Ñawiriqkunapta tapuyninku

Wawita mamanpa wiksan ukhupi wañupuptin, ¿chay wawitata, Dios kawsarichimunqachu?

Juk qhariwarmiqta, wawitanku manaraq nacekuchkaspa wañupuptin, imaynatachus llakikusqankutaqa, mana yachanchikchu. Wakinqa mayta llakikunku. Juk hermanaqa, phichqa kutipi, wawitasninta wañusqitata nacechikurqa. Chaymanta qhipaman iskay wawitasniyuq kaspapis, payqa chay phichqa wawitasnin manaraq nacekuchkaspa wañupusqankumanta, mana qunqarqachu. Wañupunankamataq, wañupuq wawitasnin, kawsankuman karqa chayqa, machkha watasniyuqñachus kanankuta sumaqta yacharqa. Chayrayku chay qhariwarmis, wawitanku manaraq nacekuchkaspa wañuptin, ¿chay wawitankuta, wiñay kawsaypi kawsarimunanta suyankumanchu?

Mana yachanchikchu, imaraykuchus Bibliaqa, manaraq nacekuchkaspa wañupuq wawitas kawsarimunankumanta, mana sutʼinchanchu. Chaywanpis Diospa Palabranpi kamachiykunasqa, sunqucharinawanchikpaqjina.

Ñawpaqtaqa kay iskay tapuykunata qhawarina: ¿Maykʼaqmantapachataq Jehová, juk wawitata kawsayniyuqtajinaña qhawan: mamanpaq wiksan ukhupi kachkaptillanraqchu chayri nacekusqanmantaraqchu?, manaraq nacekuq wawitata, ¿Diosninchik juk runatajinañachu qhawan chayri manaraqchu? Bibliap yuyaychasqanqa, kay iskay tapuykunaman sutʼita kutichiwanchik.

Diosqa, Moisesman kamachiykunata qusqanpi, manaraq nacekuq wawitata, juk runatajinaña qhawasqanta rikuchiwanchik. Chayrayku, manaraq nacekuq wawitata mamanpa wiksan ukhupi wañuchiqqa, wañunallantaq karqa. Chay kamachiy nin: “Pagasqa kanqa kawsaymanta kawsaywan”, nispa (Éxo. 21:22, 23). * Chayrayku, mamanpaq wiksan ukhupi wawitaqa, kawsayniyuq runaña. Kayta yachaytaq Diospa kamachisninta, manaraq nacekuq wawitata wañuchiyqa, Diospaq may jatun jucha kasqanta yachanankupaq, yanapan.

Rikusqanchikmanjina, wawitap kawsayninqa mamanpa wiksan ukhupi qallarin. Jehová, ¿chay wawitap kawsayninta jatunpaqchu qhawan? Diospa kamachiyninta rikusqanchikmanjina, manaraq nacekuq wawitata wañuchiqqa, wañunallantaq karqa. Chaywantaq, Diosqa, chay wawitata may jatunpaq qhawasqanta sutʼita rikuchiwanchik. Chantá Bibliamanta achkha pʼitikunapis Jehová, manaraq nacekuq wawita may jatunpaq qhawasqanta rikuchillawanchiktaq. Kamachiq Davidqa, kayta Diosman nirqa: “Mamaypa wijsampeqa qampuni ruwawarqanki [...] ñawisniykeqa imaynatachus cuerpoy ruwakusharqa, chayta rikorqaña. Imaynachus kawsayniy kananta libroykipi qhelqasqaña karqa” (Sal. 139:13-16; Job 31:14, 15).

Jehovaqa, manaraq nacekuq wawita imayna kʼacha kaykunasniyuqchus kananta qhawallantaq. Isaacpa warmin Rebeca wiksallisqa kachkaptin, iskay wawitas (Jacob, Esaú) wiksan ukhupi kachkarqanku, chay wawitastaq wiksan ukhupi maqanakuchkarqanku. Jehovaqa, kay iskay wawitasmanta sumaqta yachasqanrayku, aswan qhipaman mana allintachu kawsakunankuta nirqa (Gén. 25:22, 23; Rom. 9:10-13).

