1. ¿Imatataj runas yuyanku?

DIOSPA kamachiykunasninta pisipaj qhawaj runaspa chaupinkupi tiyakunchej. Sutʼincharinapaj, runasqa yuyanku niraj casarakushaspa qhariwarmi jina puñuykuy, qharipura chayri warmipura khuchichakuy mana juchachu kasqanta. Chay ruwaykunataj peliculaspi, librospi, takiykunapi, waj imaspi ima mayta rikukun (Sal. 12:8). Chaywanpis Jehovaqa yanapayta atiwanchej munasqanman jina kausakunapaj. Kay pachamanta runas millay chʼichi imaspi yuyajtinkupis, noqanchejqa llimphu imaspi yuyayta atinchej (1 Tesalonicenses 4:3-5 leey).

2, 3. 1) ¿Imaraykutaj sajra yuyaykunata qhesachananchej may allin? 2) ¿Imasmantataj kay yachaqanapi yachakusunchej?

² Tukuypis juchasapa runas kanchej. Chayraykutaj imaynatachus wawasman miskʼi mayta gustan, ajinallatataj ichapis wakin sajra imas gustawasunman. ¿Imatataj ruwasunman sajra imaspi yuyajtinchej? Usqhayllata yuyayninchejmanta  orqhonanchej tiyan. Chayta mana ruwajtinchejqa, ichá sajra imaspi astawan yuyayta qallarisunman. Chay jina yuyaytaj juchapi urmachiwasunman (Santiago 1:14, 15 leey). Chayrayku Diosta kusichiyta munanchej chayqa, sajra yuyaykunata qhesachananchejpuni tiyan.

³ Rikunchej jina, imatachus yuyasqanchejta sumajta qhawarikunanchej tiyan. Sajra yuyaykunata qhesachasunchej chayqa, mana khuchichakuy juchapi urmasunchu, nitaj ñakʼarisunchu (Gál. 5:16). Kay yachaqanapitaj sajra yuyaykunata atipanapaj kinsa yanapasmanta yachakusunchej. Ñaupaj kajqa, Jehovawan allinpi kasqanchej. Iskay kajtaj Bibliaj yuyaychaykunasnin. Kinsa kajtaj, wiñay tukusqa hermanospa yanapayninku.

4. ¿Imaraykutaj Dioswan allinpi kananchej may allin?

⁴ Bibliaqa Dioswan allinpi kayta munajkunaman kayta nin: “Makisniykichejta sajra ruwaymanta llimphuchakuychej [...] sonqosniykichejta chʼuwachaychej”, nispa (Sant. 4:8). Dioswan allinpi kasqanchejta jatunpaj qhawasqanchejrayku, Diospa nisqanman jina yuyanapaj, ruwanapaj ima mayta kallpachakunchej. Nitaj sonqonta nanachinapaj jina imatapis ruwayta munanchejchu. Astawanpis llimphu imasllapi yuyanapaj mayta kallpachakunchej (Sal. 24:3, 4; 51:6; Fili. 4:8). Arí, Jehovaqa juchasapa runas kasqanchejta, wakin kutis sajra yuyaykunata mana atipayta atisqanchejta ima yachan. Sonqonta mana nanachiyta munasqanchejraykutaj, kallpachakunchej sajra yuyaykunata qhesachanapaj, llimphu imasllapi yuyanapaj ima (Gén. 6:5, 6).

5, 6. ¿Imaynatataj Diosmanta mañakuy sajra imasta atipanapaj yanapawanchej?

⁵ Diosmanta mana saykʼuspa mañakullasunpuni chayqa, sajra yuyaykunata atipanapaj yanapawasunchej. Imaraykuchus Jehovaqa espíritu santonta qowasunchej, llimphu kanapajtaj kallpachawasunchej. Diosmanta mañakushaspaqa, kusichisqan imasllapi yuyayta munasqanchejta nisunman (Sal. 19:14). Chantapis mañakuyninchejpi sonqonchejta allinta qhawaykurinanta nisunman, “sajra ñantachus purishan[chej] manachus” chayta reparanapaj (Sal. 139:23, 24). Khuchichakuy juchaman tanqasqa kashaspataj, chay juchapi mana urmanapaj yanapanawanchejta mañakullasunmantaj (Mat. 6:13).

