¿Imatataq wawasniyki kutichinkuman?

TATAS, kay Torremanta Qhawaq 15 enero 2010 watamanta revistaqa, (16-20 paginaspi) wawasniykiwan imaynatachus rikuchiykunata ruwanaykita yuyaycharqa. Kay yachaqanapiqa, imaynatachus wawasniykichikta yachaywasipi chʼampaykunata atipanankupaq wakichinaykichikta yuyaychachkan. Chaytataq Familiapi Diosta Yupaychanapaq Chʼisipi, imaynatachus ruwanankuta rikuchiwaqchik.

JEHOVAMANTA sutʼinchaq kaq wawasqa, tukuy laya chʼampaykunapi rikukunku. Compañerosninkuqa, imaraykuchus banderata mana napaykusqankuta, diachakuykunaman, wak raymisman ima, mana risqankumanta, sapa kuti tapunku. ¿Imatataq wawasniyki kutichinkuman?

Wakin yuqallitus, imillitasqa, jinallata kutichinku: “Mana chayta ruwayta atinichu. Hermana chayri hermano kani”, nispa. Chayta ruwasqankutaqa, allinpaq qhawanchik. Jinata kutichiptinkuqa, compañerosninku manaña tapunqankuchu. Chaywanpis Bibliaqa, cristianosman niwanchik: “Wakichisqapuni kaychej, Diospi atienekuspa imatachus suyakusqaykichejmanta [chayri imapichus creesqaykichikmanta] sutʼita kutichinaykichejpaj. Yachayta munajkunaman”, nispa (1 Ped. 3:15). Chaypaq, ¿mana chayta ruwayta atisqallankutachu ninanku tiyan? Mana. Wakin imapichus creesqanchikta mana allinpaqchu qhawaptinkupis, wakinqa sutʼinchasqanchikmanta mayta agradecenqanku.

Wakin waynuchukunaqa, compañerosninku imaraykuchus imatapis ruwasqankuta chayrí mana ruwasqankuta tapuptinku, Aprendamos del Gran Maestro, nisqa libromanta chayri wak publicacionesmanta Bibliap yachachiykunasninta sutʼinchanku. Wakin compañerosninkuqa, sumaqta uyarinku, Bibliamantapis yachakuyta munanku. Wakinkunataq mana uyariyta munankuchu. Chaywanpis, Bibliap yachachiykunasninta mana sumaqta sutʼinchaptinkuqa, wakin yuqallitus, imillitas mana entiendeyta atinkuchu. Sutʼincharinapaq, Minhee 11 watasniyuq imillita, yachaywasimanta amigan diachakunman waqyariptin jinata kutichisqa: “Bibliaqa mana diachakunata ninchu. Juan Bautistata juk diachakuypi wañuchisqankuta, ¿yachankichu?”, nispa. Amiguitanqa, kutichisqanta mana entienderqachu.

Librospa dibujosnin, yachachiykunasnin ima, sutʼinchanapaq sumaq yanapas kanku. Chaywanpis, wakin yachaywasispi kamachiqkunaqa, Bibliamanta publicacionesta compañerosninkuman rikuchinankuta, mana saqinkuchu. Jina kaptin, mana publicacionesllawan, ¿atinkumanchu wawasniyki iñiyninkumanta sutʼinchayta? ¿Imaynatá imapichus creesqankumanta parlanankupaq yanapawaqchik?

Rikuchiykunata ruwaychik

Wasiykichikpi imaynatachus kutichinankuta rikuchiychik. Qamkuna compañerosninkujina kaychik. Wawasniykichik, Bibliamanta yachakusqankuta imaynatachus sutʼinchasqankuta qhawaychik, sumaqta ruwasqankutataq niychik. Chantapis, imaynasmantachus aswan sumaqta kutichinankuta, imaraykutaqchus chay, may allin kasqanta niychik.  Chaypaqqa, riqsisqa rimaykunallawan sutʼinchanankuta yachachiychik. Joshua jisqʼun watasniyuq yuqallituqa, compañerosnin sunqu yuyay, chiqa sunqu rimaykunata mana entiendesqankuta nin. Chayrayku, riqsisqa rimaykunallawan sutʼinchasqa (1 Cor. 14:9).

Wakin waynuchitusqa, paykuna tapuptinkupis cristiano compañeronku unayta sutʼinchaptinku saykʼupunku. Chaywanpis, cristiano yuqallitus, imillitas ima, tʼukurichiptinku, kutichinankuta saqiptinku ima, uyariyta munanqanku. Ajinata Haneul chunka watasniyuq imillita ruwasqa, pay nin: “Compañerosniyqa, ñuqalla parlarinaymantaqa, paykuna parlariyta munanku”, nispa. Ajinata ruwanapaqqa, tapuykunata ruwana, kutichisqankuta, imatachus chaymanta yuyasqankutataq sumaqta uyarina.

Kay urapi parlarisqankuqa, imaynatachus compañerosninkuta tʼukurichinankuta rikuchichkan. Mana kikintapunichu ninanku tiyan. Imaptinchus yuqallitus, imillitas mana kikinchu kanku, nitaq kikin chʼampaykunapichu rikukunku. Wawasniyki yachachichkasqaykita entiendenanku, piwanchus parlasqankumanjina,  ima chʼampaypichus rikukusqankumanjinataq parlaykunasnillankupi ninanku ima, aswan allin kanqa. Wawasniykichik yachaywasipi kachkanku chayqa, chay parlariykunata paykunawan rikuchiychik.

Wawasniykita iñiyninkumanta sutʼinchanankuta wakichinaykipaq tiempochakuy, kallpachakuy ima. Cristiano tatasqa, wawasninkuman Bibliap yuyaychaykunasninta, chayta tukuy imapi kasukunankuta ima, yachachinankupaq mayta kallpachakunku (Deu. 6:7; 2 Tim. 3:14).

