Munasqa ñawiriq

MAY kusiywan willayta munayku, kay killamantapacha Torremanta Qhawaq revistanchikqa jukjinamanta urqhukunanta. ¿Imaspí jukjina kanqa? Niraq chayta sutʼinchachkaspa, ñawpaqtaqa sutʼinchasunchik imaspichus kikin kananta.

Torremanta Qhawaq. Jehová Diospa Reinonmanta willachkan revistanchikqa, kikin sutillayuqpuni kanqa. Chantapis kay revistaqa chiqa Jehová Diosta jatunchallanqapuni, nawiriqkunatapis Reinonmanta allin willaykunawan sunquchallanqapuni. Chayrayku kay revistapi 18, 19 paginasninpi sutʼinchakuchkan imachus Diospa Reinon kasqanta. Astawanpis watamanta wata rikukusqanmajinaqa, kay Torremanta Qhawaq revistaqa achkha runasta Jesucristopi iñinankupaq yanapallanqapuni, Bibliamanta chiqa yachachiykunasninta jarkʼallanqapuni, sutʼinchallanqapunitaq imaynatachus Bibliap profeciasnin kunan tiemponchikpi juntʼakuchkasqanta.

Kunan, ¿imapí jukjina kanqa? Qhawarina ima yachaqanaschus lluqsimunanta sapa kimsa killapaq revistanchikpi. *

Kunanmantapacha Torremanta Qhawaq revistanqa, iskay layapi urqhukunqa. Juknin revistaqa sapa kimsa killa tukuy runaspaq urqhukunqa, juknin revistataq sapa killa, 15 fechayuq lluqsimunqa, kaytaq Jehovamanta sutʼinchaqkunallapaq kanqa, tantakuyninkupi ukhunchanankupaq, chay tantakuyninkumantaq wak runaspis riyta atinkuman.

Wakin kutiqa miskʼirichikunapaqjina yachaqanas lluqsimunqa. “¿Yacharqankichu?” yachaqanaqa, imasmantachus Biblia parlasqanta allinta entiendenanchikpaq astawan sutʼincharinqa. Chantá “Diosman qayllaykuy” yachaqanaqa, Bibliamanta wakin pʼitikunata sutʼincharinqa astawan Jehovata riqsinanchikpaq. Astawanpis “Ñawiriqkuna yachayta munanku” nisqa yachaqanaqa, Bibliamanta riqsisqa tapuykunaman kutichinqa.

Wakin yachaqanasqa familiaspaq wakichikun. Chayrayku watapi wakin kutilla “Familiaspaq yuyaychaykuna” nisqa yachaqana lluqsimunqa, maypichus sutʼinchakunqa imaynatachus Bibliap yuyaychaykunasnin familiasta yanapanman chʼampaykunasninkuta allinchanankupaq. Chantá “Tatasmanta wawasman” nisqa yachaqanaqa, wakichisqa kanqa, tatas wawasninkuwan ñawirinankupaq. Wakin kutitaq “Waynaspaq” nisqa yachaqana lluqsimunqa, kaytaq waynasta yanapanqa Bibliata astawan ukhuncharinankupaq.

Chantapis kimsa killapaq revistanchikpiqa, wakin kuti kay “Iñiyniyuq kaqkunamanta yachakuna” nisqa yachaqana lluqsimunqa, kay yachaqanataq yanapawasunchik Bibliamanta, Diospa juknin kamachinjina ruwanapaq. Chayrayku kay revistap 14-17 paginasninpiqa, rikhurin juk yachaqana maypichus Eliasmanta sumaqta sutʼinchariwanchik payjina iñiyniyuq kananchikpaq. Chantá “...carta” nisqa lluqsimullanqataq, maypichus Jallpʼantinmanta misionerospa, chayri wakin Diosta yupaychaqkunap qillqasqankuta rikuchinqa. Chantapis “Jesuspa yachachiykunasnin” nisqa yachaqanaqa, Bibliamanta wakin sumaq yachachiykunasninta tukuy entiendenankupaqjina sutʼinchanqa.

Mana iskaychakuspa niyku Torremanta Qhawaq revistanchikqa Bibliata jatunpaq qhawaqkunata, Bibliamanta astawan yachakuyta munaqkunata ima yanapanallantapuni. Tukuy sunquwan munayku kay revista Bibliamanta mayta yachakuyta munasqaykita entiendechinasunta.

QILLQAQKUNA

[Sutʼinchaynin]