Qampaq, Cristop kutimuynin ¿ima niyta munan?
Qampaq, Cristop kutimuynin ¿ima niyta munan?
“[¿]Ima señaltataj rikuchiwasqayku kutimunaykimanta, kay pachaj tukukuyninmantawan?” (MAT. 24:3.)
1. ¿Ima sumaq tapuykunatataq apostolesnin Jesusta tapurqanku?
ICHAPIS iskay waranqa watasña pasan, tawa apóstoles, Jesusta Olivos urqupi sapallanpi jinata tapusqankumanta: “Niwayku, [¿]maykʼajtaj chay imas kanqa? [¿]Ima señaltataj rikuchiwasqayku kutimunaykimanta, kay pachaj tukukuyninmantawan?”, nispa (Mat. 24:3). Kay tapuykuna, iskay sumaq rimaykunamanta parlachkan: “kutimunaykimanta”, “kay pachap tukukuyninmantawan”. ¿Ima niyta munan kay iskay rimaykuna?
2. ¿Imata niyta munan kay “tukukuynin” rimay?
2 Qallarinachik iskay kaq rimayta sutʼinchaspa, chaytaq kachkan, “kay pachap tukukuynin”. “Tukukuynin” rimayqa griego simipi syntéleia, nisqa rimaymanta tikrakun. Traducción del Nuevo Mundo, nisqapi kay rimaytaqa “tukukuynin” nispa tikrachin, chantapis kay rimayqa griego simipi télos, nisqawan riqchʼakullantaq, chaytaq “tukuchay” niyta munan. Kay rimaykuna mana kikinpunichu kasqanta qhawanapaq, Tantakuy Wasipi juk hermano discursonta parlamuchkasqanpi tʼukuriy. Chay discursopta ‘tukukuyninpi’ hermanoqa, yuyarichiwanchik yachachimusqanmanta, chantapis imaynatachus chay yachakusqanchikta kawsayninchikpi ruwananchikta, chay tiempoqa tukukuynin niyta munan. Chaywanpis, discursoqa tukukun discursante parlasqanta ‘tukuchaptin’, plataformamantataq uraykanpuptin. Ajinallatataq, Bibliapi “kay pachap tukukuynin” rimayqa, manaraq kay saqra pacha, tukuy imasnin ima chinkachisqa kachkaptin, juk tiempomanta parlachkan, chay tiempotaq tukuchakunqa, kay pachap tukukuyninwan.
3. ¿Ima ruwaykunataq Jesuspa kutimunan tiempopi ruwakunqa?
3 Chaymantataq apostolesqa, Jesuspa “kutimuyninmanta” tapurqanku, ¿imatachus niyta munasqanta? Kay rimayqa griego simipi parousía, rimaymanta urqhukun. * Parousía, rimayqa chayri, Cristop kutimuyninqa, qallarirqa 1914 watapi, Jesús janaqpachapi Reyjina sayachisqa kasqanmantapacha, “manchay ñakʼariy” tiempokama (Mat. 24:21). Jesuspa kutimunan tiempopi, achkha ruwaykuna kan: kay saqra pachap qhipa “manchay sajra pʼunchaykuna”, janaqpachaman riqkunata akllakun, janaqpachaman kawsarichisqas kasqanku ima (2 Tim. 3:1; 1 Cor. 15:23; 1 Tes. 4:15-17; 2 Tes. 2:1). ¿Imatataq nisunman, “kay pachaj tukukuyninmanta [syntéleia]”? Chay tiempoqa, Cristop kutimunan (parousía) tiempowan ninakusqanta nisunman.
Mana pisi tiempollachu kanan karqa
4. ¿Imaynatá Jesuspa kutimuynin Noep pʼunchayninpi ruwaykunawan kikinchakun?
