1. ¿Pikunataj paykuna kikinku chʼaukiyakorqanku, imaraykutaj? (Patapi kaj dibujota qhawariy.)

DIOSWAN tinkukuna toldopi ashkha runas kasharqanku, Diosman inciensota qʼoshñichinankupaj. Uj ladonpi kuraj kaj sacerdote Aarón kasharqa, uj ladonpitaj Coré, 250 runasnin ima (Núm. 16:16-18). Tukuypis Diosta cheqa sonqo yupaychajkunaman rijchʼakorqanku. Coré, paywan kajkuna ima jatunchakoj, mana kasukoj, munaynillankuta maskʼajkuna karqanku, Aaronpa cuentanmantataj sacerdotes kayta munasharqanku (Núm. 16:1-11). Chay runasqa Dios yupaychayninkuta allinpaj qhawananta yuyaspa, paykuna kikin chʼaukiyakorqanku. ‘Sonqosta watoj’ Diostataj pisipaj qhawarqanku. Jehovaqa yacharqa chay runas puraj uyas kasqankuta, jatunchakuyllata maskʼasqankuta ima (Jer. 17:10).

2. ¿Imatá Moisés nerqa, chantá imaynatá chay juntʼakorqa?

² Moisés israelitasman nerqa: “Qʼaya tutamanta Tata Diosqa willawasun pischus paypata kasqankuta”, nispa (Núm. 16:5). Nisqanman jinataj sutʼi rikukorqa pichus Diosta yupaychasqanta, pitajchus mana. Imaraykuchus “Diosqa ninata apachimorqa; pikunachus Dioswan Tinkukuna Toldopi inciensota jaywasharqanku, chaykunata iskay pachaj phishqa chunkayoj runasta ruphaykuspa, wañurparicherqa” (Núm. 16:35; 26:10). Aarontatajrí mana wañucherqachu, chaytaj rikucherqa pay cheqa  sacerdote kasqanta, tukuy sonqo Diosta yupaychashasqanta ima (1 Corintios 8:3 leey).

3. 1) Apóstol Pabloj tiemponpi, ¿ima chʼampaytaj qotuchakuypi rikhurerqa? 2) ¿Imatá Jehová ruwarqa Corewan, paywan kajkunawan ima?

³ Waranqa phishqa pachaj watasninman jinataj, apóstol Pabloj tiemponpi Moisespa tiemponpi jina uj chʼampay qotuchakuypi rikhurillarqataj. Pablo sutʼincharqa qotuchakuymanta wakin llulla yachachiykunata yachachiyta qallarisqankuta. Paykunataj qotuchakuyllapipuni kasharqanku, Jehovata tukuy sonqo yupaychajkunamantaj rijchʼakorqanku. Chaywanpis paykunaqa ovejas jina pʼachallisqas karqanku, ukhunkupitajrí suwa atojkuna jina karqanku wajkunaj creeyninkutataj pantachisharqanku (2 Tim. 2:16-18). ¿Jehová chayta qhawasharqachu? Arí. Pabloqa sumajta yacharqa Jehová Coreta, paywan kajkunata ima chinkarparichisqanta. Chantapis yachallarqataj tiemponmanta cristianos llulla yachachiyta juntʼachishasqankuta Jehová rikushasqanta. Noqanchejpis Jehová tukuy imata rikushasqanpi atienekunanchej tiyan. Kunantaj qhawarinachej imatachus Pablo, Timoteoman qhelqasqanta, imatachus chaymanta yachakunanchejta ima.

4. ¿Imatataj Pablo yacharqa, imaynatá chayta rikucherqa?

⁴ Jehovaqa pikunachus payta tukuy sonqowan yupaychajkunata rejsin. Pablotaj chayta sumajta yachasqanta Timoteoman qhelqasqanpi rikucherqa. Pabloqa, qotuchakuymanta wakinkuna llulla yachachiykunata yachachispa wajkunata creeyninkupi pantachishasqankumanta parlaytawan nerqa: ‘Señorqa rejsin paypata kajkunata. Pichus Señorpa sutinta oqharispa Diosnimpaj rejsikapojqa juchamanta tʼaqakuchun’, nispa (2 Tim. 2:18, 19).

5, 6. ¿Imamanta parlananpajtaj Pablo ‘Diospa cimiento churasqan’ rimayta oqharerqa, chantá imaynatá Timoteota chay yanaparqa?

⁵ Bibliaqa “cimiento” rimayta oqharin ashkha imasmanta parlananpaj. Israel llajtaj capitalnin Jerusalenmanta, Jesús imaynatachus Diospa munayninta juntʼasqanmanta ima, parlanapajpis chay rimayllatataj oqharikun (Sal. 87:1, 2; 1 Cor. 3:11; 1 Ped. 2:6). ‘Diospa cimiento churasqan’ rimayqa uj kutillata Bibliapi rikhurin. ¿Imamanta parlananpajtaj Pablo chay rimayta oqharerqa?

