RUSIAPI Jehovaj testigosninpajqa 1991 wata may sumaj karqa. Paykunataqa ashkha watasta willajta mana saqerqankuchu, chay watapitaj chay suyumanta kamachej Jehovaj testigosnin uj religión jina qhawasqa kasqankuta nerqa. Chay watapajqa chay suyupi niraj 16.000 willajkunapis karqankurajchu. Ni pi yacharqachu kay tiempopi 170.000 willajkunaman chayanankuta. Chay hermanosmanta wakenqa waj suyusmanta kanku, runastataj Diospa llajtanman yaykunankupaj yanapashanku (Mat. 9:37, 38). Chay suyuman wakin rejkunamanta parlarina.

Gran Bretañamanta, Matthewqa 28 watayoj kasharqa Rusiapi Jehovaj testigosnin uj religión jina qhawasqa kananta nikushajtin. Chay watallapitaj uj jatun tantakuyman rerqa, chaypitaj Europaj inti llojsimuynin ladopi ashkha qotuchakuykuna yanapata necesitasqankuta willakorqa. Chay tantakuypi umallirichejtaj San Petersburgo nisqaj ujnin qotuchakuyninpi uj siervo ministeriallla kasqanta, hermanos Bibliamanta ashkha runasman yachachishasqankuta ima nerqa. Matthew nin: “Jatun tantakuypi imatachus nikusqanpi yuyallarqanipuni. Chayraykutaj chay lugarman ripunayta Jehovaman nerqani”, nispa. Payqa qolqeta tantakorqa, wakin imasninta venderqa, 1992 watapitaj Rusiaman riporqa. ¿Imaynataj Rusiapi rerqa?

Matthew nin: “Waj qalluta parlasqankurayku runasman Diosmanta willayta mana atillarqanichu”, nispa. Payqa wasitapis mana tariyta atillarqachu. Pay nin: “Manaña yuyarikunichu mashkha kutitachus astaykachakusqaytapis, imaraykuchus sapa kuti astakoj kani”, nispa. Ajinapi rikukojtinpis, Rusiaman ripuyta ajllasqanqa kausayninpi may sumaj karqa. ¿Imaraykú? Pay nin: “Jehovapi astawan atienekuyta yachakuni. Ashkha kutispitaj yanapawasqanta rikuni”, nispa. Tiempo pasasqanman jinataj chay hermanoqa anciano, precursor especial ima karqa. Kunantaj San Petersburgoj qayllanpi kaj sucursalpi llankʼashan.

Hirooqa 25 watasniyoj kashaspa, 1999 watapi Escuela de Entrenamiento Ministerial nisqamanta  Japonpi graduakorqa. Chay Escuelamanta ujnin yachachejtaj waj suyupi Diosta sirvinanpaj kallpacharerqa. Rusiapi willajkuna necesitakusqanta uyarisqanraykutaj ruso qalluta yachakorqa. Pay nin: “Rusiaman sojta killata tiyakoj rerqani. Chay suyupi qhasay tiempo manchay chiri kasqanrayku noviembrepi rerqani, chiripi tiyakuyta atinallaytachus manachus yachanaypaj”, nispa. Qhasay tiempo pasaytataj Japonman kutiporqa, qolqeta tantananpajtaj necesitasqallanpi gastarqa, chantá Rusiaman riporqa.

Hiroo Rusiaman ripusqanmanta 12 watasña pasan. Payqa ashkha qotuchakuykunapi yanapakorqa. Chaykunamanta wakinpitaj pachaj willajkunamanta astawan karqanku, pay sapantaj anciano karqa. Uj qotuchakuypi sapa semana Willayta Yachanapaj Tantakuyta casi tukuyninta ruwaj, Diosmanta Parlayta Yachanapaj Tantakuyta, Torremanta Qhawaj revistata ukhunchanapaj tantakuyta ima ruwaj. Libromanta Yachaqanapaj tantakuytapis sapa semana phishqa kutita ruwaj. Chantapis hermanosta kallpachananpaj waturej rej. Pay nin: “Hermanosta creeyninkupi sinchʼita sayanankupaj yanapayqa mayta kusichiwan”, nispa. ¿Imaynatá chayta ruwasqan yanaparqa? Pay nin: “Niraj Rusiaman ripushaspa ancianoña, precursorña karqani. Chantapis Jehovapi tukuy sonqo atienekuyta yachakorqani”, nispa. Payqa Svetlana sutiyoj hermanawan 2005 watapi casarakorqa, iskayninkutaj precursores kanku.

