Jesusqa wañuyninwan rantiwanchik
Jesusqa wañuyninwan rantiwanchik
“Churipi creejqa wiñay kawsayniyoj; Churi[ta mana kasukuqtaq, NM] kawsaytaqa mana rikonqachu, astawanqa Diospa phiñakuynin paypa patampi kashan.” (JUAN 3:36.)
1, 2. ¿Imaraykutaq kay revista urqhukuyta qallarirqa?
KAY ñawirichkanchikjina revistaqa, inglés qallupi 1879 watamanta octubre killapi tawa kaq revista urqhukurqa, juknin yachaqananpitaq jinata nirqa: “Bibliata sumaqta ukhunchaqkunaqa, Cristop wañuyninta may jatunpaq qhawakusqanmanta, tʼukuchkaq qhipakunku”, nispa. Tukukuyninpitaq jinata nirqa: “Cristop wañuyninqa, may valorniyuq, imaptinchus juchasninchikrayku jaywasqa karqa, chayrayku ima ruwayllapis pisipaq qhawachiptinqa, qhisachananchik tiyan”, nispa (1 Juan 2:1, 2, ñawiriy).
2 Kay revistaqa, 1879 watamanta julio killapi urqhukuyta qallarirqa. ¿Imapaq? Astawanqa, Bibliapi, Jesús wañuyninwan rantiwasqanchikta yachachisqanta sutʼinchananpaq. Chunka jisqʼunniyuq siglop tukukuyninpiqa, cristianos nichikuqkuna, Jesús wañuyninwan juchamanta rantisqanta iskaychachiyta munaspa, uqharikurqanku. Chayrayku kay revistap yachaqanasninqa, chiqamantapuni “horampi mikhuna[jina]” karqa (Mat. 24:45). Chay wataspiqa, achkha runas jinallamanta kawsay rikhurisqanpi creeyta qallarirqanku, chaytaq Bibliapi, runa juntʼa kawsayninta chinkachisqanta yachachisqanwan, churanakun. Chaypi creeqkunaqa, runas jinallamanta aswan allinman tukunankuta yuyanku, ajina kaptinqa nichá juchamanta rantisqa kayta necesitasunmanchu. Chayrayku Pablo, Timoteoman yuyaychasqanqa may sumaq, pay nirqa: “Allinta waqaychay, imatachus Dios qosorqa, chayta. Qhesachay mana Diosmanta qhasi thawtiykunata. Diospa contrampi churanakuyta ima, mayqenmantachus wakin runas pantaspa, yuyanku cheqa yachay kasqanta, chay imasta. Chay llulla yachachiykunata qhatispa, wakinkunaqa cheqa creeymanta tʼaqakorqanku”, nispa (1 Tim. 6:20, 21).
3. ¿Ima tapuykunatataq ukhunchasun?
3 Ni pi ‘chiqa creeymanta tʼaqakuyta’ munanchikchu. Chayrayku tapurikuna: ¿Imaraykutaq rantisqa kayta necesitani? Jehovawan, Jesuswan, rantinawankurayku, ¿imayna llakiypitaq rikukurqanku? Dios, Churinpa wañuyninwan rantiwasqan, phiñakuyninmanta salvanawanpaq, ¿imatá ruwayman?
Diospa phiñakuyninmanta salvasqas
4, 5. ¿Imaraykutaq kay saqra pacha Diospa phiñakuynin urapi kachkasqanta nisunman?
4 Bibliaqa, Adán juchallikusqanmantapacha Diospa phiñakuynin, tukuy runaspa patanpi kachkasqanta sutʼinchan (Juan 3:36). Runas wañusqanpitaq chayqa sutʼita rikukun. Satanaspa kamachiyninqa, runasta llakiykunamanta mana jarkʼayta atinchu. Ni mayqin kamachiqpis, runasman imastachus necesitasqankuta quyta atinchu (1 Juan 5:19). Runasqa, kunan tiempokama maqanakuykunapi, saqra ruwaykunapi, wakchayaypi ima, kawsakunku.