⁶ Pabloqa imatachus Moisés, Números 16:5 versiculopi Coremanta, paywan kajkunamantawan nisqanmanta parlaytawan, ‘Diospa churasqan cimientomanta’ parlarqa. Ajinamanta Timoteota yuyaricherqa qotuchakuypi imaschus kashasqanta Jehová rikushasqanta. Diosqa mana saqenmanchu karqa cheqa yachayta qʼewejkuna munaynillankuta ruwanankuta. Arí, Jehovaj munaynenqa mana tijrakorqachu Corej ruwasqanrayku, nillataj tijrakorqachu Pabloj tiemponpi cheqa yachayta qʼewejkunaj ruwasqankuraykupis. Pabloqa mana sutʼincharqachu imatapunichus niyta munasqanta ‘Diospa cimiento churasqan’ rimaywan. Pabloj nisqanqa Timoteota creeypi sinchʼita sayananpaj, Jehovapi atienekunanpaj ima yanaparqa.

7. ¿Imaraykú nisunman Jehová cheqan kajtapuni ruwananta?

⁷ Jehovaj yuyaychaykunasnenqa wiñaypaj. Salmo 33:11 versiculopi nin: “Tata Diospa ruway munasqantajrí wiñaypaj sayan, sonqompa yuyasqampis wiñay wiñaypaj”, nispa. Bibliaj waj versiculosnintaj Jehovaj kamachiynin, khuyakuynin, cheqan kaynin ima wiñaypaj kasqanta nin, chantapis nillantaj: “Paypeqa manamin qonqapoyqa kanchu wiñaypaj”, nispa (Éxo. 15:18; Sal. 106:1; 112:9; 117:2). Malaquías 3:6 nin: “Noqa Tata Diosqa kasqay  jinallapuni kani”, nispa. Chantá Santiago 1:17 versiculotaj nin: “Payqa mana uj jinayanchu, nitaj maychus kasqanmanta waj jinaman tukunchu”, nispa.

8, 9. ¿Imatá yachakusunman ‘Diospa churasqan cimientopi’ imachus qhelqasqa kasqanmanta?

⁸ Pablo 2 Timoteo 2:19 versiculopi ‘Diospa cimiento churasqan’ uj qhelqasqawan sellasqa kasqanta nin. Chaytaj mana tʼukunapajchu, imaraykuchus unay tiempopeqa uj wasita ruwaspa cimientonman sellaykoj kanku chay wasita ruwajpa sutinta, chayri chay wasej dueñonpa sutinta. Pablotaj ñaupaj kutirayku chay kikinchayta oqharerqa. * ‘Diospa cimiento churasqanpi’ kay rimaykuna qhelqasqa kashan: 1) Jehová “rejsin paypata kajkunata”, 2) Jehovaj “sutinta oqharispa Diosnimpaj rejsikapojqa juchamanta tʼaqaku[nan tiyan]”. Kaytaj yuyarichiwanchej imatachus Números 16:5 (leey) versiculopi leesqanchejta.

⁹ ‘Diospa churasqan cimientopi’ qhelqasqa kasqanmanta, ¿imatá yachakunchej? Jehovaj yuyaychaykunasnin iskay cheqa yachachiykunapi sayasqa kasqanta. Chaykunataj kaykuna kanku: 1) Jehovaqa payman cheqa sonqo kajkunata munakun, 2) Jehovaqa sajra ruwaykunata chejnikun. ¿Imaraykutaj qotuchakuypi Diosmanta llullata yachachejkunamanta parlashaspa kaykunamanta parlashanchej?

10. Pabloj tiemponpi llulla yachachejkunaj ruwasqankuta rikuspa, ¿imaynataj cheqa cristianos kasharqanku?

¹⁰ Ichapis Timoteo, waj cheqa sonqo cristianos imaqa llakikorqanku llulla yachachejkunaj ruwasqasninkuta rikuspa. Wajkunataj ichá mana entienderqankuchu imaraykuchus chay llulla cristianosta qotuchakuymanta mana qharqosqankuta. Paykunaqa cheqa sonqosllapuni kasqankuta, wajkunaj sajra ruwasqasninkuta ima Jehová qhawashasqantachus manachus tapukorqankuchá (Hech. 20:29, 30).

11, 12. ¿Imaraykú Pabloj cartan Timoteoj creeyninta kallpacharqa?

¹¹ Pabloj cartanqa Timoteoj creeyninta mayta kallpacharqa. Imaraykuchus yuyaricherqa Jehová puraj uya Coreta, paywan kajkunata ima chinkachisqanta, cheqa sonqo Aarontataj mana. Arí, Pabloqa nisharqa qotuchakuypi llulla cristianos kajtinkupis, Jehovaqa paypata kajkunata Moisespa tiemponpi jina rejsikapunanta.

 ¹² Jehovaqa kasqan jinallapuni, atienekunapaj jinataj. Payqa sajra ruwaykunata chejnikun, juchasninkumanta mana pesachikojkunamantataj cuentata mañan. Pabloqa Timoteota yuyaricherqa Diospa ‘sutinta oqharisqanrayku’ llulla cristianosmanta jarkʼakunanpaj kallpachakunanta. *

13. ¿Imapitaj atienekusunman?

