Qhepapi saqesqanchej imasta ama qhawanachu

“Pillapis llankʼay patapi aradoj manceranta japʼispaña qhepata qhawajqa mana Diospa reinompaj jinachu.” (LUC. 9:62.)

¿IMAYNATÁ KUTICHIWAJ?

¿Imaraykutaj Lotpa warminmanta yuyarikunanchej tiyan?

Ñaupa tiempomanta, ¿ima kinsa imastataj qonqananchej tiyan?

¿Imaynatataj Jehovaj llajtanwan khuska ñaupajman risunman?

1. ¿Imatataj Jesús yuyaycharqa, ima tapuytaj chaymanta rikhurin?

“LOTPA warminmanta yuyarikuychej.” (Luc 17:32.) Kay yuyaychaytaqa Jesucristo casi iskay waranqa watas ñaupajta nerqa, chaytaj kay tiempopi ni jaykʼaj jina mayta yanapawasunman. ¿Imatá niyta munasharqa? Judiosqa chayta sumajta entienderqanku. Imajtinchus paykunaqa imachus Lotpa warminwan kasqanta yachallarqanku. Chay warmeqa, familianwan Sodomamanta ayqeshaspa, qhepata mana qhawananku kamachiyta mana kasukorqachu, chayrayku kachiman tukorqa (Génesis 19:17, 26 leey).

2. ¿Imaraykutaj Lotpa warmin qhepata qhawarerqa, imataj chayrayku paywan karqa?

² ¿Imaraykutaj Lotpa warmin qhepata qhawarerqa? Ichapis imachus kashasqanta yachayta munasqanrayku, creeynin pisi kasqanrayku chayri chay llajtapi saqesqan imasmanta llakikusqanrayku (Luc. 17:31). Imaynapunichus kajtinpis, payqa mana kasukusqanrayku wañorqa. Arí, Sodomamanta, Gomorramanta sajra runas wañusqanku pʼunchayllapitaj wañorqa. Chayraykuchá Jesús nerqa: “Lotpa warminmanta yuyarikuychej”, nispa.

3. ¿Imaynatá Jesús, qhepata qhawariy mana allinchu kasqanta sutʼincharqa?

³ Kunan tiempo cristianospis, mana qhepata qhawananchejchu tiyan. Uj runa, niraj Jesuspa discipulonman tukunanta nishaspa, wasinpi kacharpayata ruwaytaraj munarqa. Jesustaj nerqa: “Pillapis llankʼay patapi aradoj manceranta japʼispaña qhepata qhawajqa mana Diospa reinompaj jinachu”, nispa (Luc. 9:62). ¿Mana khuyarikuspachu Jesús chayta nisharqa? Mana. Payqa, chay runa ruwanasninta mana juntʼananrayku achakisllata nishasqanta yacharqa. Chayrayku “qhepata qhawa[rej]” llankʼaj runawan kikincharqa. Llankʼaj runaqa  tumpallata qhawarejtin chayri aradonta kacharpaspa wasaman kutirejtin, mana allintachu llankʼashanman, chaytaj mana allinchu kanman.

4. ¿Imapí astawan yuyananchej tiyan?

⁴ Ñaupa tiempopi ruwasqanchejpi yuyanamantaqa, ñaupaqenchejpi kaj imaspi yuyananchej tiyan. Biblia sutʼita nin: “Ñawiykeqa cheqanta qhawachun; imachus ñawpaqeykipi kajta sumajta qhawakuy”, nispa (Pro. 4:25).

5. ¿Imaraykutaj qhepapi saqesqanchej imasta mana qhawananchejchu tiyan?