5 Chaytaq, Jehová kay saqra pachata mana yanapachkasqanta sutʼita rikuchin. Pablo nirqa: “Diospa kʼajaj phiñakuynenqa janaj pachamantapacha rikuchikun Diosta mana yupaychajkunaj contrankupi”, nispa (Rom. 1:18-20). Chayrayku Diospa contranpi, saqrata ruwallanqankupuni chayqa, chinkachisqa kanqanku. Kay tiempopi Jehovap phiñakuyninqa, Satanaspa pachan chinkachisqa kananmanta willaykunaniqta riqsichikuchkan, chaytaq qanchis vasosmanta castigo jichʼaykukusqanwan kikinchakun. Chay willaykunataq, publicacionespi willakun (Apo. 16:1).
6, 7. ¿Ima ruwaypitaq akllasqa cristianos ñawpaqpi kachkanku? Chantá Satanaspa kamachiyninpi kaqkuna, ¿imatataq ruwayta atinkumanraq?
6 Satanaspa kamachiyninmanta kacharichikuspa, Diospa khuyakuyninta, ¿tarisunmanraqchu? Arí. Imaptinchus Jehovaqa, paywan allinyakunanchikta munan. Akllasqa cristianosqa, “Cristoj sutimpi willajkuna” kanku, paykunataq, pachantinpi runasman willaspa ñawpaqpi kachkanku. Kay willayniqtataq, ‘Dioswan allinyakunankupaq’ runasta waqyarinku (2 Cor. 5:20, 21).
7 Apóstol Pabloqa, “Jesús, [...] jamoj kʼajaj phiñakuymanta Salvawajninchej”, kasqanta nirqa (1 Tes. 1:10). Jehovaqa, juchasninkumanta mana pesachikuyta munaqkunata chinkachispa, phiñakuyninta rikuchinqa (2 Tes. 1:6-9). ¿Pitaq salvasqa kanqa? Biblia kutichin: “Churipi creejqa wiñay kawsayniyoj; Churi[ta mana kasukuqtaq, NM] kawsaytaqa mana rikonqachu, astawanqa Diospa phiñakuynin paypa patampi kashan”, nispa (Juan 3:36). Rikunchikjina, Jehová phiñakuynin pʼunchaypi, kay saqra pachata chinkachiptinqa, Jesuspi, wañuyninpi ima, iñiqkunalla salvakunqanku.
¿Imaynatá Jehová rantiwanchik?
8. a) ¿Imaynatataq Adanwan, Evawan kawsakunkuman karqa? b) ¿Imaynamantá Jehová chiqan kaqmanjinapuni ruwasqanta rikuchirqa?
8 Diosqa, Adantawan Evatawan juntʼa runasta ruwarqa. Paykuna kasukunkuman karqa chayqa, wawasninkuwan khuska, kusisqas paraisopi kawsakunkuman karqa. Chaywanpis, Diospa kamachisqanta mana kasukusqankurayku, Edén huertamanta wikchʼuchikurqanku, Diostaq wañunankuta nirqa. Ajinamanta juntʼa runas kasqankuta chinkachirqanku, wawasninkupis juchasapas paqarikurqanku. Jehovaqa, chiqan kaqmanjinapuni ruwan, nisqantataq juntʼanpuni, chaytaq Adanwan Evawan, machuyaspa wañupusqankupi sutʼi rikukurqa. Arí, Jehová, Adanman mana mikhunanku sachʼamanta mikhuptinku, wañunankuta nisqanqa, juntʼakurqa.
9, 10. a) ¿Imaraykutaq wañunchik? b) ¿Imaynatá wañuymanta kacharichisqa kasunman?
9 Adanpa miraynin kasqanchikrayku, juchata herenciatajina cuerponchikpi japʼinchik. Adán juchallikuchkaptinqa, niraq paqarikuchkaspapis, juchasapasña karqanchik, chayraykutaq juchallikunchik, wañunchik ima. Jehová, ni pita rantinawanchikpaq kachamuspalla, manaña wañunanchikta ninman karqa chayqa, nisqanta mana juntʼanmanchu karqa. Chayrayku Pablo jinata nirqa: “Yachanchej leyqa Diosmanta churasqa kasqanta; noqarí aychamanta kaspa, juchaman qosqa kani. Ay, imanallasajtaj? Pitaj kay wañoj cuerpoymanta kacharichiwanqari?”, nispa (Rom. 7:14, 24).