Canadamanta Matthew, hermanon Michael ima Rusiaman rerqanku. Matthewqa 34 watasniyoj, Michaeltaj 28 watasniyoj kashan. Paykunaqa Rusiapi uj qotuchakuypi ashkha runasta tantakuykunapi rikuspa, pisi hermanoslla Bibliamanta yachachishasqankuta rikuspa ima mayta tʼukorqanku. Matthew nin: “Chay qotuchakuypeqa 200 runas kasharqanku. Tantakuykunatataj uj machitu ancianolla, uj wayna siervo ministerial imalla ruwarqanku. Chayta rikuspa hermanosta yanapaj riyta munarqani”, nispa. Kay 2002 watapitaj Rusiaman riporqa.

Tawa watanmantaj hermanon Michaelpis Rusiaman riporqa. Siervo ministerial kasqanrayku qotuchakuypi qolqe apaykachakusqanta qhawananpaj, publicacionesta mañananpaj, territoriosta wakichinanpaj ima churarqanku. Chantapis tantakuykunapi umallirichinanta, qotuchakuymanta secretarioj ruwanasninta ruwananta, jatuchaj tantakuykunata wakichiypi, Tantakuna Wasista ruwaypi ima yanapakunanta nillarqankutaj. Kunankamapis Rusiapi yanapa necesitakushallanpuni. Michaelqa ancianoña, ashkha ruwanayoj kaspapis hermanosta yanapaspa sonqo juntʼasqa kausakun. Pay nin: “Hermanosta yanapayqa, tukuy imamanta aswan sumaj”, nispa.

Matthewqa, Marinawan casarakorqa, Michaeltaj, Olgawan. Tawantinkutaj waj hermanos jina qotuchakuykunata yanapashallankupuni.

Ucraniaman 1994 watapi Tatyanaj qotuchakuyninman República Checa, Polonia, Eslovaquia nisqamanta sojta precursores especiales chayarqanku, Tatyanaqa 16 watasniyoj kasharqa. Pay nin: “Chay hermanosqa Jehovapaj mayta llankʼaj kanku, kʼachas kaj kanku, qayllaykunapaj jinalla kaj kanku, Bibliaj yachachiynintataj sumajta rejsej kanku”, nispa. Chay hermanosta kallpachakusqankurayku imaynatachus Jehová bendecisqanta rikuspataj, paykuna jina kayta munasqanta nerqa.

Chay sipasqa vacacionesninpi Ucrania, Bielorrusia nisqa lugarespa kʼuchusninkama waj hermanoswan Diosmanta willaj rerqa. Chayta ruway mayta gustasqanrayku, Rusiaman ripunanpaj wakichikuyta qallarerqa. Chayraykutaj uj tiempota waj suyumanta hermanawan tiyakorqa, kausakunanpajtaj uj llankʼayta  maskʼakorqa. Kay 2000 watapitaj Rusiaman riporqa. ¿Chayta ruwayta atillarqachu?

Payllataj nin: “Uj departamentomanta mana pagayta atispa, uj cuartollata alquilakorqani. Waj wasipeqa mana tiyakuyta atillanchejchu. Chayrayku wakin kutis wasiyman kutipuyta munarqani, chaywanpis sapa kuti Jehová yanapawarqa chay suyullapipuni qhepakunaypaj”, nispa. Kunantaj payqa misionera jina Rusiapi llankʼashan. Pay nin: “Tukuy kay watasta kaypi kasqayqa yanapawan sumaj imasta yachakunaypaj, qotuchakuypi astawan amigosta tarinaypaj ima. Yanapawantaj creeyniy astawan wiñananpaj”, nispa.

Japón suyumanta Masako sutiyoj hermananchej 50 watasniyojña. Payqa misionera kayta munarqa, uj onqoyniyoj kasqanraykutaj ni jaykʼaj misionera kananta yuyarqa. Chaywanpis tumpata thañirispa Rusiaman Diosmanta willaj riporqa. Uj wasita, uj llankʼayta mana tariyta atispapis, japonés qalluta yachachispa, llimphuchaspa ima llankʼakorqa. ¿Imataj yanaparqa Rusiapi qhepakunallanpajpuni?

Rusiapi 14 watastaña kaspa, Masakoqa tukuy sonqo nin: “Llakiykunapi rikukuspapis, Diosmanta willaypi may sumaj riwasqan kusichiwan. Pisi willajkuna kanku chaypi yanapakoyqa may sumajpuni. Kay tukuy wataspi Jehová imatachus necesitasqayta qowan, nisunman wasita, mikhuyta, pʼachata ima. Tukuy chaytaj noqapajqa uj milagro jina”, nispa. Masakoqa Rusiapi kaj qotuchakuykunapi yanapakuspapis, Kirguistanpipis Diosmanta willarqa, chantapis inglés, china, uigur ima qotituspi yanapakullarqataj. Kunantaj San Petersburgo nisqapi precursora jina llankʼashan.