4 Rikunchikjina parousía rimayqa mana pisi tiempochu, Jesustaq kutimuyninmanta parlasqanqa, chayllatataq rikuchirqa (Mateo 24:37-39, ñawiriy). Kaypi tʼukurina, Jesusqa, paypa kutimunan tiempota, mana Noep pʼunchayninpi Jatun Parapi paramusqanwanchu kikincharqa. Manaqa, Jatun Para manaraq jamuchkaptin, saqra runap kawsayninwan kikincharqa, chay tiempotaq Jatun Parawan tukukurqa. Chay tiempopiqa, Noé arcata ruwarqa, chay saqra runas chinkanankuta willarqa ima, Jatun Para chayamunankama. Chay ruwaykunaqa, mana pisi tiempollapichu ruwakurqa. Jinallatataq, Cristop kutimuyninqa mana pisi watasllachu, manaraq Jesús jamuchkaptin imaschus kasqan, jinallataq Cristo jamuyninpi, manaraq jatun ñakʼariy chayamuchkaptin ruwakusqan, jatun ñakʼariypis chay tiempollapitaq kanqa (2 Tes. 1:6-9).
5. ¿Imaynatá Apocalipsis libromanta 6 tʼaqan Jesuspa kutimiynin mana pisi tiempollachu kasqanta rikuchiwanchik?
5 Bibliap wak profeciasninpis, Cristop kutimuynin mana pisi tiempollachu kasqanta rikuchiwanchik, chayrayku nisunman mana saqra runa ima ratochus chinkachisqas kasqanku tiempollachu. Apocalipsis libroqa Jesusta juk yuraq caballopi llukʼaykusqata, juk pilluta japʼichkaqta ima rikuchin (Apocalipsis 6:1-8, ñawiriy). Jesusqa, 1914 watapi Reyjina sayachisqa kaytawan, payqa “atipaspa llojserqa, atipanallampajtaj”. Chaymantapis Apocalipsis libro achkha coloresniyuq caballospi lluqʼaykusqa runas qhipanta richkasqankuta rikuchillantaq. Profetisakusqanmajina, chay caballospi lluqʼaykusqa runasqa, ‘Qhipa manchay saqra pʼunchaykunapi’ maqanakuykuna, yarqhaykuna, jatun unquykuna ima, niyta munan, chaytaq mana pisi tiempollapichu rikukun. Kunanqa imaynatachus kay profecías kunan tiemponchikpi juntʼakuchkasqanta qhawachkanchik.
6. Kay Apocalipsis libromanta 12 tʼaqan, ¿Imatataq Cristop kutimuyninmanta yachachiwanchik?
6 Apocalipsis libropi 12 tʼaqanpi Diospa Reinon imaynatachus sayachisqa kasqanta astawan sutʼinchawanchik. Chaypi willawanchik janaqpachapi juk maqanakuy kasqanmanta. Miguel —janaqpachapi Jesucristop juknin sutin— angelesnin ima, Satanaswan, supaykunawan ima maqanakunku. Ajinamanta Miguelqa, Satanasta supaykunasninta ima, jallpʼaman wikchʼumurqa. Supaytaq mayta phiñakun, imaraykuchus “paypaj pisi tiempollaña kasqanta” yachaspa (Apocalipsis 12:7-12, ñawiriy). Kaykunataq sutʼita rikuchiwanchik, janaqpachapi Cristop Reinon sayachisqa kasqanmantapacha, jallpʼapaq runapaq ima, manchay ñakʼariykuna kasqanta.
7. ¿Imamanta kay iskay kaq Salmos parlarqa, imapaqtaq chay runasman tiempota qukurqa?
7 Salmospa iskay kaq tʼaqanpis parlallarqataq Jesús janaqpacha Sión urqupi Reyjina churasqa kananmanta (Salmo 2:5-9; 110:1, 2, ñawiriy). Kay salmo nillantaq kay jallpʼamanta kamachiqkunaman, runaman ima tiempota qukusqanta, paykuna Cristota Kamachiqninkutajina qhawanankupaq, paypa nisqanta ruwanankupaq ima. Paykunaman nikun “yachayniyoj kaychej”, “kʼumuykukuspa” payta kasukuychik nispa. Chay tiempopi, “kusikuyniyojmin kanku paypi [Jehovapi] pakakuyta maskʼajkuna” munayninta ruwaspa, Jesús Reyninkuta kasukuspa ima. Qhawanchikjina, chay runas Jesusta Reyninkutajina qhawanankupaq, tiempota qukurqa, Jesús Reyjina kutimuynin tiempopi (Sal. 2:10-12).
¿Pikunataq chay señalta reparananku karqa?