⁶ Ichapis manaraj Jehovaj testigon kashaspa, sajra imasta ruway gustawaj kanchej. Wakin kutistaj ichapis chaykuna watejmanta yuyayninchejman jamunman. Chaywanpis Jehová yanapawasunman chay sajra imasta mana ruwanapaj. Rey Davidpis uj casarasqa warmiwan khuchichakorqa. Chay ruwasqanmanta pesachikuspataj, Diosmanta yanapata mañakorqa, pay nerqa: “Diosníy, llimphu sonqota qoway. Ukhuypi mosoj cheqan espirituta churay”, nispa (Sal. 51:10, 12, 13). Chayrayku sajra yuyaykunata mana atipayta atishankichu chayqa, Jehovamanta yanapata mañakuy. Imaraykuchus Pay yanapasonqa tukuy sonqo kasukuyta munanaykipaj, sajra yuyayniykita atipanaykipaj, sajra imasta mana ruwanaykipaj ima (Sal. 119:133).

7. ¿Imaynatá Biblia yanapawanchej sajra imasta qhesachanapaj?

⁷ Jehovaqa mañakuyninchejman Biblianejta kutichiwanchej. Imaraykuchus Bibliapeqa Diospa yachaynin llimphu kasqanta rikunchej (Sant. 3:17). Chayrayku sapa pʼunchay Bibliata leesun, chaypi tʼukurisun ima chayqa, yuyayninchejta jarkʼasun sajra imaspi mana yuyanapaj (Sal.  19:7, 11; 119:9, 11). Chantapis Bibliaqa, sajra munayninkuwan atipachikoj runasmanta, sajra imasta qhesachaj runasmanta ima parlan. Chantapis Bibliapeqa sumaj yuyaychaykuna kallantaj, chaykunataj sajra imasta atipanapaj yanapawanchej.

8, 9. 1) Proverbios 7 capítulo nisqanman jina, ¿imaraykutaj uj wayna phisu warmiwan khuchichakorqa? 2) ¿Imastaj khuchichakuypi urmanapaj tanqawasunman?

⁸ Proverbios 5:8 versículo yuyaychawanchej khuchichakuy juchamanta karunchakunanchejta. Proverbios 7 capitulopeqa, uj waynamanta parlashan. Chay waynaqa laqhayaykushajtinña phisu warmi tiyakorqa chaynejman puriykacharej rerqa. Chay warmitaj aychaj munayninta rijchʼarichinapaj jina pʼachallisqa uj esquinapi sayasharqa. Waynata rikuytawantaj qayllaykuspa muchʼaykorqa, qhariwarmi jina puñuykuyta munananpajtaj parlapayarqa. Chay waynaqa mana chay warmiwan khuchichakunanpi yuyaspachu wasinmanta llojserqa. Chaywanpis sajra munayninwan atipachikusqanrayku khuchichakorqa, chayraykutaj mayta ñakʼarerqa. Niraj juchaman urmashaspa imaspichus rikukunanpi tʼukurinman karqa chayqa, chay warmiwan mana khuchichakunmanchu karqa (Pro. 7:6-27).

⁹ Noqanchejpis ñaupajta imaspichus rikukunanchejpi mana tʼukurisunchu chayqa, sajra imasta ruwayman urmasunman. Sutʼincharinapaj, mana allinchu kanman  teleta chʼisisnin qhawashaspa tukuy canalesta qhawananchej. Imaraykuchus ajinata ruwaspaqa ichapis khuchichakuymanta imasta qhawasunman. Internetpi kashaspapis mana allinchu kanman yaykunanchej mana rejsisqanchej paginasman, millay khuchichakuykunamanta fotos rikhurin chay paginasman ima. Imaraykuchus chaykunata rikuspaqa, ichapis mana munashaspalla sajra imaspi yuyayta qallarisunman, Diospa kamachisqantataj pʼakisunman.

10. ¿Imaraykutaj mana allinchu coqueteay? (13 paginapi dibujota qhawariy.)