Ashkha familias waj suyuman ripunku qolqeta maskʼasqankurayku. Wakin familiastaj Abraham jina, Sara jina Jehovata astawan sirvinankurayku (Gén. 12:1-9). Ucraniamanta uj qhariwarmi Mikhail, Ingawan chayta ruwarqanku. Paykunaqa 2003 watapi Rusiaman riporqanku. Chaypitaj Bibliamanta yachakuyta munaj runasta tarerqanku.

 Mikhail nin: “Uj kuteqa rerqayku, maypichus ni jaykʼaj willakusqachu chayman. Chaypitaj uj machitu runa uyariwarqayku, tapuwarqaykutaj: ‘¿Diosmantachu willashankichej?’, nispa. Noqaykutaj ‘arí’ nerqayku, paytaj niwarqayku: ‘Yacharqani uj pʼunchay jamunaykichejta, Jesuspa nisqanqa juntʼakunan tiyan’, nispa. Mateo 24:14 versiculoj nisqanmantapis parlariwarqayku. Chay lugarllapitaj bautista religionmanta chunka warmista tarerqayku, cheqa kajmantataj yachakuyta mayta munasharqanku. Paykunajta Vivir para siempre nisqa libronku tiyaporqa, sapa semana tukukuytataj chay librowan Bibliata ukhunchaj kanku. Paykunawanqa unayta qhepakorqayku tapuykunasninkuman kutichinaykupaj, takina libronchejmantataj takiykunata takirerqayku, mikhurerqayku ima. Chaytataj may kusiywan yuyarikullanipuni”, nispa. Chay qhariwarmitaqa Rusiaman ripusqanku Jehovaman astawan qayllaykucherqa, runastapis astawan munakorqanku, chayraykutaj sonqo juntʼasqa kanku. Kunanqa Mikhail warminwan khuska qotuchakuykunata waturispa llankʼashan.

Ucraniamanta uj qhariwarmi Yury, Oksana, wawanku Aleksey ima, 2007 watapi Rusiapi kaj sucursalta waturej rerqanku. Kunantaj wawanku 13 watayojña kashan. Sucursalpitaj chay suyumanta uj mapata rikorqanku, chay mapapitaj sumaj willaykuna mana willakorqarajchu chay lugaresta rikorqanku. Oksana nin: “Mapata rikuspa yacharqayku chay lugarespi Reinomanta willajkuna necesitakusqanta. Chaytaj yanapawarqayku chay suyuman ripunaykupaj”, nispa. ¿Imaspiwantaj chay familiata Rusiaman ripunankupaj yanaparqa? Yury nin: “Torremanta Qhawaj revistapi ‘Atiwajchu waj suyuman willaj riyta’ nisqa yachaqanata, chayman rijchʼakoj yachaqanasta ima leerqayku. * Sucursal ima lugarmanchus rinaykuta niwarqayku, chay lugarman riporqayku. Chaypitaj uj wasita, uj llankʼayta ima maskʼakorqayku”, nispa. Kay 2008 watapi Rusiaman riporqanku.

Chay familiaqa uj llankʼayta mana tariyta atillarqachu. Chantapis ashkha kutispi astakunanku karqa. Yury nin: “Jehovamanta mayta mañakorqayku mana llakikunaykupaj, chantapis Reinomanta willallarqaykupuni. Jehová yanapanawaykupitaj atienekorqayku. Paytaj mana saqerpariwarqaykuchu. Rikorqayku Reinonta ñaupajman churajtinchej necesitasqanchejta qowasqanchejta. Diosmanta willasqaykoqa familiaykuta astawan ujchaykorqa”, nispa (Mat. 6:22, 33). Ajinata ruwasqanku, ¿wawankuta yanaparqachu? Yury nin: “Rusiaman Diosmanta willaj ripusqaykoqa wawaykuta mayta yanaparqa. Imaraykuchus 9 watayoj kashaspa bautizakorqa, kunantaj vacacionesninpi precursor auxiliar jina llankʼan, Diospaj ashkha llankʼajkuna necesitakusqantataj reparan. Sonqo kʼajaywan willajta rikuspataj mayta kusikuyku”, nispa. Kunantaj chay qhariwarmeqa 35 watasniyoj jinaña kashanku, precursores especialestaj kanku.

Kay yachaqanapi hermanos willariwasqanchejqa suyunchejmanta waj lugarman chayri waj suyuman willaj rinapaj Jehovapi astawan atienekuna kasqanta yachachiwanchej. Waj lugaresman willaj ripojkunaqa ashkha chʼampaykunapi rikukuspapis Diosmanta kʼacha sonqoyoj runasman willaspa may kusisqas kanku. Qanpis pisi willajkuna kanku chayman, ¿ripuyta munawajchu? Ripunki chayqa, Yury jina kusisqa kanki. Pay nin: “Uj imallamanta pesachikuni, ñaupajpiña mana ripusqaymanta”, nispa.