Familiapi Diosta Yupaychanapaq Chʼisipi, recuadropi nisqanmanjina rikuchiychik, chaytaq may allin kasqanta reparankichik. Manataq kikintapunichu ninanku tiyan. Ichapis, wawasniykiwan achkha kutista rikuchiwaq, ima laya chʼampaychus kasqanmanjinataq wakjinasmanta kutichiwaq, ajinamanta sutʼinchayta atisqankutachus manachus reparanki. Paykuna sutʼinchaptinkutaq sumaqta, kʼachamanta ima, parlarinankupaq yanapay. Tiemponmanqa, compañerosninkuman, yachachiqninkuman, vecinosman ima, sutʼinchayta atinqanku.

[4, 5 paginaspi recuadro, dibujos/fotos]

DIACHAKUY

Melisa: Imaynalla Julio. Diachakuyniyman jamurinaykita munani.

Julio: Pachis. Chaywanpis, kayta tapurisuyta munani: ¿Imaraykutaq diachakunki?

Melisa: Tukuy runas diachakunku. ¿Manachu qam diachakunki?

Julio: Mana.

Melisa: ¿Imarayku? Tatasniyqa, paqarikuchkaptiy mayta kusikusqanku.

Julio: Tatasniypis. Chaywanpis, chay pʼunchayqa mana raymichakunichu. Wakin kutiqa, watata juntʼaq runa, mayta jatunchakun. Chaywanpis, Dioslla jatunchanapaqjinaqa, ¿icharí? Chantapis, ¿nichu Payman kawsaymanta agradecekunanchik kanman?

Melisa: ¿Mana raymichakunaytachu nichkawanki?

Julio: Chaytaqa, qam akllanayki tiyan. Yachankijina diachakusqankurayku achkha regalosta japʼiyta munanku, chaywanpis Bibliaqa, wakkunaman quriy astawan kusichiwasqanchikta nin. ¿Imataq aswan allin kanman, dianchik pʼunchaypi regalosta japʼiychu chayri Diosman agradecekuy, wakkunata yanapariy imachu?

Melisa: Chaypiqa, ni jaykʼaq tʼukurisqanichu. Chantá tatasniyki, ¿nichu jaykʼaqpis ni imata regalasunku?

Julio: Tatasniyqa, regalawankupuni. Chaywanpis regalanawankupaqqa, mana chay pʼunchay chayamunantapunichu suyanku. Chaywanpis, ¿imaraykuchus diachakuyta ruwasqankuta yachankichu?

Melisa: ¿Qamrí yachankichu?

Julio: Arí, chaywanpis qʼaya, unay tiempo juk diachakuta ruwasqankumanta willarisqayki.

BANDERATA NAPAYKUYMANTA

Gisela: Carla, ¿imaraykutaq banderata mana napaykunkichu?

Carla: Waliqta tapuwanki. Chantá, ¿imarayku qam napaykunki?

Gisela: Suyuyta munakusqayrayku.

Carla: ¡Ah! Mamaykitapis munakullankitaq, ¿icharí? Chaywanpis mana makiykita pechoykiman churakuspachu napaykunki, ¿icharí?

Gisela: Mana. Chaywanpis banderataqa, jatunpaq qhawasqayrayku napaykuni. ¿Qamrí nichu jatunpaq qhawanki?

Carla: Jatunpaq qhawani. Chaywanpis, jatunpaq qhawasqanchik runasta chayri wak imasta, ¿jinatachu napaykunchik?

Gisela: Mana. Yachachiwaqninchikta jatunpaq qhawaspapis mana banderatajinachu napaykuni. Mayta tʼukurichiwanki.

Carla: Runasqa, banderata suyunkuta jatunpaq qhawachisqanrayku napaykunku, chayraykutaq wañuytapis munanku, ¿icharí? Ñuqaqa, mana jinatachu yuyani. Mana kawsayniyta suyuyrayku quymanchu. Imaraykuchus kawsaytaqa, Dios quwarqa, paymantaq qukuniña. Chayrayku, banderata jatunpaq qhawaptiypis mana napaykunichu.

Gisela: ¡Ah!, chayraykuchu.

Carla: Waliqta tapuriwarqanki. Wak imasta imaraykuchus ruwasqayta chayri mana ruwasqayta yachayta munaptiykipis tapurillawanki. Bibliaqa, Babiloniapi kamachiq, runas jatun lantiman kʼumuykukunankuta kamachisqanta nin. Chaywanpis wakin runasqa, wañuchisqa kanankuta niptinkupis mana chayta kasusqankuchu. ¿Chayta yacharqankichu?

Gisela: Mana. Chantá, ¿wañuchisqankuchu?

Carla: Qʼaya recreopi chayta willarisqayki.

YACHAYWASIPI KAMACHIQTA AKLLAYMANTA

Miguel: Diego, ¿pitaq cursonchikmanta sumaq kamachiq kanman?

Diego: Ñuqaqa, mana pitapis akllasaqchu.

Miguel: ¿Imarayku?

Diego: Imaraykuchus sumaq kamachiqta akllaniña. Cristianojina Jesusllata sumaq kamachiqniypaq qhawani. Mana waktaqa akllaymanchu. Chaywanpis, ¿yachankichu imaraykuchus Jesusllata sumaq kamachiqpaq qhawasqayta?

Miguel: Mana, nitaq yachaytapis munanichu.

Diego: Wak pʼunchay yachayta munanki chayqa, tapurillawanki.

[Dibujo/foto]

“Julio, diachakuyniyman jamurinaykita munani”

[3 paginapi dibujo/foto]

¿Imaraykutaq banderata mana napaykunkichu?