Mañakuyniyki Diosta astawan kusichinanpaq Bibliata ukhunchay
Mañakuyniyki Diosta astawan kusichinanpaq Bibliata ukhunchay
“Mañarikuyki ari Señorníy, mañakususqayta uyarinawaykita.” (NEH. 1:11.)
1, 2. ¿Imaraykutaq Bibliapi tarikuq mañakuykunata ukhunchariy allin?
CHIQA yupaychaypiqa, Diosmanta mañakunchik, Bibliata ukhunchanchik ima (1 Tes. 5:17; 2 Tim. 3:16, 17). Bibliaqa, mana rezosta urqhunapaq librochu, chaywanpis chaypiqa, salmos libropijina, achkha mañakuykunata tarisunman.
2 Bibliata ñawirichkaspa chayri ukhunchachkaspa, ichapis ñuqanchikpaqjina mañakuykunata tarisunchik. Chaykunamanta wakin parlaykunata mañakuyninchikpi uqhariptinchiktaq, mañakuyninchikqa, Diosta astawan kusichinqa. Diospa kamachisninpa mañakuyninkumanta, ¿imatá yachakusunman?
Diospa yanapanta maskʼana, chaymanjinataq ruwana
3, 4. Abrahampa kamachin, ¿imatá ruwanan karqa, imatataq Jehová kutichisqanmanta yachakunchik?
3 Bibliata ukhunchayqa, Diospa yanapanta mañakunapuni kasqanta yachachiwanchik. Abrahampa machuyasqa kamachin Eliezermanta yuyarikuna. Payqa, patronnin nisqanmanjina Isaacpaq, Jehovata yupaychaq warmita maskʼaq Mesopotamiaman rirqa. Juk sipasta pukyumanta yakuta urqhuqta rikuspa, Jehovamanta ajinata mañakurqa: “Noqa mayqen sipastachus nisaj: Pʼuñuykita uraykʼuchikuspa, yakuta qoriway ujyanaypaj, nispa, paytaj pʼuñunta uraykʼuchikuytawan, niwanqa: Kayqa, ujyarikuy, camellosniykimampis ujyarichipusqayki, nispa, chay kachun ajllasqaykeqa kamachiyki Isaacpaj. Ajinapi yachasaj qan patronniyta khuyakusqaykita”, nispa (Gén. 24:12-14).
4 Rebeca yakuta camellospaqwan urqhuptintaq, Abrahampa kamachinqa, Jehová mañakuyninta uyarisqanta yacharqa. Chaymantataq Rebecaqa, Canaanman Isaacpaq warmin kananpaq ripurqa. Kay tiempopiqa, mana ajinata Jehová kutichinawanchikta suyasunmanchu. Chaywanpis, paymanta mañakuspa espiritunwan pusachikuptinchikqa, may ñantachus rinanchikta rikuchiwasun (Gál. 5:18).
Mañakuyqa llakiyta pisiyachin
5, 6. Jacob niraq Esaú wawqinwan tinkuchkaptin, Diosmanta mañakusqan, ¿imatá yachachiwanchik?
5 Diosmanta mañakuyqa, llakiyninchikta pisiyachinman. Jacobqa, wawqin Esauta manchachikusqanrayku, ajinata mañakurqa: “[Jehová], cheqa kayniykiwan mana khuyanawaykipaj jinachu kani. [...] Diosníy, libraway ari wawqey Esaupa makinmanta. Manchachikuni jamuspa noqata, warmisniyta, chantá wawasniytapis wañurachinanta. Qan niwarqanki allin rinawanta tukuy imapi, mirayniypis mama qocha tʼiyu chhika kananta mana yupay atina”, nispa (Gén. 32:9-12).
6 Jacobqa, familianta jarkʼananpaq wakichikurqa, chaywanpis, Jehová mañakuyninman kutichisqanrayku wawqinwan allinyakapurqa (Gén. 33:1-4). Biblia nisqanmanjina, Jacobqa Diospa yanapanta mañakurqa. Mirayninniqta Jallpʼa bendecikunanpi iñirqa. Chantapis, Diospa kʼacha kayninmanta agradecesqa kasqanta rikuchirqa. ¿Imallapis mayta manchachisuq kanchu? (2 Cor. 7:5.) Jina kaptinqa, Jacobpa mañakuynin kallpachasunqa, imaraykuchus chay mañakuyqa, Dios llakiyninchikta pisiyachiyta atisqanta rikuchin. Chantapis, mañakuchkaspa iñiyninchikta rikuchinanchik kasqanta yachachiwanchik.
