Infiernomanta chiqa kaqta yachayqa, Diosman qayllaykuchiwanchik

INFIERNOPI, runa wiñaypaq ñakʼarisqanta yachachiqkunaqa, Jehovata, chantá kʼacha kaykunasninta ima, mana allinpaqchu qhawachinku. Chaywanpis Biblia niwanchik, Dios, saqra runasta chinkachinanta, chay nisqantaq chiqa (2 Tesalonicenses 1:6-9). Saqra runasta kʼajaq phiñakuyninpi chinkachiyta munasqanqa, mana ninayanchu mana munakuyniyuq kasqanta.

Diosqa, mana saqrachu. Pay nin: “Noqaqa manapuni munanichu juchallikoj runa wañunanta”, nispa (Ezequiel 18:23). Dios, juchallikuqkunata mana chinkachiyta munasqanta nichkaspa, ¿imaynatá infiernopi runata wiñaypaq ñakʼarichinman?

Diospa, juk kʼacha kayninqa, munakuy (1 Juan 4:8). “TATA DIOSQA tukuypajmin kʼacha; tukuy ruwasqasninta khuyakuywan qhawan.” (Salmo 145:9.) Chayrayku, Payta tukuy sunqu munakunanchikta mañawanchik (Mateo 22:35-38).

¿Infiernota manchachikuychu chayri Diosta munakuychu?

Infiernopi almas ñakʼarisqankuta creeqkunaqa, Diosta manchachikunku. Kaytaq mana ninayanchu Diospa ñawpaqinpi juchallikuyta manchachikusqankuta. Diosta manchachikuyqa, mana imamantapis mancharikuyjinachu, manaqa Diosta, jatunpaq qhawaywan ninakun, chaytaq imatachus chiqnisqanta ñuqanchikpis chiqninanchikpaq yanapawanchik. Diosta riqsisqankurayku, payta munakuqkunaqa ajina manchachikuyniyuq kanku. Salmo 111:10 pʼiti nin: “Yachaypa qallarikuynenqa Tata Diosta manchachikuymin. Kamachisqasninta kasojkunaqa sumaj yuyayniyoj kanku”.

Qhawarina, 32 watayuq, Kathleenta imaynatachus infiernomanta chiqa kaqta yachasqan yanapasqanmanta. Payqa unay drogakuq, fiestamanta fiestataq puriq, khuchichakuq, maqanakuq ima, pay kikintaq chiqnikuq. Payqa juk watayuq wawitanta qhawarispa, tʼukurin: “Qhawa kay ruwasqayta, kay ruwasqayrayku infiernopi wiñaypaq ñakʼarisaq”, nispa. Achkha kutispi, drogakuyta saqiyta munarqa, manataq atirqachu. Pay nin: “Kʼacha runa kayta munarqani, chaywanpis kawsayniy, kay pacha ima, mayta llakichiwaq. Mana kallpachakuyta atillarqanichu kawsayniyta tikrachinaypaq”.

Chaymanta, Jehovamanta sutʼinchaqkunata riqsisqa. Infiernomanta sutʼinchasqankutaq paypaqqa sutʼipacha karqa, chayrayku nin: “Bibliamanjina infiernopi mana nipi ñakʼarichkasqanta yachachiwarqanku. ¡Chay yachachiwasqankumanjinataq, mana infiernopi wiñaypaq ñakʼarinayta yachayqa, mayta sunquchawarqa!”. Chantá wiñaypaq kay Jallpʼapi, achkha runas, tukuy saqra ruwaykunamanta tʼaqasqa kawsakuyta atisqankuta sutʼinchallasqankutaq (Salmo 37:10, 11, 29; Lucas 23:43, NM). Kathleen nin: “Chiqamantapuni juk suyakuyniyuq karqani: juk Paraisopi wiñaypaq kawsakunaypaq”.

Infiernomanta chiqa kaqta yachasqan, ¿Kathleenta manaña drogakunanpaq yanaparqachu? Pay nin: “Sapa kuti drogakuyta munaspaqa, Diosmanta yanapata mañakuq kani. Dios, chay viciota chiqnisqantataq yuyarikuq kani, manataq Diosta llakichiyta munarqanichu. Diosqa, mañakusqaymanjina yanapawaq” (2 Corintios 7:1). Diosta mana llakichiyta munasqanqa, drogakuyta saqinanpaq yanaparqa.

Diosta, mayta munakusqanchik, jatunpaqtaq qhawasqanchikqa —nitaq infiernota manchachikusqanchikqa— Diospa munayninta ruwananchikpaq tanqanawanchik tiyan. Ajinata ruwasunchik chayqa, wiñaypaq kusisqa kawsakuyta atisunchik. Biblia nin: “Kusikuyniyojmin kanku [Jehová] Diosta tukuy manchachikojkuna, pikunachus kamachisqasninta ruwajkunaqa”, nispa (Salmo 128:1).