⁵ ¿Imaraykutaj qhepapi saqesqanchejta mana qhawananchejchu tiyan? Qhepa “manchay sajra pʼunchaykuna[pi]” kausashasqanchejrayku (2 Tim. 3:1). Mana iskay llajtaspa tukukuynillanchu qayllaykamushan, manaqa sajra pachantinpata. ¿Imatá ruwasunman Lotpa warmin jina mana pantanapaj? Ñaupajtaqa, imaschus ñaupaj kausayninchejmanta qhepata qhawarinapaj tanqawasqanchejta reparana (2 Cor. 2:10, 11). Chayrayku imaschus chaykuna kasqanta, chaykunapi mana anchata yuyanapaj imatachus ruwanata ima qhawarina.

ÑAUPA TIEMPOS

6. ¿Imaraykutaj yuyayninchej chʼaukiyawasunman?

⁶ Ñaupa tiemposta yuyarikuy, uj tojlla jina kanman. Chay tiempopi imaynachus kausayninchej kasqanpi tʼukureyqa, yuyayninchejta chʼaukiyanman. Imajtinchus allin imasllata yuyarikusunman, chʼampaykuna kasqanmantataj qonqapusunman. Ñaupa tiemposta, jinata qhawarispaqa llakiy llakiy chayawasunman. Chaywanpis Biblia nin: “Ama imamantapis tapukuychu: Imajtintaj ñawpa tiemposqa kay tiemposmanta nisqaqa aswan allin karqa? nispa. Chay jina tapukoyqa mana yachayniyojpatachu” (Ecl. 7:10). ¿Imaraykú ñaupa tiemposta yuyariy mana allinchu?

7-9. a) ¿Imataj israelitaswan Egipto llajtapi karqa? b) ¿Imasraykutaj kusisqas kayta atinkuman karqa? c) ¿Imasmantataj israelitas quejakorqanku?

⁷ Imachus Moisespa tiemponpi israelitaswan kasqanta yuyarikuna. Qallariypi egipciosqa, wajyarisqasta jina sumajta qhawarqanku, chaywanpis José wañupusqantawan, “jilaqatasta churarqanku, israelitasta jasutʼispalla mayta trabajachinankupaj” (Éxo. 1:11). Chantá faraonqa, Diospa llajtan mana wiñananta munasqanrayku, israelitaspa tukuy qhari wawitasninkuta wañurachinankuta kamacherqa (Éxo. 1:15, 16, 22). May llakiypi kasqankurayku Jehová, Moisesman nerqa: “Cheqamanta noqa rikuni imaynatachus israelita wawasniy Egiptopi ñakʼarishasqankuta. Uyarini mayta qhaparikusqankuta jilaqatas jasutʼisqankurayku; allinta yachani ñakʼarisqankuta”, nispa (Éxo. 3:7).

⁸ Israelitas, wata runas kasqankumanta kacharichisqa kaspa, maytachá kusikorqanku. Imaynapichus rikukusqankupi tʼukurina. Ñaupajtaqa, Jehová atiyninta may tʼukunapaj jina apaykacharqa, chunka ñakʼariykunatataj faraonman, llajtanman ima apachimorqa (Éxodo 6:1, 6, 7 leey). Chantá egipciosqa mana ripunallankutachu saqerqanku, manaqa mayta mañakorqanku, ashkha qorita, qolqeta imataj qorqanku. Bibliaqa, israelitas “egipciospa kapuyninkuta atisqankuta apakap[usqankuta]” nin (Éxo. 12:33-36). Chaymantataj faraonta, soldadosninta  ima Puka Qochapi wañojta rikorqanku (Éxo. 14: 30, 31). Chay imasta rikusqanku, maytachá creeyninkuta kallpacharqa.