8, 9. ¿Pikunataq Cristop kutimuyninmanta señalta reparankuman karqa, imachus niyta munasqanta ima?
8 Juk kuti fariseos Jesusta maykʼaqchus Reino jamunanmanta tapurqanku, Jesustaq paykunaman “mana reparayllata jamonqa”, nispa kutichirqa (Luc. 17:20, 21). Arí, mana creeq runasqa mana reparayta atinkumanchu karqa. ¿Imaynatá reparankuman karqa, Jesusta mana Reyninkutajina qhawaqkunari? Jina kaptinqa, ¿pikunataq Cristop kutimuyninmanta señalta reparankuman karqa, chantapis imachus Jesuspa kutimuynin niyta munasqanta entiendenkuman karqa?
9 Jesusqa, discipulosnillan chay señalta sutʼita reparanankuta nirqa, “imaynatachus lliuj lliujqa” cielopi sutʼita rikukun kikinta (Lucas 17:24-29, ñawiriy). Mateo 24:23-27 chayllamantataq parlan, chantapis jinallatataq kikinchan Cristop kutimuyninmanta señalwan.
Kay mita runas chay señalta rikunanku karqa
10, 11. a) ¿Imaynatá Mateo 24:34 pʼitipi “mita runas” nisqanta unay watas sutʼinchakurqa? b) ¿Imatá Jesuspa discípulos entidenkuman karqa, pikunachus chay “mita runasmanta” kasqankuta?
10 Ñawpaq wataspi kay revistaqa, Mateo 24:34 “kay mita” rimaymanta parlasqanqa, ñawpa kaq siglopi “judiosmanta mana creeq mita runas” kasqankuta sutʼincharqa. * Kay sutʼinchayqa, allin kasqanta yuyakurqa, imaraykuchus Jesusqa mita runas rimaymanta parlaspa, achkha kutita saqra runasmanta parlarqa. Arí, Jesusqa ‘mita runas’ rimayta “sajra” runaspaq uqharirqa, chayri paykunamanta mana allintachu parlarqa (Mat. 12:39; 17:17; Mar. 8:38). Chayrayku kay “mita runas” rimaywan Jesús kunan tiempopi saqra runamanta parlachkasqanta yuyakurqa, chantapis paykuna “kay pachaj tukukuynin[ta] [syntéleia]”, rikunanku karqa, jinallataq kay saqra pachap (télos) tukukuynintapis.
11 Arí, Jesusqa mita runas rimayta saqra runamanta parlananpaq uqharirqa, chantapis paykuna kasqankuta nirqa. Chaywanpis ¿saqra runallamantataqchu Mateo 24:34 pʼitipi parlachkarqa? Yuyariy, tawa apostolesninqa Jesusta “sapallampi taporqanku” (Mat. 24:3). Jesús chay kuti kay ‘mita runas’ nispa mana saqra runasmantachu parlachkarqa, chayrayku apostolesninqa wak discipulosninpis chay ‘mita runasmanta’ kasqankuta yacharqanku. Paykunaqa “chay tukuy ima juntʼakunankama” mana pasanankuchu karqa.
12. ¿Imaynatá Jesús imamantachus parlachkasqanta yachay yanapawanchik, pikunapaqchus mita runas rimayta uqharisqanta yachanapaq?
12 ¿Imaynapi kay yuyayman chayanchik? Allinta Jesuspa parlasqanpi tʼukurispa. Mateo 24:32, 33, pʼitikunapi Jesús nirqa: “Yachaqakuychej higo sachʼamanta kay rijchʼanachinata: Maypachachus ramasnin qʼomeryayta, laqheytataj qallarinku chaypacha, yachankichej qʼoñi tiempo qayllapiña kasqanta. Ajinallatataj qankunapis chay tukuy ima rikhurimojtenqa, yachaychej Runaj Churenqa punkupiña kasqanta” (kaykunawan kikinchay Marcos 13:28-30; Lucas 21:30-32). Chantapis Mateo 24:34, nin: “Chiqatapuni niykichik: kay mita runasqa manaraq wañunqankuchu, chay tukuy ima juntʼakunankama”.
13, 14. ¿Imaraykutaq nisunman Jesús “mita runas” nispa discipulosninmanta pachkasqanta?