¹⁰ Bibliaqa llimphu sonqowan tukuyta qhawananchejta yuyaychawanchej (1 Timoteo 5:2 leey). Uj casarasqa hermanoqa, munakuyninta warmillanman rikuchinan tiyan. Uj soltero hermanopis piwanchus casarakonqa chayllaman munakuyninta rikuchinan tiyan. Wakin runasqa, yuyanku mana llankhanakuspa, coqueteanakuy mana juchachu kasqanta. Chaywanpis uj qhariwan uj warmiwan coqueteanakuspaqa, aychaj sajra munayninta rijchʼarichiyta qallarinkuman, jinamantataj khuchichakuy juchapi urmankuman. Ajinapi ashkha runas rikukorqanku, noqanchejpis ichá ajinapi rikukullasunmantaj.

11. ¿Imatataj Josemanta yachakunchej?

¹¹ Josemanta mayta yachakusunman. Patronninpa warmenqa payta munapayaspa nerqa: “Jamuy, noqawan puñuykunki”, nispa. Josetajrí mana munarqachu. Chayraykutaj chay warmeqa sapa pʼunchay Joseta parlapayaj paywan puñuykunanta yuyaspa (Gén. 39:7, 8, 10). Uj yachayniyoj runa nisqanman jina, chay warmeqa yuyarqa sapallanku qhepakojtinku, José paywan puñuykunanta. Chaywanpis Joseqa chay warmiwan mana ni imata munarqachu, nitaj uyarejllapis tukojchu. Chayraykutaj mana ima sajra imaspipis yuyarqachu. Uj pʼunchay chay warmeqa Joseta pʼachanmanta japʼiykorqa, “puñuna”, nispa. Josetajrí “chʼurkirakuspa, chay pʼachanta chay warmej makimpi saqerpariytawan, jawaman ayqerikaporqa” (Gén. 39:11, 12).

12. ¿Imaynatataj yachanchej imatachus qhawasqanchej, sajra imaspi yuyanapaj tanqanawanchejta?

¹² Jesús yuyaychasqanman jina, imatachus qhawasqanchej sonqonchejpi saphichakunman, chaytaj khuchichakuyman tanqawasunman. Pay nerqa: “Sichus pipis uj warmita qhawan munapayaspa chayqa, ñapis paywan sonqompi khuchichakunña”, nispa (Mat. 5:28). Ajinapi rey David rikukorqa, Biblia paymanta parlaspa nin: “Kamachinan wasi altos patapi puriyachashaspataj, rikuykorqa uj may kʼachita warmita mayllarikushajta”, nispa. Payqa chay warmita qhawallarqapuni, chantapis chay warmipi yuyallarqapuni (2 Sam. 11:2). Chay warmi qosayoj kajtinpis, paywan kayta munarqa, chayraykutaj chay warmiwan puñuykorqa.

13. ¿Imaraykutaj Job jina ruwananchej tiyan, imaynatataj chayta ruwasunman?

¹³ Millay yuyaykunata qhesachananchejpajqa, Job jina ruwananchej tiyan, pay nerqa: “Noqa sonqoypi nikorqani, ni sipas solterallatapis munapayanayta”, nispa (Job 31:1, 7-10). Job jina, ajllananchej tiyan mana pitapis khuchichakuy yuyaywan qhawananchejpaj. Internetpi, revistaspi chayri waj imaspi, millay khuchichakuymanta fotos rikhurejtenqa mana qhawanachu.

14. ¿Imatataj ruwananchej tiyan Diospa ñaupaqenpi llimphus kanapaj?

¹⁴ Kay yachaqanapi yachakusqanchejman jina, ichapis reparanchej imallapipis yuyayninchejta allinchananchej kasqanta. Jina kajtenqa, usqhayllata chayta ruwana. Jehovata kasukusunchej chayqa, mana  khuchichakuypi urmasunchu, ñaupaqenpipis llimphus kasunchej (Santiago 1:21-25 leey).