¹³ Pablo, Timoteoman nisqanqa mayta kallpachawanchej, imaraykuchus Jehovaqa yachan payman cheqa sonqo kasqanchejta. Paytaj mana cheqa sonqo kasqallanchejtachu qhawan, manaqa sapa ujninchejmanta llakikun. Biblia nin: “Tata Diosqa sumajta qhawamushan tukuy kay pachata, kallpachanampaj tukuy sonqowan payllapi atienekunku, chaykunata”, nispa (2 Cró. 16:9). Chantapis Jehová, payta tukuy sonqo yupaychananchejpaj kallpachakusqanchejta ni jaykʼaj qonqananpi atienekuyta atinchej (1 Cor. 15:58; 1 Tim. 1:5).

14. ¿Imayna yupaychaytataj Jehová qhesachan?

¹⁴ Jehovaqa qhesachan mana tukuy sonqowanchu payta yupaychajkunata. Ñawisnintaj kay pachata qhawamushan, rikuntaj pikunachus mana “tukuy sonqowa[nchu]” Payta yupaychashasqankuta. Chantapis Proverbios 3:32 rikuchin Jehová “sajra ruwajkunata chejniku[sqanta]” nisunman kasukoj runaman rijchʼakojta, pakaypitaj juchata ruwajta. Pillapis juchanta runasmanta pakayta atejtinpis, Jehovamantaqa mana pakayta atinchu. Biblia nin: “Juchanta pakaykojtaqa mana allinchu renqa”, nispa. Kayqa ajinapuni imaraykuchus Jehovaqa may atiyniyoj, cheqan kajman jinataj ruwan (Pro. 28:13; 1 Timoteo 5:24; Hebreos 4:13 leey).

15. ¿Imapí mana yuyanachu tiyan, imaraykutaj?

¹⁵ Diospa ashkha cheqa sonqo kamachisnenqa tukuy sonqo Jehovata yupaychanku. Chaywanpis Moisespa tiemponpi jina, ñaupa cristianospa tiemponpi jina, kay tiempopipis Diosta mana tukuy sonqochu yupaychajkuna qotuchakuypi rikhurinman (2 Tim. 3:1, 5). Chayta yachasqanchejrayku, mana allinchu kanman hermanosninchej mana tukuy sonqochu Diosta yupaychashasqankuta yuyananchej. Imaraykuchus ajinata yuyaspaqa pantashasunman (Romanos 14:10-12; 1 Corintios 13:7 leey). Chantapis chayta yuyayqa, Diosta yupaychayninchejpi mana yanapawasunmanchu.

16. 1) ¿Imatá ruwasunman sajra kaj mana sonqonchejpi saphichakunanpaj? 2) ¿Imatá yachakunchej “Qankuna kikiykichej qhawarikuychej” nisqa recuadromanta?

¹⁶ Sapa uj cristiano imatachus “ruwasqanta” allinta qhawarikunan tiyan (Gál. 6:4, 5). Juchasapa kasqanchejrayku, ichá mana tukuy sonqochu Diosta yupaychashasunman (Heb. 3:12, 13). Chayrayku allin kanman imaraykuchus Diosta yupaychashasqanchejpi sapa kuti tʼukurinanchej. Tapurikusunmantaj: “¿Jehovata munakusqayraykuchu yupaychashani? ¿Paylla Kamachejniy kananta munasqayraykuchu yupaychashani? Chayrí, ¿paraisopi kausakuyta munaspallachu yupaychashani?”, nispa (Apo. 4:11). Kay tapuykunapi tʼukureyqa, yanapawasunchej sonqonchejpi ima sajrallatapis tarispa usqhayllata orqhonapaj, tukuy sonqo Jehovata yupaychanapaj ima.

17, 18. ¿Imaraykutaj Jehovata tukuy sonqo yupaychananchej tiyan?

¹⁷ Diosta tukuy sonqo yupaychaspaqa ashkha bendicionesta japʼisun. Salmo 32:2 versículo nin: “Kusikuyniyojmin runaqa, juchanmanta Tata Dios mana juchachajtin,  pipichus mana llullakuy kanchu, chayqa”, nispa. Arí, llimphu sonqoyoj kanankupaj kallpachakojkunaqa may kusisqa kausakunku, aswan qhepamanpis kusisqallapuni kausakonqanku.

¹⁸ Jehovaqa tumpamantawan sutʼiman orqhonqa sajrata ruwajkunata chayri pakayllapi juchata ruwajkunata. Rikuchenqataj “pichus cheqan runa, pitajchus mana cheqan runa kasqanta; [...] pichus Diosta yupaychasqanta, pitajchus mana” (Mal. 3:18). Chaykamataj Jehová “cheqan kawsayniyoj runasta qhawasha[sqanta], ninrisnimpis paykunaj mañakusqankuta uyarisha[sqanta ima]” yachayqa, ¡mayta kallpachawanchej! (1 Ped. 3:12.)