Kusisqa kasqanchikmanta wakkunaman willarina

KUSISQA kawsaytaqa mana atikullanchu. Achkha runasqa kusikuyninkumanta wakkunawan parlaytaqa mana atikusqanta yuyanku. Chantapis jatuchaq llaqtaspi tiyakuq runasqa, mana wakkunawan allintañachu parlarikunku.

Alberto Oliverio, profesor de Psicobiología nisqa nin: “Runasqa tukuyniqpi sapayakunku [...]. Jatuchaq llaqtaspi tiyakuypis sapayakunapaqjina. Runasqa, oficinapi llamkʼaq compañerosninkumanta, vecinosninkumanta, tiendapi chayri supermercado nisqapi cobraqmanta ima, manaña anchata interesakunkuchu”, nispa. Ajinata sapayakusqankuqa, runasta llakiyman chayachinman.

Chaywanpis cristianosqa, mana jinatachu kawsakunchik. Pablo nirqa: “Kusikullaychejpuni”, nispa (1 Tes. 5:16). Arí, Jehovata yupaychanchik, Bibliamanta chiqata yachakunchik, salvakuyta, wiñaypaq kawsakuyta ima  suyakunchik. Wakkunatataq chay bendicionesta japʼinankupaq yanapanchik. Chaykunata ruwasqanchikraykutaq hermanosninchikwan kusisqa kawsakuyta atinchik (Sal. 106:4, 5; Jer. 15:16; Rom. 12:12).

Chiqa cristianosqa, kusisqas kasqanchikrayku, khuska kusirikusqanchikraykutaq riqsisqa kanchik. Chayraykuchá Pabloqa, Filipospi tiyakuq hermanosman nirqa: “Kusikusaj qankunawan khuska. Jinallatataj qankunapis kusikuychej noqawan khuska”, nispa (Fili. 2:17, 18). Kaypi nisqanmanjina Pabloqa, iskay kutita hermanoswan kusikuymanta parlan.

Arí, mana ñuqallanchikpichu yuyananchik tiyan, imaraykuchus chayqa, hermanosninchikmanta karunchachiwasunman, nitaq paykunawan kusirikuyta atisunmanchu. Pablo nirqa: “Señorpi kusikuychej”, nispa (Fili. 3:1). ¿Imaynatá chayta ruwasunman?

Hermanosninchikwan kusirikuna

Pabloqa Filipensesman cartata qillqachkaspa, allin willaykunata willasqanrayku, ichá Romapi presochasqa kachkarqa (Fili. 1:7; 4:22). Chaywanpis payqa, sunqu kʼajaywanpuni willarqa. Chantapis Jehovata sirvinanpaq tukuy atisqanta kallpachakusqanmanta kusikurqa. Tukuy kawsayninwan qukusqantaqa, uywa jaywasqa patapi “chʼajchusqa[...]” jaywanawan kikincharqa (Fili. 2:17). Pabloqa, imaynapipis tarikuspa kusikuyniyuq kayta atisqanchikta rikuchiwanchik. Arí, presochasqa kaspapis nirqa: “Kusikullasajpuni”, nispa (Fili. 1:18, 19).

Pabloqa, Filipos llaqtapi qutuchakuyta sayarichirqa, chaypi kaq hermanostataq mayta munakurqa. Chantapis Diosta sirvispa kusikusqanmanta willarispaqa, paykunata kallpachananta yacharqa. Chayrayku qillqarqa: “Munani yachanaykichejta, kay tukuy ñakʼarisqayqa uj yanapa kasqanta evangelio astawan ñawpajman rinampaj. Ajinapeqa kamachina wasipi soldados, chantá tukuy yachanku Cristorayku preso kasqayta”, nispa (Fili. 1:12, 13). Chayta willaspaqa, paykunapis kusikunankuta munachkarqa. Paykunataq kusikurqankuchá. Arí, Pablo presochasqa kasqanmanta mana llakikunankupaq, payjinataq kanankupaq kallpachakunanku karqa (Fili. 1:14; 3:17). Paykunaqa Diosmanta mañapullankumanpuni karqa, atisqankumanjinataq yanapata apachillankuman karqa (Fili. 1:18, 19; 4:14-16).

¿Pablojinachu yuyanchik? Kawsayninchikpi, willayninchikpi ima, ¿imatachus allinta ruwasqanchikpi yuyananchikpaq kallpachakunchikchu? Hermanosninchikmanqa, imachus willayninchikpi kusichiwasqanchikmanta willarisunman. Manataq tʼukuna imaspunichu kanan tiyan. Ichá imaynatachus pillawanpis allinta parlayta qallarisqanchikmanta chayri tʼukurichisqanchikmanta willarisunman.  Chayri Bibliap juknin pʼitinmanta allinta parlarisqanchikmanta chayri willachkaptinchik Jehovamanta sutʼinchaq kasqanchikta reparasqankumanta, chaytaq may sumaqpuni kasqanmanta ima. Kayjina imasmanta willanarikuspaqa, khuska kusirikuchkanchik.