13 Mateo 24:33, pʼitipi Jesús discipulosninman nirqa juk chhikamantawan santo espirituwan akllasqa kanankuta, paykuna “chay tukuy ima” ruwakusqanta rikuspa, imachus niyta munasqanta sutʼinchananku karqa. Chayrayku nisunman Jesús discipulosninmanta parlachkasqanta, kayta nispa: “kay mita runasqa manaraq wañunqankuchu, chay tukuy ima juntʼakunankama”.
14 Jesuspa discipulosninqa, mana creeq runasjinachu señalta rikullankuman karqa, manaqa juk jatun ruwaykuna kasqanta entiendenanku karqa. ‘Yachaqakunkuman’ karqa, señalpi imaschus kasqanta rikuspa, chantapis imachus niyta munasqanta entiendenanku karqa. “Runaj Churenqa punkupiña kasqanta” sutʼita reparankuman karqa. Arí, mana creeq judiospis jinallataq espirituwan akllasqa cristianospis, ñawpaq kaq siglopi Jesús nisqan imaynatachus juntʼakusqanta jukchhikanta rikurqanku. Chaywanpis, akllasqa cristianoslla chay rikusqankumanta ‘yachakurqanku’, nisunman imatachus niyta munasqanta entienderqanku.
15. a) Kunan pʼunchayninchikpi, ¿pikunataq Jesús nisqanmanta “mita runas” kanku? b) ¿Imaraykutaq mana yachayta atisunmanchu machkha unaychus kasqanta “kay mita runas” nisqa? (25 paginapi recuadrota qhawariy)
15 Kunan tiempopi, Diosmanta mana chiqata yachaq runaspaqqa, Jesuspa kutimuyninmanta señal “mana reparayllata” jamunan karqa. Paykunapaqqa mana imapis kanmanjina kikillanpuni kachkan (2 Ped. 3:4). Mana chaymanjinataq Cristop akllasqa hermanosninqa, kunan tiempopi Juanjina kaqkuna, señalta sutʼita rikunku juk lliwq lliwqjina (rayojina) kanmanpisjina, imatapunichus niyta munasqantataq entiendenku. Tukuyninku, kunan tiempopi akllasqa kaqkunaqa, “mita runas” nisqa kanku, paykunaqa kikin tiempopi kawsanku, chantapis “chay tukuy ima juntʼakunankama” kawsanqanku. * Chayrayku ninsunman, ichapis ‘jatun ñakʼariy’ qallariptin, wakin Cristop akllasqa hermanosninqa kay Jallpʼapi manaraq wañunqankuchu.
“Ama puñuspa wakichisqapuni kaychej”
16. ¿Imatataq Cristop tukuy discipulosnin yachananchik tiyan?
16 Chaywanpis, señalta mana reparayllachu. Jesús jinata nirqa: “imatachus qankunaman niykichej, chayllatataj runasmampis nini: Ama puñuspa wakichisqapuni kaychej, nispa” (Mar. 13:37). Kayta ruwayqa may sumaqpuni ñuqanchikpaqqa, akllasqas kaptinchik chayri ‘may chhika runamanta’ kaptinchikpis. 1914 watamantapacha 90 watas kuraqña pasanku, chay watapi Jesús janaqpachapi Reyjina sayachisqa karqa. Manapis atikullanchu chaywanpis, mana puñuspa, wakichisqas kananchik tiyan. Ajina runas kananchikpaq, Cristo Reyjina kamachichkasqantaña sutʼita yachay, allinta yanapawasun. Chantapis, saqra runata chinkachinanpaq jamuyninqa, “mana yuyasqaykichej horapi” kasqanqa suyanallapaqpuni yanapawanchik (Luc. 12:40).
17. ¿Imaynatá yanapawanchik Cristop kutimuyninmanta entiendey, ima ruwaytataq astawan juntʼananchik tiyan?
17 Cristop kutimuyninmanta allinta entiendeyqa, manaña ancha tiempo kasqanrayku aswan sinchita llamkʼananchikpaq yanapawanchik. Jesús kutimusqantaña yachanchik, mana runa rikunanpaqjina, 1914 watamantapachataq janaqpachapi kamachichkasqanta. Juk chhikamantawan, saqra runata chinkachinqa, kay Jallpʼapitaq mana allin kaqta may allinman tikrachinqa. Chayrayku, kunanmin astawanqa, Jesús kamachiwasqanchikta juntʼananchik tiyan: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachama tukukoyqa [télos] jamonqa” (Mat. 24:14).