⁹ Chayrayku, israelitas kacharichisqa kasqankumanta pisi tiemponman quejakusqanku, tʼukunapaj jina kasqanta nisunman. Paykunaqa mikhunamanta rimayta qallarerqanku. Imatachus Jehová qosqanwan mana contentakuspa nerqanku: “Noqaykoqa yuyarikuyku, Egiptopi qhasilla mikhoj kayku challwasta. Chantá mikhullajtaj kayku pepinosta, melonesta, puerrosta, cebollasta, ajosta ima. Kunanrí yarqhaywan wañushaykuña, ni imapis kaypeqa kanchu; Maná nisqa tʼantalla tiyan”, nispa (Núm. 11:5, 6). Manapis yuyarikunkumanchu jina, wata runas karqanku chayman kutiyta munarqanku (Núm. 14:2-4). Imastachus qhepapi saqesqankuta qhawasqankuraykutaj, Jehová paykunata qhesacharqa (Núm. 11:10).

10. ¿Imatá israelitaswan imachus kasqanmanta yachakunchej?

¹⁰ ¿Imatataj kaymanta noqanchej yachakunchej? Chʼampaykunapi rikukuspaqa, ñaupa tiempopi kapuwasqanchej allin imaspi mana anchata yuyanachu. Ichapis chaykunaqa niraj cheqa kajta rejsishajtinchej karqa. Ñaupa ruwasqanchejmanta yuyarikuspa yachakuy, allin imasta ruwasqanchejmanta yuyarikuypis allillan. Chaywanpis maychus kajllata chaykunamanta yuyananchej tiyan. Mana jinata ruwajtinchejqa, imaynatachus kausakushasqanchejwan mana contentakusunchu, ñaupa kausayninchejmantaj kutiriyta munasun (2 Pedro 2:20-22 leey).

IMASTACHUS SAQESQANCHEJ

11. ¿Imaynatá wakin cristianos imastachus saqesqankuta qhawanku?

¹¹ Llakikunapaj jina wakin cristianosqa, ashkha imasta saqepuspa tiemponkuta usuchisqankuta yuyanku. Ichapis astawan yachakunankuta, sumaj llankʼayniyoj kayta chayri ashkha qolqeyoj kayta qhesacharqanku. Wakin hermanostaj sumaj negociosniyoj, may rejsisqa takejkuna, universidadpi yachachejkuna, may rejsisqa pujllajkuna, correjkuna ima karqanku. Chay tukuy imastataj qhepapi saqeporqanku. Chaywanpis tiempo pasasqanta qhawaspa, tukukuy pʼunchaypis niraj chayamusqanrayku, ichapis tapukunkuman: “Mana chaykunata saqejtiy, ¿maykamataj chayayman karqarí?”, nispa. Mana jinata yuyanankupajqa Jesuspa yuyaychasqanta kasukunanku allin kanman.

12. ¿Imaynatataj Pablo tukuy ima saqesqanta qhawarqa?

¹² Apóstol Pabloqa cristianoman tukuspa, may chhika ruwaykunata qhepapi saqerqa (Fili. 3:4-6). ¿Maykʼajllapis chaymanta pesachikorqachu? Pay kutichin: “Chaypacha imatachus sumaj valorniyojpaj qhawarqani, kunanqa chay tukuy imasta manakajpaj qhawani Cristorayku. Cheqamanta tukuy imata qhasi manakajpaj qhawani Señorniy Jesucristota rejsinaqa may sumaj kasqanrayku. Chayrayku chay tukuy ñaupa imasta saqepuni, qʼopata jina qhawaspa, * Cristojta kanaypaj”, nispa (Fili. 3:7, 8).  Qʼopata wijchʼusqanchejmanta mana pesachikunchejchu, ¿icharí? Ajinallatataj Pabloqa, kay pachapi imastachus saqesqanmanta mana pesachikorqachu. Paypajqa chay tukuy imas, niña valorniyojchu karqa.

13, 14. ¿Imaynatá apóstol Pablo jina ruwasunman?

¹³ ¿Imatá ruwasunman ñaupajta qhesachasqanchej imaspi yuyayta qallarejtinchej? Pablo jina ruwananchej allin kanman. ¿Imaynamantá? Kunan kapuwasqanchejta valorniyojpaj qhawaspa. Arí, Jehovaman qayllaykusqanchej, cheqa sonqo kasqanchej imaqa may valorniyoj (Heb. 6:10). Chantapis, Jehová kunan qowasqanchej, qhepamantaj qonawanchejqa, kay pachamanta ni imawan kikinchakunchu (Marcos 10:28-30 leey).