15. Sajra yuyayninchejta mana atipayta atispa, ¿imaraykutaj yanapata mañakunanchej tiyan?

¹⁵ Sajra yuyaykunata yuyayniykimanta mana orqhoyta atishankichu chayqa, ashkha watastaña Diosta yupaychaj hermanowan parlariwaj. Imaraykuchus payqa Bibliaj yuyaychasqanman jina yanapasonqa. Ichapis chʼampayniykimanta wajkunawan parlariyta mana atillankichu, chaywanpis yanapasunankupaj parlarinayki allin kanman (Pro. 18:1; Heb. 3:12, 13). Imaraykuchus paykunaqa, kausayniykipi imatachus allinchanayki kashan chayta allinchanaykipaj yanapasonqanku. Yanapasusqankuman jinataj ruway, Diospa amigollanpuni kanaykipaj.

16, 17. 1) Sajra munayninkuta atipanankupaj kallpachakojkunata, imaynatachus ancianos yanapasqankumanta, sutʼinchariy. 2) ¿Imaraykutaj may allin khuchichakuymanta millay imasta qhawajkuna usqhayllata yanapata maskʼananku?

¹⁶ Ancianosqa mayta yanapawasunman (Santiago 5:13-15 leey). Brasilpi tiyakoj uj waynamanta parlarina. Payqa ashkha watasta sajra yuyayninta atipananpaj kallpachakushasqanta nin. Pay nin: “Yacharqani sajra imaspi yuyasqay Jehová Diosta mana kusichisqanta, chaywanpis pʼenqakorqani wajkunaman willariyta”, nispa. Uj anciano repararqa chay wayna yanapata necesitasqanta, chayraykutaj ancianoswan parlarinanta yuyaycharqa. Chay wayna nin: “Ancianosqa may kʼachas noqawan karqanku, entiendewarqankutaj. Chaytaj mayta tʼukuchiwarqa, imaraykuchus yuyarqani, noqawan mana kʼachas kanankupaj jinachu kasqayta. Paykunaqa sumajta uyariwarqanku, Jehová munakuwasqantataj Bibliapi rikuchiwarqanku, chantapis Diosmanta mañapuwarqanku. Tukuy chaytaj, Bibliaj nisqanman jina yanapawasqankuta japʼikunaypaj yanapawarqa”, nispa. Ashkha watasninmantaj, qotuchakuypi ñaupariytawan, chay wayna nin: “Kunanqa yachani yanapata maskʼana may allin kasqanta, sapallanchej sajra yuyaykunata atipanapaj kallpachakunamanta nisqaqa”, nispa.

¹⁷ Khuchichakuymanta millay imasta qhawayta yachanki chayqa, usqhayllata yanapata maskʼay. Imaraykuchus chayta mana ruwankichu chayqa, ichapis khuchichakuyman urmawaj. Chayman urmajtiykeqa, familiaresniyki, amigosniyki ima mayta llakikunkuman. Runaspis Diospa contranpi sajrata rimankuman. Ashkha hermanosqa, ancianospa yanapayninkuta maskʼarqanku, ancianos yuyaychasqankutataj japʼikorqanku. Ajinamanta chay hermanosqa Jehovaj qayllallanpipuni, qotuchakuyllapipuni ima kashanku (Sant. 1:15; Sal. 141:5; Heb. 12:5, 6).

18. ¿Imatataj ruwanallanchejpuni tiyan?

¹⁸ Satanaspa pachanpeqa astawan millay imas rikukushan. Chaywanpis noqanchejqa, sajra yuyaykunata atipananchejpaj, llimphus kanallanchejpajpuni ima, mayta kallpachakushanchej. Chayta ruwasqanchejmantataj Jehová may kusisqa kashan. Chayrayku Jehovawan allinpi kasqanchejwan, Bibliaj yuyaychaykunasninwan, wiñay tukusqa hermanospa yanapayninkuwan ima yanapachikunallapuni. Chayta ruwasunchej chayqa kusisqas kasunchej, sonqo yuyayninchejpis mana juchachawasunchu (Sal. 119:5, 6). Tumpamantawanqa Satanás chinkanqa, noqanchejtaj mosoj pachapi wiñaypaj kausakusunchej.