[Sutʼinchaykunasnin]
^ párr. 3 Imachus parousía rimay niyta munasqanta, astawan ukhuncharisunman, 2 Corintios 10:10, 11, ñawirispa, chaypi apóstol Pablo ‘karupi kasqanta’, chantapis ‘chaypi kasqanta’, nin; chayllatataq Filipenses 2:12, rikuchiwanchik. Astawan kaymanta yachanapaq Perspicacia para comprender las Escrituras, vol. 2, págs. 710-713, ñawiriwaq.
^ párr. 10 La Atalaya del 1 de noviembre de 1995, págs. 11-15, 19, 30, 31, nisqata ñawiriy.
^ párr. 15 Rikukusqanmanjina “kay mita runas” kawsanku, apóstol Juan Apocalipsis libropi ñawpaq kaq musquypijina rikusqan juntʼakuchkaptin (Apo. 1:10–3:22). Chaypis, Señorpa pʼunchayninpi ruwakunallanqataq, chay tiempoqa 1914 watamantapacha, tukuy akllasqakunamanta qhipata wañuq kawsarimunankama kanqa (kay Apocalipsis... ¡se acerca su magnífica culminación!, nisqamanta, 24 paginata, 4 parrafota, ñawiriy).
¿Imatataq kutichiwaq?
• ¿Imaynatá yachanchik Jesuspa kutimuynin mana pisi tiempollachu kasqanta?
• ¿Pikunataq Jesuspa kutimuyninta reparanku, imatachus niyta munasqanta ima entiendenku?
• Kunan pʼunchayninchikpi Mateo 24:34 nisqanmanjina, ¿pikunataq “mita runas” nisqamanta kanku?
• ¿Imaraykutaq mana yachayta atisunmanchu machkha unaychus “kay mita runas” kananta?
[Tapuykuna]
[29 paginapi recuadro]
¿Atisunmanchu niyta machkha watastachus “kay mita runas” kawsasqanta?
Mita runas rimayqa, juk tiempollapi imaymana watasniyuq runas kawsasqankuwan ninakun, chayri chay kikin tiempopi juk chhikallantapis khuska kawsasqankuwan ninakun. Éxodo 1:6 nisqanta qhawarina, chaypi nin: “Josewan wawqesninwan wañuporqanku, jinallataj paykunaj mitasninkupis”. Josewan hermanosninwanqa mana kikin watasniyuqchu karqanku, chaywanpis juk tiempollapi imaschus kasqanta tukuypis rikurqanku. ‘Chay mita runasmanta’ karqanku Josepta achkha kuraq hermanosninpis, paykunataq ñawpaqta nacerqanku. Paykunamanta wakinqa, José wañusqanmanta kawsachkallarqankuraq (Gén. 50:24). “Chay mita runaspiqa”, Josep sullkʼa hermanon Benjaminjina kallarqankutaq, ichapis José wañupusqanmanta qhipaman kawsallarqankuraq.
Chayrayku, machkha unaychus juk mita runas kawsasqanta mana sutʼita yachakuyta atikunmanchu, juk tiempopi achkha runas kawsasqankurayku. Kayllata niyta atisunman, chay tiempoqa tukukunqa, manataq ancha unaychu kanqa. Chayrayku nisunman, Jesús “kay mita runas” Mateo 24:34, nisqanqa, discipulosnin mana maykʼaqchus kay “qhepaman manchay sajra pʼunchaykuna” tukukunanta, niyta atinankupaqchu karqa. Manaqa, chayta niytawan, kaytapis sutʼinchallarqataq, “ima pʼunchaychus, ima horachus” chay imas kananta mana yachanankuta (2 Tim. 3:1; Mat. 24:36).
[28 paginapi dibujo/foto]
Jesús 1914 watapi Reyjina sayachisqa kasqantawan, “atipaspa lloqsirqa”
[30, 31 paginaspi dibujo/foto]
“Kay mita runasqa manaraq wañunqankuchu, chay tukuy ima juntʼakunankama”