Yachayta mañakuna
7. ¿Imaraykutaq Moisés, Jehovamanta ñankunanta riqsichinanta mañakurqa?
7 Jehová Diosta kusichiyta munasqanchikqa, yachayta mañakunapaq tanqanawanchik tiyan. Moisesqa, Jehovamanta ñankunanta rikuchinanta mañakurqa, ajinata: “Qan niwarqanki noqaman: Kay runasta [Egiptomanta] orqhoy [...]. Kunanqa Tata Dios, sichus qampi tarini khuyakuyta chayqa, kunan rikuchiway ari ñanniykita, [...] qampi khuyakuyta tarinaypaj”, nispa (Éxo. 33:12, 13). Jehovataq, Moisés israelitasta sumaq jallpʼaman pusaykunanpaq, ñankunanta astawan riqsichirqa.
8. ¿Imaynatataq 1 Reyes 3:7-14 nisqanpi tʼukuriy yanapawanchik?
8 Davidpis, Jehovamanta mañakurqa: “Ñankunaykita rikuchiway”, nispa (Sal. 25:4). Churin Salomontaq, kamachiyninpi ruwanasninta allinta juntʼananpaq, yachayta mañakurqa. Chay mañakusqanqa, Jehovata mayta kusichirqa, chayrayku jatun kayta, qhapaq kayta ima, qullarqataq (1 Reyes 3:7-14, ñawiriy). Diospa llaqtanpi ima llamkʼayta quwasqanchiktapis, mana atinatajina qhawaptinchikqa, Diosmanta mañakuna yachayta, llampʼu sunqutaq kana. Paytaq, chay ruwananchikta munakuywan juntʼanapaq, yachayta quwasun.
Sunqumantapacha mañakuna
9, 10. Salomón, Diosman templota jaywachkaptin mañakusqanpi, ¿imaynasmantá sunqumanta parlarqa?
9 Dios mañakuyninchikta uyarinanpaqqa, sunqumantapacha kanan tiyan. Kay 1 Reyes 8 tʼaqapi, Salomonpa sumaq mañakuyninta tarinchik. Chaytataq, 1026 qayna pacha watapi Jerusalén templota Diosman jaywachkaptin ruwarqa. Salomonqa, Diospa trato ruwasqan arcata Aswan Santo Chiqaman churaptinku, Jehovap phuyun temploman juntʼaykuptin ima, tukuy runaspa ñawpaqinpi Diosta jatuncharqa.
10 Salomonqa, mañakuyninpi achkha kutita sunqumanta parlarqa. Chaypiqa, Jehovalla runap sunqunta riqsisqanta nirqa (1 Rey. 8:37-39). Chantapis, juchallikuqkuna “tukuy sonqonkuwan” pesachikuptinku, perdonta tariyta atisqankuta nirqa. Israelitas enemigosninkuwan atipachikuspa, Jehovap yanapanta mañakuptinku, payman ‘sunqunku chiqanpuni’ kaptinqa, mañakuyninkuta uyarinanta nillarqataq (1 Rey. 8:48-49, 58, 61). Chayqa, mañakuyninchik sunqumantapacha kananta rikuchiwanchik.
Salmos libroqa mañakuypi yanapawasunman
11, 12. Diospa templonman mana riyta atiq levitamanta, ¿imatá yachakunchik?
11 Salmos libroqa, mañakuyninchik Diosta astawan kusichinanpaq, kutichiyninta pacienciawan suyanapaq ima, yanapawasunman. Suyunmanta qharqusqa levitapi tʼukurina. Payqa, Diospa templonman riyta munaspapis, mana atirqachu. Chayrayku jinata takirqa: “Imaraykutaj qʼenaqakuyman kasqari? Imaraykutaj phutikuyman kasqari? Diospi suyakuyniyta churani, paytataj yupaychasajraj. Paymin Salvawaj Diosneyqa” (Sal. 42:5, 11; 43:5).
