota pitayta, alcoholta ukyayta, fiestasman riyta ima, mana saqirqanichu, millay parlaykunata, millay chanzastapis parlallaqpuni kani. Astawanpis imallamantapis usqhayllata phiñakuq kani.

Amigosniyqa, ñuqajina kawsaq kanku, qhapaq runa kasqaytataq niwaq kanku, chaywanpis ñuqaqa, qhasipaq kawsachkasqayta yuyaq kani.

BIBLIAMANJINA KAWSAYNIYTA TIKRACHISQAY: Kay 1998 watapi, Jehovamanta  sutʼinchaqkunawan Bibliamanta yachakuyta qallarirqani. Bibliapitaq, mana qhasipaqchu kawsachkasqanchikta, Dios aswan qhipaman Jallpʼata juk paraisoman tukuchinanta, wañupuqkunata kawsarichinanta, chay paraisopi kawsakuyta atisqayta ima, yachakurqani.

Mana chayllachu, astawanpis Diosta munakusqanchikta rikuchinapaq, payta kasukunanchik kasqanta yachakullarqanitaq (1 Juan 5:3). Chiqamanta chayta ruwayqa, mana atinaypaqjinallachu karqa, imaraykuchus ni pita kasukuqchu kani. Chaywanpis kawsayniymanta mana dueñochu kasqayta repararqani (Jeremías 10:23). Chayrayku Biblia nisqanmanjina kawsanaypaq, wawasniymanpis Bibliamanta yachachinaypaq, Jehovamanta yanapata mañakurqani.

Imaynatachus kawsachkasqayta tikrachiyqa, mana atinaypaqjinallachu karqa, chaywanpis Efesios 4:22-24 pʼitikuna nisqanmanjina ruwarqani, chaypitaq nin: “Ñawpa sajra kawsayniykichejpi karqa, chay mawkʼa runamanta tʼaqakuychej [...] Chay mosoj runa kaywan pʼachawan jina pʼachallikuychej, mayqenchus Diosman jina ruwasqa, cheqan kaypi, cheqamanta santo kaypiwan kashan, chaywan”, nispa. Ajinata kawsanaypaqqa, cigarrota pitayta, millay parlaykunata parlayta ima, saqinay karqa. Yaqha kimsa watapipuni chayta saqirqani, chantá Jehovaman qukurqani, bautizakurqanitaq.

Chantapis, warmijina, mamajina ima ruwanasniyta juntʼanaypaq, kallpachakurqani. Kay 1 Pedro 3:1, 2 pʼitikuna yuyaychasqanmanjinataq ruwarqani, chaypi nin: “Ajinallatataj, qankunapis warmis, sapa ujpis qosaykichejwan kʼumuykukoj sonqoyoj kaychej. Ajinamanta Diospa palabrampi mana creejkunapis, warmisninkoj sumaj kawsayninta rikuspa, mana parlasqalla Señorman kutirikunkuman kawsayniykichejta, kʼumuykukoj kasqaykichejtapis rikusqankurayku”, nispa.

BENDICIONESTA JAPʼISQAY: Kawsayniypi kusiyta tarinaypaq yanapawasqanrayku, Jehovaman sapa pʼunchay agradecekuni. Chiqamanta kunan, kʼacha runa kasqayta, wawasniyta allinta uywanaypaq wakichisqa kasqayta ima, yuyani. Ñawpaq kawsayniypi tʼukurispaqa, sunqu yuyayniy saqra kaqta ruwasqaymanta juchachawanraq, chaywanpis Jehová imachus sunquypi kasqanta riqsisqanta yachani (1 Juan 3:19, 20). Biblia yuyaychasqanmanjina kawsachkasqaymantapacha, kusisqa, sunqu tiyasqataq kawsakuni.

YACHANAPAQ

SUTIN: JAILSON CORREA DE OLIVEIRA

WATASNIN: 33

SUYUN: BRASIL

ÑAWPAQ KAWSAYNIN: ALCOHOLMAN, DROGASMAN IMA QUKUQ

ÑAWPAQ KAWSAYNIY: Brasil suyumanta, Bagé llaqtapi paqarikurqani, kay llaqtaqa Uruguay llaqtap qayllanpi kachkan, chaypitaq 100.000 runas tiyakunku. Yaqha tukuyninkutaq, chakrapi llamkʼanku, wakasta ima uywanku. Wakcha runas tiyakuq kanku chaypi wiñakurqani, chaypitaq achkha pandilleros karqa, waynastaq alcoholta, drogasta ima, ukyaq kanku.

Colegiopi yachakuyta tukuytawan, alcoholta ukyayta, marihuanata pitayta, heavy metal nisqa takiykunata uyariyta ima qallarirqani. Jallpʼantinpi ñakʼariykuna, maqanakuykuna ima kasqanrayku, mana Diospi creeqchu kani.

