JAPONPI nacekoj hermano, Estados Unidospi qotuchakuykunata waturej, 6 septiembre 1926 watapitaj, misionero jina Japonman kutiporqa. Japonpitaj Torremanta Qhawaj revistata sapa killa japʼinanpaj qhelqachikojlla suyasharqa, chay runataj Kobepi libromanta yachaqanankupaj uj qotituta tantasqa. Bibliamanta Yachaqajkunaqa Kobepi 2 enero 1927 watapi ñaupaj kutirayku jatun tantakuyta ruwarqanku. Chaymantaj 36 runas rerqanku, 8 runastaj bautizakorqanku. Hermanosqa mayta llankʼasharqanku, ¿imaynatá paykuna, pisilla kaspapis Japón suyuntinpi 60 millones runasman willankuman karqarí?

Kay 1927 wata mayo killapi Bibliamanta Yachajkunaqa, runasta wajyarerqanku ashkha umallirichiykunaman. Ñaupaj kaj umalliricheyqa Osakapi ruwakorqa, chaypajtaj hermanosqa jatuchaj letrerosta ruwarqanku tukuyta wajyarinankupaj. May rejsisqa runasmantaj 3.000 invitacionesta apacherqanku, 150.000 jinatataj waj runasman saqerqanku. Chantá Osakapi may rejsisqa periodicospi, trenpi rinapaj 400.000 boletospa wasanpi ima, chay umallirichiypaj wajyarerqanku. Umallirichikunan karqa chay pʼunchaypitaj, 100.000 invitacionestawan iskay avionesmanta qhallaykamorqanku. Chantá Osaka Asahi sutiyoj cheqaqa, juntʼa kasharqa. Imaraykuchus “Diospa Reinon qayllaykamun”, nisqa umallirichiyta uyarej, 3.300 runas jina rerqanku. Chay cheqa juntʼaña kasqanraykutaj, 1.000 runas jina mana yaykorqankuchu. Chay umallirichiy tukukusqantawan, 600 runasmanta astawan qhepakorqanku, tapuykunasninkuman kutichiykunata tarinankupaj. Qhepan killaspitaj Kiotopi, Japonpa inti yaykuynin ladopi kaj llajtaspi umallirichikullarqataj.

Kay 1927 wata octubre killapi, hermanosqa Tokiopi umallirichiykunata wakicherqanku. Chaypajtaj invitacionesta apachillarqankutaj, ministroman, parlamentopi kajkunaman, religionta kamachejkunaman, militaresman ima. Chantá cartelesta ruwarqanku, periodicospi willacherqanku, 710.000 invitacionestawan saqerqanku. Tokiopi ruwakoj kinsantin tantakuykunamanqa 4.800 runas rerqanku.

Colportoresqa (precursoresqa), Reinomanta willaspa mayta llankʼarqanku. Japonpi ñaupaj kaj precursoraqa Matsue Ishii karqa. Qosan Jizowantaj casi Japón suyuntinpi willarqanku, Japonpa pata ladon Sapporomanta qallarerqanku, chantá Tokiopi, Yokohamapi, Nagoyapi, Osakapi, Kiotopi, Okayamapi, Tokushimapi ima willarqanku. Hermana Ishii, paya hermana Sakiko Tanaka ima, kimonosninkuta churaykukuspa oficialeswan parlaj rej kanku. Uj kuti, uj oficial El Arpa de Dios, Liberación nisqa librosta 300 mañasqa, carcelespi kaj bibliotecasman churananpaj.

 Katsuoman, Hagino Miuramanwanqa, hermana Ishii librosta saqerqa, paykunataj chay rato repararqanku cheqa kajta tarisqankuta. Paykunaqa 1931 watapi bautizakorqanku, colportorestaj karqanku. Haruichi, Tane Yamada, waj familiaresnin ima 1930 wata chaynejpi Reinomanta yachakorqanku. Aswan qhepamantaj colportores karqanku, hermananku Yukikotaj, Tokio Betelpi sirverqa.

Jaqay tiempopeqa autos valesqa karqa, nitaj sumaj ñankunapis karqachu. Chayrayku Kazumi Minoura, waj jóvenes colportores ima ruedasniyoj wasispi willaj rerqanku. Chay wasistaqa “Jehús” nej kanku, Israel llajtaj reynin Jehú jina apananku kasqanrayku (2 Rey. 10:15, 16). Kinsa jatuchaj Jehusqa saytʼunman 2,2 metrosniyoj karqa, anchonman, altonmanwantaj 1,9 metrosniyoj, sojtataj yaykoj kanku. Chantá 11 juchʼuy Jehusqa bicicletawan aysanapaj karqa, iskay runasllataj yaykoj kanku. Jehustaqa Japonmanta sucursal ruwacherqa. Chayta ruwaysikoj Kiichi Iwasaki nin: “Chay Jehusqa uj carpayoj, luz kananpajtaj uj auto bateriayoj ima karqa”, nispa. Colportoresqa ruedasniyoj wasinkuta lomasnejta, vallesnejta rispa, aysaj kanku, wakin cheqastataj tanqaj kanku. Ajinata sumaj willaykunata Japonpi willarqanku, pata ladonpi kaj Hokkaido llajtamanta, ura ladonpi kaj Kyushu llajtakama.

Ikumatsu Ota nin: “Uj llajtitaman chayaspa ruedasniyoj wasiykuta mayu kantupi chayri maypichus campo kaj chaypi sayachej kayku. Ñaupajtaqa alcaldewan parlaj rej kayku. Chantá wasimanta wasi willaspa publicacionesta saqej kayku. Chay llajtapi willaytawantaj, waj llajtamanñataj rej kayku”, nispa.

Kobepeqa 36 Bibliamanta Yachaqajkunalla karqanku. Ñaupaj kaj jatun tantakuyninkuta ruwashaspataj, “mana kasuna imas[...]” jina kasharqanku (Zac. 4:10). Phishqa watanmantaj, 1932 watapi, 103 colportores, waj willajkuna ima, 14.000 librosta saqesqankuta willarqanku. Kunanqa Jehovaj testigosnin Japonpi 220.000 jinaña kanku, sonqo kʼajaywantaj willashanku (Japonpi waqaychakusqanmanta).