12 ¿Imatá chay levitamanta yachakusunman? Maykʼaqllapis Diosta yupaychayrayku wisqʼasqa kaptinchik, hermanosninchikwanpis mana tantakuyta atiptinchik, Jehovapi pacienciawan suyakunanchik kasqanta (Sal. 37:5). Jehová Dios, llaqtanwan tantakunanchikta saqinawanchikkamaqa, payta yupaychaspa kusiykunata tarisqanchikpi tʼukurina, mana urmanapaqtaq kallpata mañakuna.
Iñiywan mañakuna
13. Santiago 1:5-8 nisqanmanjina, ¿imaraykutaq Diosmanta iñiywan mañakunanchik tiyan?
13 Imayna kachkaspapis, Diosmanta iñiywan mañakuy. Diosta wasanchachiyta munasuptinkuqa, discípulo Santiagop yuyaychasqanmanjina ruway: Jehovamanta mañakuy, ima chʼampayta atipanaykipaqpis, yachayta qusunanpi atienekuy (Santiago 1:5-8, ñawiriy). Diosqa, llakiyninchikta yachan, espíritu santonniqtataq, yanapawasunman, sunquchawasunman ima. Diospi “ni imamanta iskayrayaspa” iñispataq, imachus llakichisusqanta willay, chantá espíritu santonpa yanapayninta, Palabranpi yuyaychaykunata ima, japʼikuy.
14, 15. ¿Imaynamantá Ana, Diosmanta iñiywan mañakusqanta yachanchik?
14 Anaqa, Diosmanta iñiywan mañakurqa. Payqa, levita Elcanap juknin warmin karqa, nitaq wawasniyuq kayta atirqachu. Chayrayku qusanpa juknin warmin Peninaqa —pichus achkha wawayuq karqa—, mayta asipayaq. Juk kutiqa, Ana, Diosta yupaychanapaq toldopi, Jehovamanta wawayuq kayta mañakurqa, pay uyariptintaq chay wawata payman qupunanta nirqa. Mañakuchkaptinqa, simin kuyuchkarqa, chayraykutaq kuraq sacerdote Elí, machasqa kasqanta yuyarqa. Mana jina kasqanta reparaspataq, nirqa: ‘Israelpa Diosnin chay tukuy mañakusqaykita uyarisuchun’, nispa. Anaqa, Jehová imaynatachus mañakuyninman kutichinanta mana yachaspapis, iñiyniyuq karqa, imaraykuchus chaymantaqa, ‘manaña astawan llakikurqachu’ (1 Sam. 1:9-18).
15 Anaqa, juk wawayuq karqa, Samuel sutitataq churarqa. Ñuñumanta pʼitiytawanqa, Jehovata yupaychana toldoman, llamkʼananpaq pusarqa (1 Sam. 1:19-28). Kay chiqa sunqu warmip mañakuyninpi tʼukuriyqa, Diosmanta imaynatachus mañakunanchikpi tʼukurichiwasun. Chantapis, llakiyta atipanapaq, Dios uyarinawanchikpi iñispa mañakunanchik kasqanta, rikuchiwanchik (1 Sam. 2:1-10).
16, 17. Nehemías, iñiywan mañakusqanrayku, chaymanjina ruwasqanrayku ima, ¿imatataq tarirqa?
16 Diospa kamachin Nehemiasqa, qayna pacha phichqa kaq siglopi kawsarqa, paypis Diosmanta iñiywan mañakurqa, chaymanjinataq ruwarqa. Jehovamanta ajinata mañakurqa: “Mañarikuyki ari Señorníy, mañakususqayta uyarinawaykita, kamachisniyki qhaparikamususqaykutapis, pikunachus kusikuyku sutiykita jatunchaspa, chaykunajta. Mañakullaykitaj tukuy imapi allin rinawanta, jinallataj reypa khuyakuyninta tarinayta”, nispa. ¿Pi reymantataq parlachkarqa? Persiapi kamachiq Artajerjesmanta, imaraykuchus paypa wasinpi vinota jaywaspa llamkʼaq (Neh. 1:11).