 Guitarrata tocay gustawaq, chantá wakin kutiqa, Apocalipsis librota ñawirisqaymanjina takiykunata urqhuq kani. Chaywanpis, pikunawanchus tocaq kayku paykunawan mana allinchu riwarqayku, chayrayku drogasman qukurqani. Drogasta ukyasqayrayku wañunaymantaqa, mana manchachikuqchu kani, imaraykuchus wakin riqsisqa takiqkunapis drogasta ukyaspa wañurqanku.

Abuelaywan wiñakurqani, paymantataq drogasta rantinaypaq qullqita mañakuq kani. Wakin kutiqa, imapichus chay qullqita gastasqayta tapuwaq, chaywanpis ñuqa llullakuspa kutichiq kani. Chantapis, layqiriyusman satʼikurqani, sumaq takiq kanaypaq yanapanawanta yuyasqayrayku.

BIBLIAMANJINA KAWSAYNIYTA TIKRACHISQAY: Jehovamanta sutʼinchaqkunawan Bibliamanta yachakuyta, tantakuyninkuman riyta ima qallarisqaymantapacha, imaynatachus yuyasqayta tikrachiyta qallarirqani. Pisimanta pisitaq kusisqa kawsakuyta munarqani. Ñawpaqtaqa, ni pi kamachiwasqanta rikuchinaypaq, chukchayta wiñachikurqani, manaña ajinata yuyaspataq chukchayta kʼutuchikurqani. Chantapis, Dios allinpaq qhawanawanpaq alcoholta, drogasta ima ukyayta, cigarrota pitayta, millay takiykunata uyariyta ima, saqinay kasqanta repararqani.

Jehovamanta sutʼinchaqkunapta tantakuyninkuman ñawpaq kuti risqaypiqa, juk cartelpi Proverbios 3:5, 6 pʼitikuna qillqasqa kasqan tʼukurichiwarqa, chaypitaq nin: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu. Tukuy ima ruwasqaykipi Tata Diosmantaqa yuyarikuy. Paymin cheqan ñanta pusasonqa”, nispa. Chay pʼitikunapi tʼukurispaqa, munaptiy Jehová kawsayniyta tikranaypaq yanapanawanta repararqani.

Chaywanpis, imaynatachus kawsachkasqayta tikrachiy, drogasta, alcoholta ima saqiy, mana atinaypaqjinallachu karqa, imaraykuchus chaykunata saqiyqa, makiytapis khuchukuchkaymanjina karqa (Mateo 18:8, 9). Pisimanta pisi chaykunata saqinayta munaspaqa, ni jaykʼaq saqiyta atinayta yacharqani, chayrayku juk pʼunchay ñuqa kikin nikurqani: “¡Kaykamalla!”, chaymantataq tukuy viciosniyta jukllapi saqirqani. Chantapis drogasta, alcoholta ima ukyaqkunawan manaña tantakurqanichu, niñataq maypichus kachkanku chaymanpis rirqanichu.

Bibliamanta yachakuchkaspaqa, sapa pʼunchay ñawpaqman richkasqaypi tʼukuriyta, pantaspataq mana anchata llakikunayta ima, yachakurqani. Jehová, allinpaq qhawanawanta may sumaq kasqanpi tʼukuriq kani. Chantá saqra ruwasqasniyta qunqanaypaq, Biblia nisqanmanjina kawsanaypaq ima, Jehovamanta yanapata mañakurqani, paytaq kallpachawarqa ñawpaqman rinallaypaqpuni. Chayrayku wakin kuti alcoholta ukyaypi urmaspapis, Bibliamanta yachakuyta mana saqirqanichu, ñawpaq chʼisi ukyasqaymanta umay nanachkawaptinpis.

Bibliapiqa, Dios sapa jukninchikmanta dakusqanta, llulla religionta tukuchinanta, pachantinpi Reinonmanta willanankupaq kamachisninta yanapachkasqanta ima, yachakurqani (Mateo 7:21-23; 24:14; 1 Pedro 5: 6, 7). Imachus Diospa munaynin kasqanta sutʼita yacharqani. Mayta yanapawasqanmanta agradecekuyta munaspataq Payman qukurqani.

BENDICIONESTA JAPʼISQAY: Kunanmá kusisqa kawsakuni, manañataq qhasipaq kawsachkasqaytachu yuyani (Eclesiastés 12:13). Manaña familiayta llakichinichu, astawanpis tukuy imaymanamanta yanapani. Sutʼinchanapaq, abuelayman Bibliamanta yachakuchkasqayta nirqani, paypis Jehovaman qukurqa, wakin familiaresniypis, juk amigoy pichus ñuqawan khuska ñawpaqta takiq paypis, jinallatataq ruwarqanku.

Kunantaq warmiyuq kani, paywan khuskataq runasman Bibliamanta yachachinaypaq tukuy tiempoyta churani. ‘Tukuy sunquywan Jehovapi atienekuyta yachakurqani’, ajinata ruwasqaymantataq achkha bendicionesta japʼini.

[29 paginapi sutʼinchaynin]

“Pisimanta pisi kusisqa kawsakuyta munarqani”