Bibliaqa, Juan Bautistamantapis parlallantaq: “Jinapi Mariajpa napaykusqanta Elizabet uyarejtin, wawaqa Elizabetpa wijsan ukhupi kuyurerqa. Elizabettaj Espíritu Santowan juntʼa karqa” (Luc. 1:41). Kay pʼitita qillqachkaspa Lucasqa, manaraq nacekuq wawitamanta, nacekuq wawitamanta ima parlananpaq, griego simipi juk rimayta uqharirqa. Lucasqa, Jesús ñacekusqanmanta parlananpaqpis, chay rimayllatataq uqharirqa (Luc. 2:12, 16; 18:15).

Kaykunata yachakuspa, ¿Biblia, manaraq nacekuq wawita, nacekuq wawitawan wakjinastaq  kasqankuta nisqanta nisunmanchu? Manasina. Bibliap yachachisqanqa, kay tiempomanta yachayniyuq runas yachachisqankuwan rikchʼakullantaq. Paykunaqa manaraq nacekuq wawitamanta sumaqta ukhunchasqankumanjina, tatan maman ima, munakuchkasqankutachus manachus sientesqanta ninku. Chayrayku maman wawitanta munakusqanqa mana tʼukunapaqjinachu.

Juk mamaqa, sapa juk wawitanmanta mana kikintachu wiksallikun. Juk mamap wawitan, niraq nacekunan kachkaptin, nacekuptin pisi pʼunchaykunasninman wañupusqanpitaq tʼukuriy. Kunanqa juk mama, wawitanta nacechikunan pʼunchay qayllapiña kachkaptin, wawitan wiksan ukhupi wañupusqanpi tʼukurillaytaq. Ñawpaq kaq mamaqllata, wawitan manaraq tiemponpi nacekusqanrayku kawsarimunanpi yuyananchik, ¿allinchu kanman?

Bibliaqa, wawita ruwakuchkaptinña kawsay qallarisqanta, Jehovataq manaraq nacekuq wawitata juk runatajinaña, jatunpaq qhawasqanta yachachin. Chayrayku ichá wakin cristianospaqqa, manaraq nacekuq wawita wañupuptin, mana kawsarimunanta yuyayqa, mana allinchu kanman. Chaywanpis jinata yuyaspaqa, mamanpaq wiksan ukhupi wawitata wañuchiy, Biblia juchachasqanta, pisipaq qhawachkasqankuta ninkuman.

Unayqa, kay revistapijina, kay tapuykunajina rikhurisqan, manaraq nacekuchkaspa wañupuq wawitas kawsarimunankutajina rikuchirqa. Chay tapuykunamanta juknin tapuyqa, kay karqa: Jehová paraisopi, manaraq nacekuchkaspa wañupuq wawitata, mamanpa wiksan ukhumanchus churapunanta chayri manachus. Diospa llaqtanta Kamachiqkunaqa, Diosmanta mayta mañakuspa, astawan ukhunchaspa, tʼukurispa ima, chayjina tapuykunaqa, suyakuyninchikta mana tikrachisqanta ninku. Jesús nirqa: “Diospajqa tukuy imapis atikun”, nispa (Mar. 10:27). Chay nisqantataq kawsayninpi juntʼakusqanta rikunchik, imaraykuchus Jehovaqa, Jesusta, juk mana qharita riqsiq warmip wiksan ukhuman, wawitajina nacekunanpaq churarqa, chaytaq runapaq mana atikuqjina.

¿Kaytaq ninayanchu manaraq nacekuchkaspa wañupuq wawitas kawsarimunankuta? Kay tapuyman Bibliaqa, mana sutʼita kutichinchu, chaywanpis mana kawsarimunankutapuni nisunmanchu. Kayjina tapuykunaqa, wak tapuykunatawanraq rikhurichinman, chayrayku mana yuyasqallanchiktaqa parlananchikchu tiyan. Chaywanpis kawsarimunankutachus manachus, munakuyniyuq, khuyakuyniyuq ima, Jehová Dioslla yachan (Sal. 86:15). Mana iskaychakuspa, wañuyrayku llakisqa kaqkunata, Jehová wañupuqkunata kawsarichimuspa sunquchananta nisunman (Job 14:14, 15). Diosqa, maychus chiqan kaqmanjina imatapis ruwananta yachanchik. Payqa, kay saqra pachapi ñakʼariykuna kasqanta tukuchinqa, imaraykuchus, “Kuraj Supaypa ruwasqasninta phirinampaj” Churinta kamachin (1 Juan 3:8).

[Sutʼinchaynin]

[13 paginapi dibujo/foto]

Jehovaqa, kay saqra pachapi llakiykunata tukuchispa sunquchawasun