17 Nehemiasqa, Diosmanta achkha pʼunchaytaña kʼajaywan mañakuchkarqa, imaraykuchus Babiloniamanta kacharichisqa judiosqa, “may llakiypi, may pʼenqaypitaj kasha[rqa]nku. Jerusalén llajtaj perqasnimpis thuñisqa kasha[rqa]” (Neh. 1:3, 4). Jehovaqa, mana Nehemías yuyasqanmanjinallachu kutichirqa, imaraykuchus rey Artajerjesqa, Jerusalenpa pirqasninta jatarichinanpaq kacharqa (Neh. 2:1-8). Ajinamanta pirqasta usqhayllata sayarichirqa. Jehovaqa, Nehemías, mañakuyninpi Diospi iñisqanta, payta yupaychay aswan patapi kasqanta ima, rikuchisqanrayku kutichirqa. Ñuqanchikmanta, ¿kikintachu nikunman?
Diosta jatunchayta, agradeceyta ima, ama qunqanachu
18, 19. ¿Imasmantataq Jehovata jatunchayta, agradeceyta ima, atisunman?
18 Mañakuypiqa, Jehovata jatunchayta, agradeceyta ima, ama qunqakunachu. Tukuy imamanta, Diosman graciasta quyta atisunman. Sutʼincharinapaq, Davidqa, Jehovap jatun kayninpi tʼukurisqanrayku, sunqumantapacha jatuncharqa (Salmo 145:10-13, ñawiriy). ¿Ñuqanchikrí? Jehovap Reinonmanta willamuyta atisqanchikta jatunpaq qhawasqanchikta, ¿mañakuyninchikpi rikuchinchikchu? Salmos libroqa, jatun tantakuykunamanta, tantakuykunamanta ima, Diosman agradecenapaq yanapawasunman (Sal. 27:4; 122:1).
19 Diospa ñawpaqinpi allinpaq qhawasqa kasqanchikqa, mañakuyninchikpi salmistajina, sunqumantapacha ajinata ninapaq tanqawasunman: “Takiykunawan jatunchasqayki, Tata Dios [Jehová], tukuy ayllus ukhupi, naciones ukhupi ima. Munakuyniykeqa janaj pachakama chayan, cheqa kayniykitaj phuyuskama chayan. Diosníy, janaj pachamanta aswan patapi kanki, jatun kayniykej kʼanchaynintaj tukuy kay pachaman juntʼaykun” (Sal. 57:9-11). ¡May sumaq parlaykunapuni!, ¿icharí? Salmos libroqa, mañakuyninchik Diosta astawan kusichinanpaq, ¡mayta yanapawasunman!
Diosta jatunpaq qhawaspa mañakuna
20. ¿Imaynatá María, Diosta jatunpaq qhawasqanta rikuchirqa?
20 Mañakuyninchikqa, Diosta jatunpaq qhawasqanchikta rikuchinan tiyan. Mariaqa, Mesiaspa maman kananta yachaytawan ajinata nirqa: “Almayqa jatunchan Señorta. Espirituytaj mayta kusikun Salvawajniy Diospi”, nispa (Luc. 1:46, 47). Mariaqa, Diosta jatunpaq qhawasqanta rikuchirqa, chay nisqantaq, Ana wawan Samuelta Diosta yupaychanapaq toldopi saqichkaptin nisqanman rikchʼakun. ¡Chayraykuchá Jesuspa maman kananpaq akllasqa karqa! Qamrí, ¿mañakuyniykipi Diosta Mariajina jatunchawaqchu?
21. Jesús, ¿imaynatá Diosta jatunpaq qhawaspa iñiywan mañakusqanta rikuchirqa?
21 Jesuspis, Diosta jatunpaq qhawaspa iñiywan mañakurqa. Sutʼincharinapaq, Lazarota kawsarichimunanpaqqa, “janaj pachata qhawarispa, nerqa: Tatáy, graciasta qoyki uyariwasqaykimanta. Noqa yachani uyariwasqaykitapuni”, nispa (Juan 11:41, 42). ¿Ajina iñiywanchu mañakunki? Jesús yachachiwasqanchik mañakuyta ukhuncharispaqa, Jehovap sutin llimphuchasqa kananmanta, munaynin juntʼakunanmanta, Reinon chayamunanmanta ima, astawan parlasqanta rikunki (Mat. 6:9, 10). Kunanqa, mañakuykunasniykipi tʼukuriy. Diospa sutin llimphuchasqa kananta, munaynin juntʼakunanta, Reinon chayamunanta ima, ¿mañakunkichu?
