Noqaqa 1956 watapi ñañu wasaymanta onqosqa nacekorqani. Ankusniy mana allin kasqanraykutaj, waj onqoykuna rikhuriwan, nitaj puriytapis atillanichu.

Niraj nacekushajteyqa tatasniy, Jehovaj testigosninmanta uj qhariwarmi misioneroswan Bibliamanta yachakuyta qallarisqanku. Imillitallaraj kashajtiytaj, Usakos (Namibia) llajtitaypi pisi willajkunalla karqa. Chayrayku, tantakuykunapaj wakichikusqantaqa familiapi jinalla ukhunchaj kayku. Qanchis watitayoj kashajtiytaj, mana jispʼayta atisqayrayku operachikorqani. Chantá 14 watayoj kashajtiy tʼuku onqoyniyoj rikhurerqani. Chantapis mana colegiotaqa tukucharqanichu, imajtinchus mana sapallay puriyta aterqanichu, colegiotaj karupi karqa.

Ajinapi tarikuspapis, Jehovawan astawan masichakunaypaj kallpachakorqani. Chaywanpis wakin publicacioneslla afrikáans qalluypi karqa. Chayrayku, ashkha librosta leenaypaj inglés qalluta yachakorqani. Aswan qhepamantaj willayman llojsiyta qallarerqani, 19 watayoj kashajtiytaj bautizakorqani. Qhepan tawa wataspeqa tukuy imamanta onqoykorqani, mana allin yuyaykunataj jamuwaj. Chantapis, llajtitaypi tukuy rejsinakusqankurayku mana sonqo kʼajaywan willayta aterqanichu, imaraykuchus runata manchachikoj kani.

Chantá 20 watayoj jina kashajtiy, Sudafricaman riporqayku, chaypitaj chay kutillaraj uj qotuchakuyman rerqani. Chaytaj noqapajqa, ¡kusiy karqa! Chaywanpis ujtawan operachikorqani, chay kutipeqa rakhu chʼunchulaymantañataj.

Aswan qhepamanqa qotuchakuykunata waturej hermanota, precursor kaymanta umallirichisqanta uyarerqani. Nisqanqa sonqoyman chayarqa. Mana sanochu kaspapis, Jehová chay pasaj wataspi llasa apayniyta apaysiwasqanta sutʼita rikorqani. Chayrayku, precursora regular kanaypaj solicitudta juntʼacherqani. Ancianostajrí, onqosqa kasqayrayku jarkʼawarqanku.

Jinapis, astawan willanaypaj mayta kallpachakorqani. Mamaypa yanapayninwan, waj hermanospa yanapayninkuwan imataj, precursora jina sojta killata willarqani. Jinamanta, precursora kayta munasqayta rikucherqani, onqoyniytaj mana jarkʼawasqanta. Chayrayku precursora kanaypaj solicitudta ujtawan juntʼachejtiy, ancianosqa niña jarkʼawarqankuchu. Chayrayku, septiembre 1988 watamantapacha precursora regular kani.

Precursora kasqayrayku, Jehová ashkhata yanapawasqanta rikuni. Noqallapi llakikunaymantaqa wajkunaman Bibliamanta yachachini. Chaytaj mayta yanapawan, Jehovamanpis astawan qayllaykuchiwan. Mayta kusikuni ashkha runasta Jehovaman qokuspa bautizakunankupaj yanapasqaymanta.

Wakin kutilla sano kajtiypis, Jehová “sapa pʼunchay llasa” apayniyta apaysiwan (Sal. 68:19). Jehová yanapawan kausayniy allin kananpaj, kausayniytapis jatunpaj qhawanaypaj.