Jehovap achkha kamachisninqa, willaq rinankupaq mayta kallpachakunku. Precursores, qutuchakuykunata waturiq hermanos, superintendentes de distrito nisqa hermanos, betelitas, misioneros, siervos internacionales nisqa hermanos ima, tukuy sunquwan kusiywantaq tiempo juntʼasqata sirvinku. Ñuqanchikrí, ajinata “Diospa Reinompaj trabajopi yanapa[qkunawan]”, ¿kusikunchikchu? (Col. 4:11). Ajina kaptinqa, ruwachkasqankumanta agradecesqa kasqanchikta rikuchisunman. Tantakuykunapi chayri jatun tantakuykunapi paykunawan kachkaspaqa, kʼachamanta kallpacharisunman. Chantapis allin kanman paykunajina sunqu kʼajaywan sirvinapaq kallpachakunanchik. Chantá kawsayninkumanta willarinawanchikpaq, kallpacharinawanchikpaq ima waqyarisunman, ichá imitallatapis khuska mikhurikusunman (Fili. 4:10).

Llakiypi kaqkunawan khuska kusirikuna

Pabloqa qhatiykachasqa karqa, wak chʼampaykunatawantaq muchurqa, chaytaq Jehovaman chiqa sunqullapuni kananpaq yanaparqa (Col. 1:24; Sant. 1:2, 3). Ajinata ruwasqanwanqa, Filipos llaqtamanta hermanosninta yanapayta atirqa, chaytaq kusichirqa. Imaraykuchus paykunapis aswan qhipamanqa, Pablojina chʼampaykunapi rikukullankumantaq karqa. Chayrayku kusisqa kasqanta paykunaman willananpaq ajinata qillqarqa: “Diosqa qosunkichej mana Cristopi creeyllatachu, manachayqa payrayku ñakʼariyta atinaykichejtapis. Kunanqa qankunapis noqa jinallataj chay churanakojkunawan tinkushankichej, imaynatachus noqata rikuwarqankichej paykunawan tinkojta, kunampis uyarishankichej chay churanakojkunawan tinkushallasqaytapuni, ajinata”, nispa (Fili. 1:29, 30).

Kay tiempopi achkha cristianospis, Diosmanta willasqankurayku wakkunap churanakuyninkuta muchullankutaq. Wakin kutispi maqasqas kaspapis, achkha kutispiqa Diospa contranpi uqharikuqkuna rimasqankuta, familiaresninku churanakusqankuta, llamkʼayninkumanta chayri yachaywasimanta compañerosninku asipayasqankuta ima muchunanku tiyan. Jesusqa, chayjinapi rikukuspa mana mancharikunanchikta, nitaq llakikunanchikta nirqa. Astawanpis kusikunanchikpaq kasqanta nirqa, ajinata: “Kusikuyniyojmin kankichej runas noqarayku qankunapaj rimajtinku, chejnispa ñakʼarichisojtiykichej, tukuy imatataj llullakuspa contraykichejpi nejtinku ima. Kusikuychej jatun kusiywan, imaraykuchus jatunmin janaj pachapi tʼinkaykichejqa”, nispa (Mat. 5:11, 12).

Wak suyuspi hermanosninchikta sinchita qhatiykachachkasqankuta yachaspaqa, mana llakikunanchikchu tiyan. Astawanqa, chiqa kaqpi sinchita sayachkasqankurayku kusikunanchik tiyan. Jehovamantataq creeyninkupi kallpachasqallapuni kanankupaq mañapusunman (Fili. 1:3-5). Chay hermanosninchikpaqqa, chayllata ruwayta atinchik. Qutuchakuyninchikpi kaq hermanostarí llakiykunasninkupi yanapayta atinchik. Paykunapi interesakuspa, paykunata kallpacharispa imaqa, sumaqta ruwanchik. Chantapis paykunawan khuska kusirikunanchikpaqqa, Familianchikwan Diosta Yupaychanapaq Chʼisipi tantakuyninchikman wakin kutispi waqyarisunman. Chayri khuska willamusunman, chayri khuska karikusunman.

Tukuy imamanta khuska kusirikusunman. Mana kay pacha runasjina ñuqallanchikpichu yuyananchik tiyan, manaqa hermanosninchikwan kusirikunanchik tiyan. Ajinamantaqa qutuchakuypi munakuy kanqa, jukchasqas kanapaqtaq yanapasun. Astawantaq hermanosninchikwan kusikusun (Fili. 2:1, 2). Pablo nisqantataq yuyarikunapuni, pay nirqa: “Kusikuychejpuni Señorpi. Ujtawampis nillaykichejtaj: Kusikuychej”, nispa (Fili. 4:4).

[6 paginapi maymantachus foto urqhukusqan]

Globo terráqueo: cortesía de Replogle Globes