22. ¿Imaraykutaq Jehová, mana manchachikuspa willamunapaq yanapanawanchikpi atienekusunman?
22 Jehovap kamachisninqa, qhatiykachasqa kachkaspa chayri ima juchamanpis tanqasqa kachkaspa, yanapanta mañakunku. Ñawpa tiempopi leymanta yachachiqkuna, Pedrota, Juanta ima, manaña “Jesuspa sutimpi yachachinankuta” niptinku, mana kasurqankuchu (Hech. 4:18-20). Kacharisqa kaytawantaq, hermanosninkuman imachus kasqanmanta willarqanku. Chantá tukuyninku, mana manchachikuspa willamunankupaq Diosmanta mañakurqanku. Jehovataq, usqhayllata paykunaman kutichirqa, imaraykuchus chaymantaqa, “Espíritu Santowan juntʼasqa kaspa, [tukuyninku] Diospa Palabranta mana manchachikuspa willarqanku”. ¡Maytachá kusikurqanku! (Hechos 4:24-31, ñawiriy.) Jinata willamusqankuraykutaq, achkhas cristianosman tukurqanku. Kunanpis, Diosmanta mañakuyqa, mana manchachikuspa allin willaykunata willamunapaq yanapawasunman.
Aswan sumaqta mañakullaypuni
23, 24. a) ¿Imastaq Bibliata ñawiriy, ukhunchay ima, mañakuyninchik Diosta astawan kusichinanpaq yanapawasqanchikta rikuchin? b) ¿Imatá mañakuyniyki Diosta astawan kusichinanpaq ruwanki?
23 Bibliapi, ñawpa tiempo runaspa mañakuyninkuta ñawiriy, ukhunchariy ima, mañakuyninchik Diosta astawan kusichinanpaq yanapawasun. Ñuqanchikpis, Jonasjina nisunman: “Salvasqa kayqa Tata Diosmantamin jamun”, nispa (Jon. 2:1-10). Juchallikuspa ancianospa yanapanta mañakuptinchikqa, Davidpa mañakuynin, pesachikusqanchikta Diosman willanapaq yanapawasun (Sal. 51:1-13). Wak kutistaq, mañakuyninchikpi Jeremiasjina Diosta jatunchasunman (Jer. 32:16-19). Casarakuyta munanki chayqa, Esdras librop 9 tʼaqanpi tʼukuriy, chantá Diosman imaynachus kachkasqaykita willay. Chayta ruwayqa, Bibliata kasukuspa ‘Diospi creeqllawan’ casarakunaykipaq yanapasunqa (1 Cor. 7:39; Esd. 9:6, 10-15).
24 Bibliata ñawiriyta, ukhunchayta ima, amapuni saqiychu. Diospa yanapanta mañakuchkaptiyki, jatunchachkaptiyki chayri graciasta quchkaptiykipis, Bibliapi ñawirisqaykimanjina mañakuy. Mañakuyniyki Diosta astawan kusichinanpaq kallpachakunki chayqa, payman sapa pʼunchay astawan qayllanki.
¿Imatá kutichiwaq?
• ¿Imaraykú Diospa yanapanta mañakuna, chaymanjinataq ruwana?
• ¿Imataq Diosmanta yachayta mañakunapaq tanqanawanchik tiyan?
• ¿Imaynamantá Salmos libro mañakuyninchikpi yanapawasunman?
• ¿Imaraykutaq iñiywan, Diosta jatunpaq qhawaspataq mañakuna?
[Tapuykuna]
[8 paginapi dibujo/foto]
Abrahampa kamachinqa Diospa yanapanta mañakurqa. ¿Qamrí? ¿Kikintachu ruwanki?
[10 paginapi dibujo/foto]
Familiapi Diosta Yupaychayqa, mañakuykunasniykipi yanapasunkiman