¹⁴ ¿Imaynamantá cheqa sonqosllapuni kaspa ñaupajman risunman? Pablo qhepan versiculospi, imaynatachus chayta ruwasqanmanta, jinata nerqa: “Imachus kawsayniypi ñawpajta karqa, chayta qonqayman churaspa, atisqayta kallpakuni ñawpajpi kajta taripanaypaj” (Fili. 3:13). Pabloqa iskay sumaj imasta ruwananchejta nerqa. Ñaupajtaqa, qhepapi saqesqanchej imasta qonqapunata, tiemponchejta, kallpanchejta ima chaypi yuyaspa usuchinamantaqa. Chantataj correjkuna jina, ñaupaqenchejpi kajta “taripanapaj” kallpachakunata nerqa, chayananchejta pasashasunmanñapis jina.

15. ¿Imaynatataj Jehovaj cheqa sonqo kamachisninpa ruwasqankupi tʼukuriy yanapawanchej?

¹⁵ Ñaupa tiempomanta chayri kunan tiempomanta Diospa waj cheqa sonqo kamachisninpi tʼukurina. Ruwasqankoqa, imatachus qhepapi saqesqanchejta mana qhawarispa, ñaupajllamanpuni rinapaj yanapawanchej. Abrahammanta, Saramanta ima yuyarikuna. “Llojsimusqanku [Ur] llajtamanta yuyarikushankuman karqa chayqa, kutiripuyta atinkuman karqa” (Heb. 11:13-15). Chaywanpis mana jinatachu ruwarqanku. Moisesmantañataj yuyarikuna. Ñaupaj kutirayku Egiptomanta ripushaspaqa, ni mayqen israelita jina, ashkha imasta saqerqa. Chaywanpis Bibliaqa mana ninchu chaykunamanta mayta yuyarikusqanta. Astawanqa “yuyarqa Cristorayku qhesachasqa kayqa aswan valorniyoj kasqanta Egipto llajtaj qhapaj kayninmanta nisqaqa, imaraykuchus paypa yuyaynin kasharqa janaj pachamanta jamoj tʼinkapi” (Heb. 11:26).

ÑAUPAJPI LLAKICHIWASQANCHEJ IMAS

16. ¿Imaynatataj ñaupa imas llakichiwasunman?

¹⁶ Ñaupajta imastachus ruwasqanchejqa, mana tukuyninchu kusichinawanchejpaj jina. Ichapis juchallikusqanchejrayku chayri pantasqanchejrayku sonqonchej juchachashawanchejraj (Sal. 51:3). Chantapis, pi kʼamiwasqanchejrayku phiñasqallapuni kashasunman (Heb. 12:11). Chayri sajra imasta ruwawasqanchejta mana qonqayta atishasunmanchu (Sal. 55:2). Mayqellanpipis rikukuspa, ¿imataj chay ñaupa imaspi mana yuyanapaj yanapawasunman? Kinsa imasmanta parlarina.

17. a) ¿Imaraykutaj Pablo “Diospa tukuy ajllasqasninmanta aswan mana kasu ruwana” kasqanta yuyakorqa? b) ¿Imaynatá Pablo ñaupa ruwasqasninmanta yuyarikusqan, Diosta yupaychanallanpajpuni jarkʼananta mana saqerqachu?