10 Jehovalla juchasninchik pampachasqa kananpaq, wañuymantataq kacharichisqa kananchikpaq, chiqan kayninmanjina rantiyta atiwarqanchik. ¿Imatá chaypaq ruwarqa? Janaqpachamanta may munasqa Churinta, Jallpʼapi juntʼa runajina paqarikunanpaq, kawsaynintataq ñuqanchikrayku qunanpaq kachamurqa. Jesusqa, Adanmanta nisqaqa, juntʼa runallapuni karqa, “mana jaykʼajpis juchallerqachu” (1 Ped. 2:22). Chayrayku payqa, mana juchasapa wawasniyuq kayta atinman karqa. Chaywanpis Jesusqa, Diospa enemigosnin wañuchinankuta saqirqa, ajinamantataq Adanpa mirayninta yanapayta, paypi iñiqkunamantaq wiñay kawsayta quyta atirqa. Chayrayku Biblia nin: “Uj kʼata Dios tiyan, jinallataj Dioswan runasta allinyachejpis uj kʼatalla, chaytaj Cristo Jesús, Runa. Paymin kawsayninta jaywaykorqa, chaywan tukuy runasta salvanampaj”, nispa (1 Tim. 2:5, 6).
11. a) Jehová wañuymanta rantiwasqanchikta juk kikinchaywan sutʼinchay b) ¿Pikunap juchasninkutataq Jesús wañuyninwan picharqa?
11 Jehová wañuymanta rantiwasqanchikta, juk kikinchaywan sutʼincharina. Juk tata suwaman tukun, chayraykutaq wañuchisqa kananta ninku. Wawasninqa, may llakiypi, achkha manuyuqtaq rikhurinku. Chaywanpis, kʼacha jatun tatanku paykunata yanapan, juknin wawanniqtataq manunkuta juntʼachipun, kawsayninkuta allinyachinankupaqtaq yanapananta nin. Jehovawan, munasqa Churinwanqa, ajinallatataq ruwarqanku, Adanpa mirayninta juchamanta Cristop yawarninwan rantispa. Chayrayku Juan Bautistaqa, Jesusmanta kayta nirqa: “Kaymá Diospa Corderon, runaspa juchanta apaspa pichajqa”, nispa (Juan 1:29). Arí, Jesusqa tukuy kawsaq runaspata, wañusqa runaspata ima, juchasninkuta picharqa.
Jehová, Jesús ima, ¿imayna llakiypitaq rikukurqanku?
12, 13. Abraham, Diosta kasukuspa Isaacta jaywayta munasqanmanta, ¿imatá yachakunchik?
12 Janaqpachapi Tatanchik, Churin ima, rantinawanchikpaq imayna llakiypichus rikukusqankutaqa, mana yachanchikchu. Chaywanpis, Biblia, chiqa sunqu kamachisninmanta nisqanqa, tumpata entiendenapaq yanapawasunman. Abrahampa kawsayninmanta yuyarikuna. Diosqa, kayta kamachirqa. “Munasqa kʼata churiyki Isaacta pusarikuspa, riy Moríah sutiyoj jallpʼaman. Chayman chayaspataj, payta qʼolachipuwanki ima orqomanchus noqa riy nisqayki, chaypi”, nispa (Gén. 22:2-4). Abraham, kay kamachiyta kasukuspa chay llaqtaman kimsa pʼunchay puriyta richkaspa, imaynatachus sientekusqanpi tʼukurina.
