Kallpachakusqanchikqa mana qhasipaqchu

FAMILIAPI Diosta Yupaychanapaq Chʼisi, Bibliata ukhunchay imaqa, wawasta yachachinapaq, “Señorpa kʼamiynimpitaj uywa[napaq]” mayta yanapawanchik (Efe. 6:4, Qheshwa Biblia). Chaywanpis wawasqa, yachachichkaptinchik usqhayllata saykʼunku. ¿Imaynatataq tatas yachachinkuman? Estados Unidosmanta, iskay qhariwarmis imaynatachus wawasninkuta yachachisqankuta qhawarina.

Californiapi, juk tata Jorge sutiyuq nin: “Wawasniyku juchʼuyllaraq kachkaptinku, warmiywan khuska familiajina Bibliamanta yachakusqaykuqa, mana saykʼuchinapaqjina kananpaq kallpachakuq kayku. Wakin kutispiqa, Biblia yachachisqanmanta librituy nisqanmanjina, kikinta pʼachallikuq kayku. Chantapis yachaqanamanjina, espadasta, kamachina tuqnusta, canastasta ima ruwaq kayku. Chantá jukniyku Bibliapi parlaq runasmanta mayqillanpis kanmanjina ruwaq, parlaq ima, qhawaqkunataq pichus kasqanta niq kayku. Chantapis, tukuyniyku tʼukurinaykupaqjina Bibliamanta tapuykunata ruwaq kayku. Chantá, Noep arcantajina ruwaq kayku chayri ima tiempopichus Bibliamanta wakin yachachiykuna kasqanmanta qillqaq kayku. Bibliapi parlaq runasta, imastachus ruwasqankuta ima, dibujaq kayku. Kunanpis Efesios 6:11-17 nisqanmanjina Diospa maqanakuna pʼachata qusqanta dibujasaqku. Chaymantataq sapa juk, jukninmanta sutʼinchasaqku. Ajinata ruwasqaykuqa, familiajina Bibliamanta yachakuyta astawan munanaykupaq yanapawayku”, nispa.

Michigan llaqtamanta juk mama Debi sutiyuq nin: “Imaynatachus kimsa watitayuq imillitaykuta yachachinaykutaqa, mana yacharqaykuchu. Juk pʼunchay Biblia yachachisqanmanta librituypi, Isaacmanta Rebecamanta ima ñawiripuchkaptiy, iskay muñecosta japʼispa, chay muñecospis parlachkankumanjina ruwarqani. Ajinata ruwaptiy allinta uyariwaq. Qhipan killaspiqa, muñecoswan achkha runasmanta yachachirqani. Tukuptiykutaq imillitayqa, tukuy pukllanasninta, wak imasta ima, maskʼamuq qhipan yachaqanapaq. May valorniyuq imastapis maskʼachkanmanjina karqa. Chantapis zapatop cajanwan, puka qʼaytuwan, puka waskhamanta ima, Rahabpa wasimanta, yachachiq kani. Pichanap kʼaspinmantaq juk metro khuskanniyuq pukllana katarita maytʼuykuq kayku. Ajinamanta Números 21:4-9 bronce katarimanta rikuchinapaq. Tukuy pukllanasninta juk bolsaman waqaychaq kayku. Imillitayku salapi ‘Biblia yachachisqanmanta bolsitanta’ apaykachasqanta, pay Bibliamanta yachakusqanmanjina ruwasqanta rikuspaqa, mayta kusikuyku”, nispa.

Wawasta uywaytaqa, mana atikullanchu. Chayrayku Jehovata yupaychayta munanankupaqqa, semanapi mana juk kutillatachu yachachina tiyan. Chantapis Familiapi Diosta Yupaychanapaq Chʼisita, Bibliata ukhunchayta ima, ruwananchikpuni tiyan. Chayrayku kallpachakusqanchikqa, mana qhasipaqchu kanqa.