¹⁷ Pantaykuna. Apóstol Pabloqa, “Diospa tukuy ajllasqasninmanta aswan mana kasu ruwana” kasqanta yuyakorqa (Efe. 3:8).  ¿Imaraykú? Payllataj nerqa: “Diospa [qotuchakuyninta] tukuchiyta munaspa qhatiykachasqayrayku”, nispa (1 Cor. 15:9). Ñaupajpi ñakʼarichisqan hermanoswan tinkukuspa, maytachá llakikoj. Chaywanpis mana chayraykuchu llakiywan atipachikorqa. Astawanpis Diospa qhasilla kʼacha yanapayninta rikuchisqanpi yuyayninta churarqa (1 Tim. 1:12-16). Agradecesqa kasqantataj, willayninta sonqo kʼajaywan juntʼaspa rikucherqa. Arí, payqa ñaupa juchasninta qonqananpaj kallpachakorqa. ¿Nichu noqanchejpis kikinta ruwasunman? Ñaupajpi pantasqasninchejtaqa niña allinchasunmanchu, chaypi yuyaspa tiempollanchejta usuchisunman. Chayrayku chaypi yuyanamantaqa Jehovaj khuyakuyninpi yuyana, payta yupaychanapajtaj tukuy kallpanchejta churana.

18. a) ¿Imataj kanman kʼamiwasqanchejmanta phiñasqallapuni kajtinchej? b) ¿Imaynamantá Salomón yuyaychasqanman jina ruwasunman?

¹⁸ Kʼamiykuna. ¿Ñaupajta sinchʼitachu kʼamichikorqanchej? Chaymanta yuyarikuspa phiñasqallapuni kayqa, mana nanachillawanchejchu, manaqa llauchhiyachiwasunman (Heb. 12:5, 6). Yuyaychawasqanchejta usqhayllata japʼikuspapis manaña chayman jinachu ruwajtinchejqa, qallariymantapachapis qhesachasunman jina kanman: yanapanawanchejta, cheqanchanawanchejta ima mana saqesunchu. Aswan allin Salomonpa yuyaychasqanta kasukuy, pay nerqa: “Yuyaychasqaymanta chʼipakuy, amataj qonqayman churaychu. Chay nisqasniyman jina ruway, imaraykuchus chaymin kawsayniykeqa” (Pro. 4:13). Imaynatachus uj chofer ñanpi maynintachus rinanpaj señalta kasukuspa, chayninta ñaupajllamanpuni rin, ajinallatataj kasukunanchej tiyan (Pro. 4:26, 27; Hebreos 12:12, 13 leey).

19. ¿Imaynatataj Habacuc jina, Jeremías jina ima creeyniyoj kasunman?

¹⁹ Sajra ruwaykuna. Ichapis sajra ruwaykunapi chayri yuyasqanchejman jina ajinapuni kasqanta yuyasqanchejpi tʼukurispa Habacuc jina sientekusunman. Payqa imaraykuchus Jehová wakin imas kananta saqesqanta mana entiendespa quejakorqa (Hab. 1:2, 3). ¿Imatá jinapi rikukuspa ruwasunman? Pay jina creeyniyoj kana, pichus nerqa: “Kusiywan juntʼa kasaj Salvawajniy Tata Diosrayku” (Hab. 3:17, 18). Chantapis profeta Jeremías jina “payllapi suyakusaj” ninanchej tiyan. Arí, cheqan kajta ruwaj Jehová, tiemponpi imatapis allinchananpi mayta atienekuna (Lam. 3:19-24).

20. ¿Imaynatataj Jesús “Lotpa warminmanta yuyarikuychej” nispa yuyaychasqanta kasukusunman?

²⁰ Ni jaykʼaj jina, kusikunapaj tiempopi kausashanchej. Mana qonqanapaj jina imas pasashan, aswanrajtaj kanqa. Chayrayku Jehovaj llajtawan khuska, ñaupajllamanpuni rinanchej tiyan. ¿Imaynamantá? Ñaupajmanpuni qhawanata Biblia yuyaychawasqanchejta kasukuspa, manataj qhepapi saqesqanchejtaqa. Ajinamanta Jesús, “Lotpa warminmanta yuyarikuychej” nispa yuyaychasqanta kasukusun.

[Sutʼinchaynin]

[Tapuykuna]