13 Chantapis Moriahman chayaptin, altarta ruwaspa, churinta chakisninta, makisninta ima, wataykuspa chayman siriykuchichkaspa, may llakiypi rikukusqanpi tʼukurinallataq. Churinta wañuchinanpaq cuchillota uqharichkaspapis, maytachá sunqunta nanachikurqa. Chantapis Isaac, altarpi sirisqa kachkaspa, juk filo cuchillowan wañuchisqa kananta suyachkaspa, ¿imaynataq sunqun kachkanman karqa? Chaywanpis Jehovap angelninqa, Abraham, churinta wañuchinanta mana saqirqachu. Chaytaq, Jehová, Churinta, Satanaspa kamachisnin wañuchinankuta saqispa, mayta sunqunta nanachikusqanta entiendenapaq yanapawanchik. Chantapis Isaac, tatanta tukuy sunquwan kasukusqanqa, Jesús ñuqanchikrayku tukuy sunqu ñakʼarisqanwan, wañusqanwan ima, kikinchakun (Heb. 11:17-19).
14. ¿Imaynatá Jacobpa llakiynin, Jehovap llakiyninta entiendenapaq yanapawanchik?
14 Jacobpa llakiyninqa, Jehová sunqunta nanachikusqanta entiendenapaq yanapallawanchiktaq. Payqa Hebrón llaqtapi tiyakurqa, José churintataq mayta munakurqa. Wakin churisnintaq Joseta chiqnikuspa paymanta envidiakurqanku. Jacobqa, juk kuti Joseta wawqisninta qhawarimunanpaq kacharqa, paykunaqa, pachak kilometrospijina ovejasta michichkarqanku. Joseqa, wawqisnin chiqnikusqankuta yachaspapis tukuy sunqu kasukurqa. Churisnin Josep pʼachanta yawarllata jaywaptinku, ¡maytachá Jacob sunqunta nanachikurqa! Payqa, pʼachanta rikuspa nirqa: “Arí, wawaypata kayqa. Ima sajra animalchari wawaytaqa mithaspa, mikhuykun”, nispa. Chayqa maytapuni phutichirqa, achkha pʼunchaykunatataq waqarqa (Gén. 37:33, 34). Jehovaqa, mana juchasapa runasjinachu llakiyninta rikuchin. Chaywanpis Jacobpa llakiyninqa, Jehová munasqa Churinta Jallpʼapi mayta ñakʼarichispa, sunqu nanayta wañuchisqankuta rikuspa, mayta sunqunta nanachikusqanta entiendenapaq yanapawanchik.
¿Imaynatá Jesuspa wañuynin yanapawanchik?
15, 16. a) ¿Imaynamantá Jehová, Jesuspa wañuyninta allinpaq qhawasqanta rikuchirqa? b) ¿Imaynatá Jesuspa wañuynin yanapasunki?
15 Jehovaqa, chiqa sunqu Churinta atiyniyuq espiritutajina kawsarichirqa (1 Ped. 3:18). Jesusqa, kawsarimuytawan 44 pʼunchaykunata discipulosninta kallpacharqa, runasman pachantinpi willanankupaqtaq wakichirqa. Chaymantataq janaqpachaman kutipuspa, wañuyninpi iñiqkunarayku yawarninta jichʼasqanwan, Diospa ñawpaqinman chayarqa. Jehovaqa, Jesús rantiwasqanchikta, may allinpaq qhawarqa. Chaytataq, Cristo discipulosninman Pentecostés 33 watapi Jerusalenpi tantasqa kachkaptinku, espíritu santota tʼakaykamunanpaq kamachisqanpi rikuchirqa (Hech. 2:33).
16 Cristop akllasqa discipulosninqa, runaspa juchasninku pampachasqa kananpaq, Cristop sutinpi bautizakunankuta, usqhayllata willayta qallarirqanku. ¿Imapaq? Diospa phiñakuyninmanta ayqinankupaq (Hechos 2:38-40, ñawiriy). Diosqa, chay pʼunchaymantapacha tukuy suyusmanta achkha runasta, Cristop wañuyninpi iñisqankurayku, paywan allinyakunankupaq pusamuchkan (Juan 6:44). Kunanqa, kay tapuykunatañataq ukhuncharina: ¿Allinta ruwasqanchikraykuchu wiñay kawsanamanta sumaq suyakuyta japʼinchik? Chay suyakuyta, ¿chinkachisunmanchu?
17. ¿Imaynatá Diospa amigosnin kayta atisqanchikta qhawananchik tiyan?
17 Ni pi juchamanta rantinapaqjinachu kanchik. Chaywanpis, Jesuspa wañuyninpi iñisqanchikrayku, Diospa amigosnin kayta atinchik, paraisopitaq wiñaypaq kawsakuyta suyakuchkanchik. Jina kaptinpis, Jehovawan allinpi kasqanchikqa, tukukapunman. Chayrayku, Jehová phiñakuynin pʼunchaypi salvanawanchikpaqqa, sapa pʼunchay “Cristo Jesusnejta juchamanta kacharichisqa” kasqanchikta, jatunpaq qhawananchik tiyan (Rom. 3:24; Filipenses 2:12, ñawiriy).
Jesuspa wañuyninpi iñinallapuni
18. ¿Imaynamantá Jesuspa wañuyninpi iñisqanchikta rikuchinchik?
18 Kay Juan 3:36 nisqanmanjinaqa, Señor Jesucristopi iñisqanchikta rikuchinapaq, payta kasukunanchik tiyan. Jesuspa wañuyninta may jatunpaq qhawasqanchiktaq, pay yachachisqanmanjina llimphuta kawsanapaq, tanqanawanchik tiyan (Mar. 7:21-23). Chayrayku, “khuchichakuy[ta]”, “millay mana parlanasta”, chantá “millay kawsay[ta]” —mayqinpichus qʼala runaspa millay ruwaykunasninta qhawayman yachaykukuspa— mana saqiyta munaqkunaqa, Diospa phiñakuynin pʼunchaypi chinkachisqa kanqanku (Efe. 5:3-6).
19. ¿Imasta ruwaspataq Jesuspa wañuyninpi iñisqanchikta rikuchisunman?
19 Jesús ñuqanchikrayku wañusqanmanta agradecekusqanchikta rikuchinapaqqa, “Diosta yupaychaypi” tukuy tiemponchikta churananchik tiyan (2 Ped. 3:11, NM). Arí, mañakunapaq, Bibliata sapallanchikpi ukhunchanapaq, tantakuykunaman rinapaq, familiapi Diosta yupaychanapaq, Reinomanta willanapaq ima, tiempochakuna tukuy sunquwantaq ruwana. Chantapis, ama qunqanachu, “allin kajta ruwayta, jinallataj kapu[wasqan]chejwan wajkunata yanapariyta. Chay jina ruwayqa Diosta kusichin uj sumaj jaywana jina” (Heb. 13:15, 16).
20. ¿Ima bendicionestataq tukukuy pʼunchaykama Jesuspa wañuyninpi iñiqkuna japʼinqanku?
20 Jehová, phiñaykuyninta kay saqra pachap contranpi rikuchiyta qallariptinqa, chay pʼunchaykama Jesuspa wañuyninpi iñisqanchikmanta, jatunpaq qhawasqanchikmanta ima, ¡may kusisqas kasunchik! Musuq pachapitaq, Jehová phiñakuyninmanta kacharichinawanchikpaq Churinta kachamusqanmanta, wiñaypaq agradecesqas kawsakusun (Juan 3:16; Apocalipsis 7:9, 10, 13, 14, ñawiriy).
Kay tapuykunaman kutichina
• ¿Imaraykutaq rantisqa kayta necesitanchik?
• ¿Imayna llakiypitaq Jehovawan Jesuswan rantinawanchikpaq rikukurqanku?
• ¿Imaynamantá Jesuspa wañuynin yanapawanchik?
• ¿Imaynamantá Jesuspa wañuyninpi iñisqanchikta rikuchinchik?
[Tapuykuna]
[13 paginapi dibujo/foto]
Jehovawan allinyakunanchikpaq tiempo kanraq
[15 paginapi dibujos/fotos]
Abraham, Isaac, Jacob ima, sunqunkuta nanachikusqankupi tʼukurispaqa, Jehovawan Jesuswan imayna llakiypichus rikukusqankuta entiendenchik